HADIA ÖʼILA?

Me götö Zura Niʼamoniʼö, hewisa wamazökhi ba fangogunaʼö gölu-gölu zura?

Itutunö khöda Injil Luka me ibokai Yesu gölu-gölu zura Yesaya, ibaso, ba aefa daʼö ifuli igaölögö. Itutunö Yohane ba gafuriata Injilnia wa lö monaha ba gölu-gölu zura na isura fefu dandra sahöli-höli dödö nifalua Yesu.​—Luka 4:16-20; Yohane 20:30; 21:25.a

Hewisa wamazökhi gölu-gölu zura? Lahalö sagörö guli gurifo, mazui uli geu papirus lafahare tobali sambua. Aefa daʼö, lagaölögö ba zi sara ono geu ba labeʼe tanö bakha zi no musura. No teföföʼö ba wanura ösinia, laʼadogo-dogöiʼö iʼotarai moroi yawa numalö misitou. Na ebolo atö gölu-gölu zura andrö, lagaölögö ia ba zi dua rozi ono geu. Na so zombaso ibokai gölu-gölu zura andrö, faoma igogohe nono geu andrö ba wangalui ayati somasi ibaso.

Imane The Anchor Bible Dictionary, ”Sambua gölu-gölu (si toʼölönia faʼanau so mato 10 mete) tola tefaʼanö nösi zi sambua buku, ba si bagania na lagaölögö no ide-ide.” Duma-dumania, ba wanura Injil Luka muʼogunaʼö gölu-gölu andre mato 9 mete amatonga. Itaria, lataba mbalö faföfö gölu-gölu zura andre ba laʼalösöiʼö faoma kara, aefa daʼö labeʼe laʼa-laʼania.

Haniha manö nifotöi ”gafalo gere” ba Gamabuʼula Li si Bohou?

Me no teʼasogö gere ba ndraono Gizaraʼeli, ha samösa ndra matua si tobali ere sebua si no mufataro sandrohu faʼaurinia. (IV Moze 35:25) Aʼaroni zi oföna mutuyu ba halöwö andrö. Si toʼolönia faʼasalawa ere sebua niʼokhögö nama itohugö ononia siaʼa. (II Moze 29:9) Ato ndra matua moroi ba ngaʼötö Aʼaroni zi tobali ere, hizaʼi lö ato zi tobali ere sebua.

Me so ndraono Gizaraʼeli barö mbawa wamatörö soi böʼö, ira samatörö si tenga iraono Gizaraʼeli, lafataro ba laʼefasi gere sebua si so ba Yehuda moloʼö somasi-masi dödöra. Na tafaigi, niha sawena mufataro andre asese mufili moroi ba ngaʼötö si tehengö ba satonia moroi ba ngaʼötö Aʼaroni. Ngawua wehede ”gafalo gere” eluahania niha si so tanö föna ba waʼaʼere. Tola manö ira andrö satua moroi ba zi 24 ngawawa gere, niha si tehöngö moroi ba nomo gere sebua, ba ere si no irai laʼefasi simane Hanasi.​—I Ngaʼötö 24:1-19; Mataiʼo 2:4; Mareko 8:31; Halöwö Zinenge 4:6.