Hadia No Örasoi Waʼabölö Lowalangi ba Waʼaurimö?

1, 2. Hadia zi so ba dödö niha sanandrösa khö Lowalangi?

ATO niha ba ginötö andre faduhu dödöra wa lö ba dödö Lowalangi gofu hadia ia nifaluara. So zangumaʼö wa lö ba dödö Lowalangi hadia zalua khöra. Duma-dumania, me alua nangi sabölö-bölö ba Filipina me baŵa si 11 ba ndröfi 2013, samösa walikota ba Filipina imane wangumaʼö, ”Lö ba dödö Lowalangi fefu zalua andre.”

² So göi zangumaʼö hadia nifaluara ba gulidanö lö iʼila Lowalangi. (Yesaya 26:10, 11; III Yohane 11) Fangera-ngera simane daʼö so göi ba götö Waulo. Lö moguna aboto ba dödöra Lowalangi, afaito sibai ira, fakhögusa, ba faʼalösökhi.​—Roma 1:28, 29.

3. (a) Hadia wanofu sinangea taʼangerönusi? (b) Hadia geluaha wehede ”danga” Lowalangi moloʼö Sura Niʼamoniʼö?

³ Hewisa ita? No aboto ba dödöda wa fefu nifaluada iʼila Yehowa. Hadia faduhu dödöda wa ifaigi-faigi ita Yehowa? Hadia no tarasoi wanolonia yaʼita ba waʼaurida? Ba Zura Niʼamoniʼö, ”tanga” Lowalangi eluahania so khönia waʼabölö. Iʼogunaʼö waʼabölönia ba wanolo ono mbanuania hegöi ba wangohori nudunia. (Baso V Moze 26:8.) Imane Yesu wa so niha ”zangila Lowalangi.” (Mataiʼo 5:8) Hadia no tefarahu ita ba daʼö? Hewisa wa tola ’taʼila Lowalangi’? Datafaigi duma-duma niha si no morasoi faʼabölö Lowalangi ba waʼaurira hegöi si löʼö, nisura ba Zura Niʼamoniʼö. Datafahaʼö ita hewisa wamati möi fanoloda ba worasoi faʼabölö Lowalangi.

LÖ OMASI IRA LARASOI WAʼABÖLÖ LOWALANGI

4. Hadia mbörö wa nudu ndraono Gizaraʼeli lö faduhu dödöra ba waʼabölö Yehowa?

⁴ No tebeʼe ginötö ba niha me götö föna enaʼö laʼila ba larongo hewisa waʼabölö Lowalangi ba wanolo ndraono Gizaraʼeli. Iʼogunaʼö Yehowa waʼabölönia ba wangefaʼö ndraono Gizaraʼeli moroi ba danö Miserai, ba wolawa razo si so ba danö gamabuʼula. (Yosua 9:3, 9, 10) Me laʼila ba larongo hewisa wanolo Yehowa ono mbanuania ”ba laʼorudugö ira, ha sara dödö, ba wanimba Yosua ba iraono Gizaraʼeli.” (Yosua 9:1, 2) Me lasuwö ndraono Gizaraʼeli, razo-razo me luo daʼö larasoi wa fao Lowalangi ba ndraono Gizaraʼeli, irege laʼila waʼabölö Yehowa me ”ibalugö ia luo ba tebato wofanö mbaŵa, irege no lalau mbalöra iraono Gizaraʼeli ba nemalira.” (Yosua 10:13) Tobali, iʼabeʼeʼö Yehowa dödö nudu ndraono Gizaraʼeli, irege lasuwö ndraono Gizaraʼeli. (Yosua 11:20) Kala nudu ndraono Gizaraʼeli börö me lö faduhu dödöra wa Yehowa zanolo nono mbanuania.

