Hadia Tobali Fanuturu Lala si Sökhi Khöda Dödö Side-ide?

1, 2. Haniha zameʼe khöda tödö side-ide, hana wa taʼandrö saohagölö?

IFAZÖKHI NIHA YEHOWA enaʼö tola lahalö gangetula samösa. Enaʼö tola tahalö gangetula si sökhi, ibeʼe khöda dödö side-ide. Daʼa faʼaboto ba dödö hadia zi sökhi ba si lö sökhi. Na sökhi ba wangogunaʼöda, daʼa zi tola manolo yaʼita ba wamalua si sökhi ba taʼaröuʼö ita ba zi lö sökhi. Tandra waʼomasi Yehowa, yaʼia daʼö ibeʼe dödö side-ide ba niha fefu enaʼö lafalua zi sökhi ba waʼaurira.

² Ato niha iadaʼa lafalua zi sökhi ba fatuwu ira zi lö sökhi hewaʼae lö aboto ba dödöra niwaʼö Zura Niʼamoniʼö. (Baso Roma 2:14, 15.) Hadia mbörö? Börö me so khöra dödö side-ide. Ato niha ba ginötö iadaʼa lö lafalua zi lö sökhi börö me itegu ira tödöra side-ide. Khalaigö atö hadia zalua ba gulidanö na lö hadöi ba niha dödö side-ide! Oya duria si lö sökhi nirongoda moroi ba zi sökhi. Taʼandrö sibai saohagölö khö Yehowa me no ibeʼe ba niha dödö side-ide!

3. Hadia gunania ba mbanua niha keriso na no tafahaʼö dödöda side-ide?

³ Ato niha iadaʼa lö laʼogunaʼö dödöra side-ide ba wangai angetula. Hizaʼi, ono mbanua Yehowa lafahaʼö dödöra side-ide ba wamalua si sökhi. Lua-luania so khöra wahasara dödö ba mbanua niha keriso. Omasi ita enaʼö tödö side-ide andrö zamasugi ba dödöda goi-goi Lowalangi sanandrösa ba zi sökhi hegöi si lö sökhi, satulö ba si lö atulö. Hewaʼae simanö, lö abönö na ha taʼogunaʼö Zura Niʼamoniʼö ba wamahaʼö tödöda side-ide. Moguna taʼomasiʼö goroisania ba faduhu dödöda wa goi-goi Lowalangi andrö moguna ba waʼaurida. Imane Faulo, ”Ba daʼö moguna goroisa, ba ba wangaʼasogö faʼomasi, soroi ba dödö si no ohau-hau, ba ba dödö si lö fategu, ba ba wamati si lö famini.” (I Timoteo 1:5) Na tafahaʼö dödöda side-ide ba taʼoʼö wanuturu lala moroi khö Yehowa, itugu tedou waʼomasida khönia ba mamati ita. Na taʼogunaʼö dödö side-ide, daʼö zangoromaʼö wa ahatö ita khö Yehowa ba omasi tafalua hadia zomasi ia. Moroi ba gangetula nihalöda ba daʼö oroma haniha ita zi ndruhunia.

4. Hewisa enaʼö tola tafahaʼö dödöda side-ide?

⁴ Hewisa enaʼö tola tafahaʼö dödöda side-ide? Moguna asese tafahaʼö ita ba Zura Niʼamoniʼö, taʼangerönusi hadia zi no tabaso ba taʼandrö wanolo khö Yehowa enaʼö itolo ita ba wamalua hadia zi no tafahaʼö yaʼita. Tenga ha asala tabaso, moguna tafalua ia ba waʼaurida. Ohitö dödöda wa tafahaʼö ita ba Zura Niʼamoniʼö yaʼia daʼö enaʼö itugu monönö waʼaboto ba dödöda sanandrösa khö Yehowa. So khöda waʼaboto ba dödö hadia zomasi Lowalangi ba hadia zi fatuwu ia. Na ahatö ita khö Yehowa, tödöda side-ide zi tola manolo yaʼita ba wamaehusi hadia zi sökhi ba si lö sökhi. Na asese tafahaʼö dödöda side-ide, no fakhili-khili lala wangera-ngerada khö Yehowa.

5. Hadia nifatunöda ba duho daʼa?

⁵ Moguna tasofu khöda samösa: Hewisa dödöda side-ide si no tefahaʼö itolo ita ba wangai angetula? Hewisa wangandröda saohagölö ba gangetula nihalö ndra talifusöda? Hewisa dödöda side-ide itolo ita ba wamalua si sökhi? Datafaigi hewisa wangogunaʼöda dödö side-ide si no tefahaʼö sanandrösa ba: (1) dalu-dalu, (2) wanörö-nörö, (3) halöwö fanuriaigö.

