Angilata Sanandrösa Khöra si So ba Zorugo

YEHOWA FONDREGE ZALAWA

”Ba iʼanemaʼö aheta nosogu, ba hiza dadaoma nifedadao ba zorugo, ba ba dadaoma andrö, ba so zidadao, ba sidadao andrö, ba no hulö weremata yasibi ba hulö weremata aki andrö, wamaigigu, ba no tefasui dumi dadaoma andrö, hulö zumurudi, wamaigigu.”—Famaʼeleʼö 4:2, 3.

”Ba si tefasui yaʼia, ba no haga: simane dumi, niʼilada ba lawuo na luo moteu, simanö wamaigida haga andrö, fasui. Simanö waʼoroma lakhömi Yehowa andrö wamaigigu.”—Hezekieli 1:27, 28.

Ba gangilata nitema zinenge sotöi Yohane hegöi samaʼeleʼö Hezekieli, muʼamaedolagö waʼebua Lakhömi Yehowa, Lowalangi Fondrege Zalawa, si tola takhalaigö simane weremata si sökhi, dumi, hegöi dadaomania solakhömi. Ba daʼa taʼila, wa muʼamaedolagö Yehowa andrö no faʼasökhi sahöli-höli dödö, si möi faʼomuso dödö ba fangahono dödö.

Tefaudu göi duma-duma sanandrösa khö Lowalangi andre simane nisura zanura sinunö, ”Me no sebua Yehowa, ba me no sinangea nisuno sibai, niʼataʼufi, yawa Lowalangi böʼö, fefu. Lowalangi niha baero andrö sa, ba adu; ba Yehowa, ba no samazökhi banua si yawa. Lakhömi ba faʼamoadu fönania; faʼabölö ba lakhömi ba niʼamoniʼö andrö khönia.”—Zinunö 96:4-6.

Hewaʼae no Fondrege Zalawa Yehowa, hizaʼi ikaoni ita enaʼö tahatöʼö ita khönia ba wangandrö ba ifaduhuʼö khöda wa hasambalö ifondro-ndrongo gangandröwada. (Zinunö 65:3) Iʼomasiʼö ba iʼameʼegö tödö ita Lowalangi, simane nisura zinenge sotöi Yohane, ”Me no faʼomasi Lowalangi.”—I Yohane 4:8.

FAO YESU KHÖ LOWALANGI

”[Sitefano nifahaʼö Keriso], ba no fahöna khönia Geheha niʼamoniʼö, ba ifaöga hörönia ba zorugo, ba iʼila lakhömi Lowalangi, awö Yesu, si so ba gambölö Lowalangi; ba imane: Hiza, teboka zorugo, uʼila ba so ba gambölö Lowalangi Nono Niha.”—Halöwö Zinenge 7:55, 56.

Fatua lö itema gangilata daʼa Sitefano, no labunu Yesu börö wondrönisi moroi ba niha sedöna mamunu Sitefano yaʼia daʼö ira sondröniaʼö Yahudi. Angilata daʼa zangaʼaroʼö wa no tesusugi Yesu ba tefolakhömi ia. Sanandrösa ba daʼö, isura sinenge sotöi Faulo, ”[Yehowa] isusugi [Yesu] moroi ba ngai zi mate, ba me ifedadao ba gambölönia, ba zorugo, alawa yawa zamatörö andrö fefu, ba yawa zalawa andrö, ba yawa zabölö, ba yawa zoʼaya andrö, ba yawa zi so töi fefu, nitötöi, tenga ha ba götö danö daʼe, ba götö dania göi.”—Efeso 1:20, 21.

Baero wanutunö dadaoma Yesu solakhömi, itutunö göi Taromali Lowalangi wa hulö simane Yehowa, iʼameʼegö tödö sibai niha. Me so ia ba gulidanö, ifadöhö niha sofökhö, niha si cacat, ba isusugi niha si no mate. Faʼamate Yesu zangoromaʼö wa ebua sibai waʼomasinia khö Lowalangi hegöi ba niha. (Efeso 2:4, 5) Mudadao Yesu ba gambölö Lowalangi, ba lö aratö ifalua halöwö si tola mangaʼasogö howu-howu sebua ba niha si lö faröi.

LALULUI HALÖWÖ LOWALANGI IRA MALAʼIKA

”[Samaʼeleʼö Danieli] ufaigi-faigi, irugi tefedadao ba daʼö dadaoma zalawa ba irege dumadao Zatua [Yehowa] andrö, si no arara. . . . Mehönö wa hönö ngoni-ngoninia, ba mewulu ngahönö wa fulu ngahönö zi so ba ngainia.”—Danieli 7:9, 10.

Ba gangilata ba zorugo andre, ato malaʼika niʼila Danieli tenga ha samösa. Sambua faʼahöli-höli dödö gangilata andrö! Malaʼika andrö ba no soboto eheha solakhömi, atua-tua ba abölö. Moroi ba gotaluara so serafi ba kerubi. Töra 250 kali mutötöi malaʼika ba Zura Niʼamoniʼö.

Malaʼika andrö tenga niha si no irai auri ba gulidanö. Ara fatua lö iwöwöi niha, no iwöwöi malaʼika Lowalangi. Me mufazökhi gulidanö, lafaigi-faigi ira malaʼika ba omuso göi dödöra.—Yobi 38:4-7.