5. Hadia zi lö faduhu dödö Razo Gahabi?

⁵ Tebeʼe ginötö khö Razo Gahabi ba worasoi faʼabölö Lowalangi. Imane Elia khönia: ”Na so namo mbanua ba he teu ba ndröfi andre, ha meʼuga fakhe, na tenga yaʼo zangumaʼö!” (I Razo 17:1) Alua daʼa ha börö waʼabölö Lowalangi, hizaʼi, lö faduhu dödö Gahabi. Aefa daʼö, mangandrö Elia ba ifondro-ndrongo wangandrönia Yehowa, itorugö galitö moroi ba zorugo. Iʼila zalua andrö Ahabi. Idunö-dunö Elia khö Razo Gahabi, wa iheta Yehowa mbaŵa lökhö ba ibeʼe deu sabölö-bölö. (I Razo 18:22-45) Iʼila fefu Gahabi zalua andre, ba lö khönia nasa faʼafaduhu dödö. Hadia wamahaʼö khöda moroi ba duma-duma andre? Moguna so khöda wangodödögö enaʼö tarasoi waʼabölö Lowalangi ba waʼaurida.

LARASOI WAʼABÖLÖ YEHOWA

6, 7. (a) Hadia zi faduhu dödö niha Gibeona? (b) Hadia zi faduhu dödö Rakhaba sanandrösa ba waʼabölö Yehowa?

⁶ Faböʼö sibai niha Gibeona moroi ba niha si fasui yaʼira. Lalau fahuwu moroi na fasuwö ira khö ndraono Gizaraʼeli. Hadia Mbörö? Börö me larasoi waʼabölö Lowalangi ba no larongo fefu zi no ifalua. (Yosua 9:3, 9, 10) Faduhu dödö niha Gibeona wa fao Yehowa ba ndraono Gizaraʼeli.

⁷ Irasoi Rakhaba göi waʼabölö Yehowa. Hewaʼae tenga iraono Gizaraʼeli ia, hizaʼi, no irongo hewisa waʼabölö Yehowa me iʼefaʼö ndraono Gizaraʼeli moroi ba danö Miserai. Me so darua zamauze si möi khönia, imane Rakhaba khöra, ”uʼila, wa no ibeʼe khömi danö andre Yehowa.” Faduhu dödö Rakhaba wa tola iʼorifi ia Yehowa hegöi ösi nomonia. Mamati ia khö Yehowa hewaʼae teʼala waʼaurinia.​—Yosua 2:9-13; 4:23, 24.

8. Hezo laʼila waʼabölö Yehowa iraono Gizaraʼeli?

⁸ Tenga simane Razo Gahabi, faduhu dödö ndraono Gizaraʼeli wa Yehowa zanorugö alitö moroi ba zorugo ba wanema li fangandrö Gelia. Muʼao ira lamane: ”Yehowa Lowalangi! Yehowa Lowalangi!” (I Razo 18:39) Si ndruhu-ndruhu wa laʼila waʼabölö Yehowa.

9. Hewisa enaʼö taʼila waʼabölö Yehowa ba ginötö andre?

⁹ Me no taʼila duma-duma si sökhi ba si lö sökhi, so khöda waʼaboto ba dödö hadia geluaha ’wangiʼila Lowalangi’ mazui laʼila danga Lowalangi. Na no aboto ba dödöda waʼabölö Yehowa, no taʼila dangania moroi ba ’hörö dödöda.’ (Efeso 1:18) Daʼa zamarou tödöda enaʼö taʼoʼö niha si lö faröi khö Yehowa me föna hegöi ba ginötö iadaʼa, si no morasoi fanolo Yehowa ba waʼaurira. Hadia so dandra ba ginötö andre wa itolo Yehowa nono mbanuania?

TANDRA WAʼABÖLÖ LOWALANGI IADAʼA

10. Hadia dandra khöda wa lö faröi Yehowa wanolo nono mbanuania iadaʼa? (Faigi gambara ba ngaʼörö si 12.)

¹⁰ Oya dandra si no taʼila wa lö faröi Yehowa ba nono mbanuania iadaʼa. No asese tarongo khö ndra talifusöda wa ifondro-ndrongo Lowalangi wangandröra. (Zinunö 53:3) Duma-dumania, me möi manuriaigö ba mbanua side-ide ba Filipina, iʼila Allan ndra alawe sege-ege. Idunö-dunö Allan, ”Si hulö wongi, mangandrö ia enaʼö falukha khö ndra Samaduhuʼö Yehowa.” Me ono alawe ia no irai ifahaʼö ia ba Zura Niʼamoniʼö khö ndra Samaduhuʼö Yehowa, hizaʼi, me no mangowalu ia ba findra ba mbanua böʼö, lua-luania tebato wamahaʼö yaʼia ba Zura Niʼamoniʼö. Omuso dödönia me no ifondro-ndrongo Lowalangi wangandrönia. Lö irugi döfi aefa daʼö, tebayagö ia idanö.

