TUHO SIʼOFÖNA | HANIHA NDRA SAMADUHUʼÖ YEHOWA?
Hewisa zi ndruhunia ndra Samaduhuʼö Yehowa?
Yaʼaga andre no sambua Angowuloa Yehowa ba zi sagörö ulidanö si lö farahu ba agama tanö böʼö. Hewaʼae ba Amerika so gödoma sebua, hizaʼi ira Samaduhuʼö Yehowa so ira ba ngawalö soi. So walu zuta ndra Samaduhuʼö Yehowa, lafahaʼö niha ba Daromali ba zi töra 230 soi. Mafalua halöwö daʼa börö me maʼoʼö niwaʼö Yesu, ”Teturiaigö dania Mbanua Lowalangi andrö, turia somuso dödö, ba gulidanö misa, maʼasagörö, ba wamaduhuʼö ba niha fefu.”—Mataiʼo 24:14.
Gofu hezo toröi ndraʼaga, maʼoʼö huku nibeʼe ndra samatörö asala lö itegu ndraʼaga tödöma side-ide. Hizaʼi, lö ebua dödöma zamösana ba wamatörö niha gulidanö. Börö me maʼoʼö niwaʼö Yesu ”tenga moroi ba niha gulidanö”, andrö wa lö faʼawö ndraʼaga ba wamatörö niha hegöi ba wasuwöta. (Yohane 15:19; 17:16) Me alua wasuwöta si mendrua ba zi sagörö ulidanö, ato ndra Samaduhuʼö Yehowa nibeʼe ba gurunga, nifakao, mazui labunu börö me lö fao ira ba wasuwöta. Samösa niha si no irai tobali uskup moroi ba Jerman imane: ”Yaʼira sambua gorahua sebua si lö omasi fao ba wasuwöta börö me no laʼokhögö waʼaboto ba dödö ba Daromali.”
”Laʼokhögö gamuata si sökhi ira [Samaduhuʼö Yehowa]. Moguna khöda niha si so fangide-ngideʼö simane yaʼira si tobali samatörö, hizaʼi tebai tafalua zimane daʼö. . . . Hewaʼae laʼakui wamatörö niha gulidanö, hizaʼi faduhu dödöra ha famatörö Lowalangi zi tola mangeheta fefu gabula dödö niha gulidanö.”—Koran Nová Svoboda, Republik Cheska.
Tenga daʼö geluahania lö fariawö ndraʼaga ba niha. Mangandrö Yesu salahi ndra nifahaʼönia, ”Lö uʼandrö, öheta ira ba gulidanö, ba enaʼö örorogö ira, ba öʼefaʼö ba Gafökha.” (Yohane 17:15) Börö daʼö, tola miʼila ndraʼaga ba nahia wogale, nahia wohalöwö, ba zekola.