HALÖ GANGETULA SI TEFAUDU

6. Hadia gangetula zi samösa-mösa niha ba wangogunaʼö dalu-dalu?

⁶ Ifarou ita Sura Niʼamoniʼö enaʼö taʼaröuʼö ita ba ngawalö zi tola mamaʼala yaʼita simane femanga-manga ba famadu. (Gamaedola 23:20; II Korindro 7:1) Na taʼoʼö goi-goi Zura Niʼamoniʼö, daʼö zanolo yaʼita enaʼö lö göna ita fökhö. Hewaʼae simanö, hasambalö göna ita fökhö ba tatörö waʼamate. Hadia gangetula sinangea tahalö? Ba mbanua tanö böʼö, so dalu-dalu bulu ndruʼu niʼogunaʼö ba so göi moroi khö ndra doto. Ato ndra talifusöda zameʼe sura ba gödo si so ba soi böʼö, ba wanofu dalu-dalu si tola laʼogunaʼö.

7. Hewisa enaʼö tola tahalö gangetula si tefaudu ba wangogunaʼö dalu-dalu?

⁷ Talifusöda si so ba gödo ba soi böʼö mazui satua sokubaloi tebai lahalö gangetula khö ndra talifusöda böʼö hadia dalu-dalu sinangea laʼogunaʼö, hewaʼae lasofu hadia gangetula sinangea lahalö. (Galatia 6:5) Hizaʼi, satua sokubaloi tola ituturu lala enaʼö tola lahalö gangetula si tefaudu ba zomasi Yehowa. Duma-dumania, no ibeʼe goroisania Yehowa enaʼö taʼaröuʼö ita moroi ba ndro. (Halöwö Zinenge 15:29) Aboto ba dödöda wa niha keriso tebai latema dalu-dalu sangogunaʼö do mazui öfa ngawalö komponen darah. Moroi ba zi öfa ngawalö komponen darah andre, so nifotöi fraksi-fraksi darah. Yaʼita niha keriso moguna tahalö gangetula si tefaudu ba wangogunaʼö fraksi-fraksi darah, hadia tatema mazui löʼö.a (Faigi zi no musura ba gahe zura.) Hadia mene-mene tanö böʼö moroi ba Zura Niʼamoniʼö sanolo yaʼita ba wangai angetula sanandrösa ba dalu-dalu?

8. Hewisa Filifi 4:5 itolo ita ba wangai angetula si tefaudu ba wangalui dalu-dalu?

⁸ Imane Gamaedola 14:15, ”Sambö tödö, ba ifati fefu hadia ia niwaʼö; ba satua-tua, ba ifaigi nibekainia.” Ba ginötö andre so wökhö si lö musöndra dalu-dalu. Moguna mangelama ita ba ngawalö dalu-dalu na so niha zangumaʼö khöda tola ifadöhö wökhöda, si ndruhunia niwaʼönia andrö tola lö atulö. Imane Faulo: ”Yaʼaboto ba dödö niha fefu waʼebolo dödömi andrö!” (Filifi 4:5) Faʼebolo dödö andre zanolo yaʼita enaʼö taʼosambuaʼö dödöda wamosumange Yehowa moroi na taʼabusi tödö ngawalö wökhö salua khöda. Na ha ba wangalui dalu-dalu manö niʼera-erada, tola mangoloi dödöda ba wamosumange Yehowa. (Filifi 2:4) Aboto ba dödöda hasambalö göna ita fökhö ba gulidanö andre. Börö daʼö, moguna taʼofönaiʼö wamosumange Yehowa ba waʼaurida.​—Baso Filifi 1:10.