Sambua lala nifalua malaʼika ba wolului halöwö Lowalangi yaʼia daʼö lafaogö ira ba halöwö fondrege zebua si so ba gulidanö andre yaʼia daʼö manuriaigö turia somuso dödö sanandrösa ba Mbanua Lowalangi. (Mataiʼo 24:14) Oroma wa fao ira ba halöwö andre moroi ba nisura zinenge sotöi Yohane, ”Ba uʼila malaʼika böʼö, sihombo, ba dalu mbanua si yawa, si so turia somuso dödö si lö aetu, ba wanuriaigö ba zi so ba gulidanö, ba ngawalö soi fefu, ba ba ngawalö niwa, ba ba ngawalö li, ba ngawalö mado fefu.” (Famaʼeleʼö 14:6) Hewaʼae lö fahuhuo malaʼika ba niha simane ba götö föna, hizaʼi latolo ndra sanuriaigö turia somuso dödö ba niha si sökhi tödö.

ZUTA NIHA NIFAELUNGU ZATANA

”Ba tesao wanuwö ba mbanua si yawa: Mikhaeli andrö ba malaʼikania, ba fasuwö ba naga andrö. Ba fasuwö naga andrö, awö malaʼikania. Ba tebai ira, ba lö nahara saʼae ba mbanua si yawa. Ba tetiboʼö naga sebua andrö, ulö satua andrö, sotöi Afökha ba Satana, samaelungu niha ba gulidanö, fefu; tetiboʼö si tou ia ba danö ba tetiboʼö göi malaʼikania andrö, awönia.”—Famaʼeleʼö 12:7-9.

Itaria lö faʼomuso dödö ba zorugo. Iʼotarai ba wamobörö waö-waö waʼauri niha, so samösa moroi ba gotalua malaʼika, zomasi nifosumange, ba mamadaö ia khö Lowalangi, ba tobali ia Satana eluahania ”Solawa”. Fao göi ösa khönia ndra malaʼika tanö böʼö ba lafotöi ira bekhu. Sindruhu-ndruhu lö sökhi ira, lalau mamadaö khö Lowalangi ba ladönisi niha sato wefao ba wolawa fanuturu lala moroi khö Yehowa sebua faʼomasi.

Satana hegöi bekhu si fao khönia lö sökhi ba amuʼi. Udu niha gulidanö ira fefu, ba oya laʼasogö wamakao ba niha. Duma-dumania, ibunu fefu gurifö hegöi zawuyu niʼokhögö niha samati sotöi Yobi. Me no awai daʼö, ibunu göi dafulu ndraono Yobi si so ba nomo ba zi ”sambua angi sabölö”. Aefa daʼö, ibözi Yobi Satana faoma ”bio, iʼotarai narö kahe, numalö ba galizuzu”.—Yobi 1:7-19; 2:7.

Lö aratö tehori Zatana. Iʼotarai me latiboʼö ia ba gulidanö, ba ”iʼila, lö ara nitehe khönia”. (Famaʼeleʼö 12:12) Hasambalö nihuku Zatana, ba no turia somuso dödö daʼö!

YAʼIRA SIʼONARAI GULIDANÖ

”Ba me no [Yesu] öhöli niha domö, khö Lowalangi, moroi ba ngawalö niwa fefu, ba moroi ba ngawalö li, ba moroi ba ngawalö mado, ba moroi ba ngawalö soi fefu, ba no öbaliʼö banua Lowalangida ba ere ira, ba salawa ira dania, ba gulidanö.”—Famaʼeleʼö 5:9, 10.

Simane Yesu si no mususugi moroi ba gulidanö enaʼö auri ba zorugo, simanö göi danö böʼö. Imane Yesu khö ndra sinengenia si lö faröi, ”Möido sa muhaogö naha khömi. Ba . . . mangawulido, ba uhalö ami khögu, enaʼö so ami göi ba zi so yaʼo.”—Yohane 14:2, 3.

Yaʼira si möi ba zorugo, so gohitö dödöra. Fao ira khö Yesu mamatörö Mbanua Lowalangi ba lafatörö gulidanö andre dania ba oya laʼasogö howu-howu ba niha gulidanö. Daʼa Wamatörö nitötöna Yesu enaʼö laʼangandröi ira soloʼö khönia, ”He Ama khöma si so ba zorugo! Yateʼamoniʼö döiu. Yatobali banuau fefu niha. Yaʼitörö zomasi ndraʼugö, hulö ba zorugo, yasimanö göi ba gulidanö.”—Mataiʼo 6:9, 10.

HADIA NIFALUARA BA ZORUGO

”Ba [sinenge sotöi Yohane] urongo li sebua, moroi ba dadaoma andrö, imane: Hiza nose Lowalangi andrö ba niha, . . . ba iʼosi dania dawa hörö fefu, ba höröra, ba lö faʼamate saʼae, ba lö faʼabu dödö, ba lö fege-ege, ba lö faʼafökhö saʼae, me no numalö zi föföna andrö.”—Famaʼeleʼö 21:3, 4.

Angilata andre manandrösa ia ba Mbanua Lowalangi, nifatörö Yesu hegöi yaʼira nisusugi moroi ba gulidanö, ba lahori fefu gamatöröwa Zatana ba labaliʼö faradaiso gulidanö andre. Lö hadöi zi tobali börö wökhö ba famakao ba niha gulidanö. Ba lö hadöi faʼamate saʼae.

Hewisa niha si no mate si hauga miliar faʼato si lö tesusugi ba zorugo? Ba zi so föna, lasöndra waʼauri si lö aetu ba gulidanö Faradaiso.—Luka 23:43.