11, 12. (a) Hewisa Yehowa wanolo nono mbanuania? (b) Tutunö hewisa Yehowa wanolonia dalifusöda ira alawe.

¹¹ Ato ba gotalua nono mbanua Yehowa zi no morasoi fanolo Yehowa ba wondröi amuata si lö sökhi, simane foroko, fangogunaʼö dalu-dalu si möi famakiko mboto, hegöi ba wamaigi gambara zohorö. So zamorege wombato amuata si lö sökhi, hizaʼi, itaria mangawuli furi. Me laʼandrö wanolo khö Yehowa, ibeʼe ”fahöna waʼabölö,” irege tola laböhöli gamuata si lö sökhi andrö.​—II Korindro 4:7; Zinunö 37:23, 24.

¹² Ibeʼe Yehowa wanolo khöu ba wanaögö abula dödö. Daʼa zalua khö Amy. Lafatenge ia ba mbanua side-ide si so ba Samudra Pasifik wamazökhi Nahia Gorahua Mbanua Lowalangi hegöi omo dalifusöda nifatenge ba wangombakha ba soi böʼö. Ba mbanua daʼö asese mate listrik, lö hadöi idanö, asese so molö. Baero daʼö, itörö-törö tödönia ndra satuania, ba toröi ia ba mbateʼe side-ide. Samuza inötö ihangöi dalifusöda ira alawe si fao khönia wohalöwö. Ifuli maniasa ia. Me mangawuli ia ba mbateʼe si lö fandru-fandru, iʼandrö wanolo khö Yehowa ba wangandrö. Lö ara aefa daʼö mohola wandru, ibaso mbuku Manuriaigö Famatörö Yehowa sanandrösa ba wisuda Gileadi. Duho nibasonia andrö tefaudu ba zi no alua khönia. Imane, ”urasoi samösa wa no fahuhuo khögu Yehowa ba zi bongi daʼö. Daʼa zameʼe khögu famarou tödö irege owölö-ölö ndraʼo ba halöwögu.”​—Zinunö 44:26, 27; Yesaya 41:10, 13.

13. Hadia dandra khöda wa lö faröi Yehowa ba wanolonia yaʼita weʼamöi manuriaigö?

¹³ Itolo Yehowa nono mbanuania ”ba wamaduhuʼö turia somuso dödö, ba ba wangaʼaroʼö yaʼia.” (Filifi 1:7) Na lö latehe halöwö fanuriaigö ira samatörö, taʼandrö wanolo khö ndra samatörö sabölö alawa. No möna ita si löʼö-löʼönia 268 kali, iʼotarai me döfi 2000, no 24 kali möna ita ba Mahkamah Eropa sanandrösa ba Hak Asasi Manusia. Si ndruhu-ndruhu wa lö hadöi niha si tola molawa faʼabölö Yehowa!​—Yesaya 54:17; baso Yesaya 59:1.

14. Hadia dandra tanö böʼö niʼokhögöda wa fao Yehowa ba nono mbanuania?

¹⁴ Fanuriaigö ba zi sagörö ulidanö no sambua dandra wanolo Yehowa ba nono mbanuania. (Mataiʼo 24:14; Halöwö Zinenge 1:8) Fahasara dödö ba zi sagörö ulidanö, tola alua ia börö wanolo Yehowa. No sahölö-höli dödöda daʼa! Niha si lö mamosumange Yehowa lamane wangumaʼö ”si ndruhu so Lowalangi ba dödömi.” (I Korindro 14:25) Oya dandra si no taʼila wa fao Yehowa ba nono mbanuania. (Baso Yesaya 66:14.) Hewisa ndraʼugö? Hadia no örasoi waʼabölö Yehowa ba waʼauriu?

HADIA ÖRASOI WAʼABÖLÖ YEHOWA BA WAʼAURIU?