9. Hadia wamahaʼö khöda moroi ba Roma 14:13, 19, hadia zi tola mamakiko fahasara dödö ba gangowuloa?

⁹ Talifusöda si so faʼebolo dödö, lö ifaso ndra talifusöda tanö böʼö ba wangai angetula si sökhi moloʼö niwaʼönia. Ba zi sambua soi, so dalifusöda songambatö, lafarou dödö ndra talifusöda tanö böʼö enaʼö laʼöli dalu-dalu fangafuo. So zomasi ba so zi löʼö. Börö me lö tefaudu dalu-dalu si no laʼogunaʼö andrö, ato ndra talifusöda sabao tödö. Talifusöda songambatö andre tola lahalö gangetula hadia omasi ira laʼogunaʼö dalu-dalu andrö mazui löʼö. Hizaʼi, hadia sökhi na lafarou dödö ndra talifusöda ba wo wöli dalu-dalu fangafuo, na daʼö zi tobali fangeheta fahasara dödö ba gangowuloa? Ba mbanua Roma, so waʼafaehu wangera-ngera ndra talifusöda sanandrösa ba gö hegöi luo sebua sasese lafalua niha. Ibeʼe Waulo mene-mene khöra, ”Ba böi saʼae tahuku nawöda; So sa zamaehusi luo, ba so zangumaʼö faoma manö; böi zi lö faduhu dödö zamösana.” Moguna mangelama ita enaʼö böi taʼasogö zi fatuwu mazui si möi fangala khö ndra talifusöda.​—Baso Roma 14:5, 13, 15, 19, 20.

10. Hana wa moguna taʼandrö saohagölö ba gangetula nihalö ndra talifusöda? (Faigi gambara ba ngaʼörö 13.)

¹⁰ Itaria lö aboto ba dödöda hadia mbörö wa so ba gotalua ndra talifusöda zangai angetula samösa ba zalua khönia. Hadia nifaluada? Böi so ba wangera-ngerada wanguhuku yaʼia mazui tafaso ia enaʼö ibulöʼö gangetula si no ihalö. Moguna asese ifahaʼö dödönia side-ide hadia atulö ma löʼö gangetula nihalönia. (I Korindro 8:11, 12) Mazui, tödöda side-ide zinangea tafahaʼö. Yaʼita samösa zangai angetula si sökhi hadia dalu-dalu sinangea taʼogunaʼö me khöda tezofu-zofu dania.

FANÖRÖ-NÖRÖ

11, 12. Hewisa Zura Niʼamoniʼö wanolonia yaʼita ba wangai angetula sanandrösa ba wanörö-nörö?

¹¹ Omasi Yehowa na tabeʼe ginötöda weʼamöi manörö-nörö ba so gunania khöda. Imane Zelomo so ginötö ”faʼiki ba folaya.” (Zangombakha 3:4) Hizaʼi, lö fefu wanörö-nörö andre sökhi ba so gunania. Moguna göi taʼangeraigö enaʼö böi ahori ginötöda ba wanörö-nörö. Hewisa dödöda side-ide möi fanoloda ba wangai angetula si sökhi sanandrösa ba wanörö-nörö?

¹² Ifangelama ita Sura Niʼamoniʼö enaʼö taʼaröuʼö ita ba ”mbua-bua nösi andrö, yaʼia wohorö, ba faʼaraʼiraʼiö, ba faʼatebakha, ba fameʼe adu, ba fakelemusa, ba fatiusa, ba fasosota, ba fatötöisa, ba fönu, ba fanandraŵa, ba faʼudusa, ba faʼerosa, ba faʼafökhö dödö, ba femabu-mabu, ba femanga-manga, ba hadia ia nawönia, ba uhönagö uŵaʼö khömi, simane niŵaʼögu no saʼae khömi, solau simanö, ba tebai isöndra mbanua Lowalangi.” (Galatia 5:19-21) Moguna taʼangerönusi samösa, ’Hadia itegu ndraʼo tödögu side-ide ba wamalua olaraga simöi famakiko, fatandrisa mazui famomaha ba waʼalösökhi ba tanö böʼönia? Hadia itegu ndraʼo tödögu side-ide ba ginötö ufaigi gambara si lö baga simane fohorö, femabu mazui fakelemusa?’

13. Hewisa wanuturu lala ba I Timoteo 4:8 ba Gamaedola 13:20 itolo ita sanandrösa ba wanörö-nörö?

¹³ Goi-goi Zura Niʼamoniʼö daʼö zi tola manolo yaʼita ba wangai angetula sanandrösa ba wanörö-nörö. Duma-dumania, imane Sura Niʼamoniʼö ”löʼö sa börö moguna wamamaha boto andrö.” (I Timoteo 4:8) Ato niha zangumaʼö na asese faʼolaraga ita lö alio göna ita fökhö. Hizaʼi, na fao ita faʼolaraga ba niha böʼö, hadia moguna tafili haniha nawöda? Imane Gamaedola 13:20, ”Si fao-fao ba zatua-tua, ba atua-tua dania; ba si möi awö zi lö tödö, ba falukha wamunu.” Moguna taʼogunaʼö dödö side-ide si no tefahaʼö ba ginötö tahalö gangetula ba wanörö-nörö.

