TUHO SIʼOFÖNA
Haniha ndra Samaduhuʼö Yehowa?
”No ara uʼila haniha Mike. Yaʼia andre samösa Zamaduhuʼö Yehowa. Tobali, lö aboto ba dödögu sanandrösa ba agamania. Haniha Yehowa? Hadia mbörö wa lö lafalua ngaluo sebua simane nifalua niha sato? Hadia zi faduhu dödöra?”—Nitutunö Becky, California, U.S.A.
”So niha si falazi omo khöma, labörögö lafahaʼö ira khö ndra Samaduhuʼö Yehowa. Manofu-nofu dödögu: ’Hadia geluaha nifotöi Samaduhuʼö Yehowa? Daʼö döi agama si no faböʼö!’”—Nitutunö Zenon, Ontario, Canada.
”Mamane dödöma daruaga foʼomogu, andrö wa laʼondrasi ndraʼaga ira Samaduhuʼö Yehowa börö me lö möi-möi ndraʼaga ba gosali. Na agama tanö böʼö manö tebai ibeʼe khöma waʼaboto ba dödö sanandrösa ba Daromali, mendrua manö ndra Samaduhuʼö Yehowa.”—Nitutunö Kent, Washington, U.S.A.
”Si ndruhu-ndruhu lö aboto ba dödögu haniha ira ba hadia zi faduhu dödöra.”—Nitutunö Cecilie, Esbjerg, Denmark.
Tatu manö no irai öʼila ira manuriaigö ba nomo-nomo misa mazui ba nahia sato niha, labeʼe mbuku ba niha sanandrösa ba Zura Niʼamoniʼö, lafahaʼö göi niha ba Daromali ba lö laʼandrö gefe. Tatu manö no irai ötema mbuku moroi ba gotalua ndra Samaduhuʼö Yehowa. Temanofu-nofu dödöu haniha zi ndruhunia ndra Samaduhuʼö Yehowa. Ba zalua andre tola manö fagölo gera-erami simane Becky, Zenon, Kent ba Cecilie.
Na so wanofu-nofumö simane daʼö, hezo ösöndra wanemali? Hewisa enaʼö öʼila hadia zi faduhu dödö ndra Samaduhuʼö Yehowa? Hezo moroi gefe ba wamazökhi nahia gangowuloara hegöi ba wamalua halöwö fanuriaigö andre? Hadia mbörö wa manuriaigö ira ba nomo misa hegöi ba nahia sato niha?
Imane Cecilie, ”Oya nibasogu ba internet sanandrösa khö ndra Samaduhuʼö Yehowa. Oya nirongo-rongogu wehede si lö baga ba niha. Andrö wa so khögu wangera-ngera si lö baga”. Ba gafuritania ihalö gangetula fahuhuo ia khö ndra Samaduhuʼö Yehowa ba isöndra wanemali moroi ba zinofu-nofunia andrö.
Hadia omasi ndraʼugö ösöndra wanemali moroi ba zinofu-nofumö sanandrösa khö Zamaduhuʼö Yehowa? Omasi ndraʼaga mafarou ami enaʼö miʼalui haniha zi ndruhunia Zamaduhuʼö Yehowa. (Gamaedola 14:15) Buku daʼa zi tola manolo yaʼami enaʼö miʼila haniha zi ndruhunia Zamaduhuʼö Yehowa, hadia zi faduhu dödöra ba hadia halöwö nifaluara.