15. Hana wa itaria lö tarasoi waʼabölö Yehowa ba waʼaurida?

¹⁵ Itaria lö tarasoi waʼabölö Yehowa ba waʼaurida. Hadia mbörö? Na göna khöda gabula dödö, itaria taʼolifugö wanolo Yehowa si no irai tatema. No irai alua daʼa khö Gelia. Elia niha si lö ataʼu, hizaʼi, me edöna ibunu ia Izebela, ataʼu sibai ia. Ba zi sabata, olifu ia wanolo Yehowa si no irai itema. Sura Niʼamoniʼö zangombakha wa omasi ia mate. (I Razo 19:1-4) Hezo tola isöndra wanolo ba falöʼataʼu? Moguna iʼandrö wanolo moroi khö Yehowa!​—I Razo19:14-18.

16. Hewisa worasoida faʼabölö Yehowa na göna ita abula dödö?

¹⁶ So waʼaombö-aombö dödö khö Yobi me göna ia abula dödö irege lö aboto ba dödönia hewisa wanolo Yehowa. (Yobi 42:3-6) Simanö göi ita, itarai lö tarasoi waʼabölö Yehowa börö gabula dödö salua khöda. Hadia zi tola manolo yaʼita enaʼö tola tarasoi waʼabölö Yehowa ba waʼaurida? Moguna taʼangerönusi mene-mene niwaʼö Zura Niʼamoniʼö sanandrösa ba zalua khöda. Na tafalua daʼö, tarasoi waʼabölö Yehowa ba tamane wangumaʼö ”ha turiamö nirongogu mege, ba iyaʼe, ba no iʼilaʼö hörögu.”

17, 18. (a) Hewisa wa tola örasoi waʼabölö Yehowa ba waʼauriu? (b) Tutunö duma-duma hewisa Yehowa wanolo nono mbanuania ba ginötö andre.

¹⁷ Hewisa wa tola örasoi waʼabölö Yehowa ba waʼauriu? Datatutunö lima ngawalö duma-duma andre. Siʼoföna, no örasoi samösa wanolo Yehowa ba wanöndra si ndruhu. Si dua, me öfondro-ndrongo huhuo sebua ba gangowuloa, imane tödöu, ”moguna sibai khögu wamahaʼö andre.” Si tölu, no örasoi samösa hewisa wanolo Yehowa ba ginötö tefondro-ndrongo wangandröʼu. Si öfa, te so ba dödöu wondrouʼö halöwö khö Lowalangi ba örasoi samösa wanolonia yaʼugö ba gohitö dödöu andrö. Si lima, tola manö öheta ndraʼugö ba halöwöu börö me tobali daha-tahau weʼamöi ba gangowuloa, ba örasoi samösa hadia zi no ifabuʼu khöu, ”löʼö manö faröido khöu.” (Heberaiʼo 13:5) Tarasoi waʼabölö Yehowa ba waʼaurida na taʼokhögö wahuwusa si sökhi khö Yehowa.

¹⁸ Imane Sarah moroi ba Kenya: ”Uʼohe ba wangandrö niha nifahaʼögu si lö mameʼe tödönia na mafahaʼö ndraʼaga ba Zura Niʼamoniʼö. Umane khö Yehowa, hewisa na uböhöli wamahaʼö yaʼia ba Zura Niʼamoniʼö. Me no aefa ulau mangandrö, moli hapegu. Niha nifahaʼögu no mege imane wa omasi möi ia ba gangowuloa! Tokea ndraʼö!” Na taʼandrö wanolo khö Yehowa, tarasoi samösa wanolonia. Talifusöda Rhonna si toroi ba Asia imane, ”Moguna tafahaʼö ita hewisa Yehowa ba wanolonia yaʼita. Na tafalua ia, ahöli-höli dödöda börö me taʼila wa so so ba dödönia ita!”

19. Hadia nifaluada nasa enaʼö aboto ba dödöda Lowalangi?

¹⁹ Imane Yesu ”Yaʼahowu zohau-hau tödö, me yaʼira zangila Lowalangi dania.” (Mataiʼo 5:8) Hewisa enaʼö so khöda dödö sohau-hau? Tarorogö wangera-ngera si sökhi ba tabato wamalua amuata si lö sökhi. (Baso II Korindro 4:2.) Ba duho daʼa, no tafahaʼö ita enaʼö aboto ba dödöda waʼabölö Yehowa, ba taʼodödögö wahuwusa si sökhi khönia. Ba duho aefa daʼa, tatutunö hewisa wamati möi fanoloda ba worasoi faʼabölö Yehowa ba waʼaurida.