14. Hewisa zi sambua omo ba woloʼöra mene-mene niwaʼö Roma 14:2-4?

¹⁴ Christian ba Daniela so darua nonora alawe si bohou ebua. Itutunö Christian, ”Ba mbongi wamahaʼö ba nomo nifaluama, mafatunö sanandrösa ba wanörö-nörö. Mahalö gangetula wa so wanörö-nörö si sökhi ba so göi zi lö moguna. Haniha zinangea tabaliʼö awöda fariawö? Imane onoma alawe, ba ginötö molombase ba sekola, so ndraono matua Samaduhuʼö Yehowa ba zekolania lafalua gamuata si lö tefaudu. Tola manö lö ahono dödönia na lö iʼoʼö. Mafatunö wa so khöda dödö side-ide ba taʼoʼö wanuturu lala ba wotatugöi hadia zinangea tafalua ba haʼökhö fao ita.”​—Baso Roma 14:2-4.

15. Hewisa Mataiʼo 6:33 möi fanoloda ba wangai angetula weʼamöi manörö-nörö?

¹⁵ Hawa oya ginötö niʼogunaʼömö ba wanörö-nörö? Hadia no öbeʼe ginötöu weʼamöi ba gangowuloa, manuriaigö, wamahaʼö ba Zura Niʼamoniʼö, mazui fanörö-nörö sabölö öʼofönaiʼö ba waʼauriu? Hadia zabölö moguna ba waʼauriu? Imane Yesu, ”Miʼofönaiʼö wangalui banua Lowalangi andrö, awö waʼatulö dödö andrö khönia, ba tebeʼe nönö-nönö dania khömi daʼö fefu.” (Mataiʼo 6:33) Ba wangogunaʼöu inötö, hadia tödö side-ide möi famasugi ba dödöu mene-mene nibeʼe Yesu andrö?

TEFAROU ITA WEʼAMÖI MANURIAIGÖ

16. Hewisa dödö side-ide möi famarou dödöda weʼamöi manuriaigö?

¹⁶ Tödö side-ide si no tefahaʼö tenga ha itegu ita enaʼö lö tafalua gamuata si lö sökhi, tobali ifarou ita göi ba wamalua si sökhi. Simane feʼamöi manuriaigö ba nomo misa, ba gofu hezo so ita. Daʼö nifalua Waulo. Imane, ”Löʼö sa tola lö umanö, alai sa ndraʼo, na lö uʼombakhaʼö duria somuso dödö andrö!” (I Korindro 9:16) Na taʼoʼö simane nifalua Waulo, taʼokhögö dödö side-ide si lö sinegu börö me no tafalua zi sökhi. Na möi ita manuriaigö, no tadönisi dödö niha ba wamalua si sökhi. Imane Faulo, ”Ba me lö mafuyuʼö daromali Lowalangi; mafaduhuʼö ndraʼaga ba dödö niha fefu, föna Lowalangi, wamaʼeleʼö si duhu andrö.”​—II Korindro 4:2.

17. Tutunö hewisa dalifusöda Jacqueline ba wangogunaʼönia tödö side-ide si no tefahaʼö ba Zura Niʼamoniʼö?

¹⁷ Me 16 fakhe ndröfi Jacqueline iʼoʼö wamahaʼö biologi ba zekola. Famahaʼö daʼö so amakhaita ba evolusi. Imane Jacqueline, ”Muhede-hede dödögu side-ide, lö omasido ufahaʼö ndraʼo ba daʼö. Lö fao dödögu ba wamahaʼö evolusi. Fahuhuo ndraʼo khö gurugu, ufatunö hadia zi faduhu dödögu. Sökhi gamuata gurugu irege ibeʼe khögu ginötö ba wanutunö hewisa Lowalangi wamazökhinia niha”. Omuso dödö Jacqueline börö me iʼoʼö niwaʼö dödönia side-ide si no tefahaʼö ba Zura Niʼamoniʼö. Hadia tödöu side-ide ifarou ndraʼugö ba wamalua si ndruhu?

18. Hana waʼomasi ita taʼokhögö dödö side-ide si lö sinegu?

¹⁸ Ohitö dödöda yaʼia daʼö wamalua goi-goi Lowalangi ba waʼaurida. Tödöda side-ide zi tola manolo yaʼita. Na lö taböhöli wamahaʼö yaʼita ba Daromali Lowalangi, taʼangerönusi fefu hadia ia zi no tabaso, tafalua ba waʼaurida, tola taʼokhögö dödö side-ide si lö sinegu. Tödö side-ide andre no sambua howu-howu moroi khö Yehowa enaʼö taʼogunaʼö ia si tobali fanuturu lala ba waʼaurida!