Famakao​—Hadia Hukuma moroi khö Lowalangi Daʼö?

AKELA-KELA GAHE GABERA LUZIA. Iʼotarai me ide-ide göna ia fökhö polio, fökhö salio fatöfa ba niha ba samakiko saraf ba mboto. Me 16 fakhe ndröfinia, imane khönia kafalonia, ”Andrö wa akela-kela ndraʼugö börö me ihuku ndraʼugö Lowalangi. Te lö öfondrondrongo li mamamö ba ölawa ia.” Mato hauga fakhe aefa daʼö, lö si taya nasa waʼafökhö dödö Luzia ba wehede andrö.

ME IʼILA DAMARIS GÖNA IA KANKER GUTO, imane bapania, ”Hadia zala nifaluau irege simane daʼa ndraʼugö? No öfalua horö sebua. Andrö wa ihuku ndraʼugö Lowalangi.” Itugu afökhö dödö Damaris ba wehede bapania andrö.

Iʼotarai me föna, ato niha sangumaʼö wa fökhö no hukuma moroi khö Lowalangi. Itutunö buku Manners and Customs of Bible Lands, me abad siföföna faduhu dödö niha wa ”mofökhö ita börö horö nifaluada mazui börö horö niha sahatö khöda”. Imane buku Medieval Medicine and the Plague, me Abad Pertengahan (500-1500 M) ”so niha si faduhu tödö wa iʼasogö wökhö Lowalangi ba wanguhuku niha samalua horö”. Duma-dumania, me abad si 14, zuta niha si mate ba Eropa börö wökhö. Hadia hukuma moroi khö Lowalangi daʼö ba niha si lö sökhi? Mazui, hadia sindruhu-ndruhu börö dungö salio fatöfa daʼö, simane si no muʼila ba penelitian medis? Te göi no irai manofu ndraʼugö, hadia iʼasogö wökhö Lowalangi ba wamakao niha samalua horö?a

ANGERAGÖ: Hana wa ifadöhö niha sofökhö Yesu na sindruhu moroi khö Lowalangi wökhö hegöi famakao? Hadia lö möi börö waʼaombö dödöda daʼa ba waʼatulö hegöi faʼasökhi Lowalangi? (Mataiʼo 4:23, 24) Lö irai mamadaö Yesu ba gangetula Lowalangi. Imane, ”Ufalua niwaʼö Nama khögu” ba ”lö uböhöli wamalua somasi ia”.​—Yohane 8:29; 14:31.

Itutunö Sura Niʼamoniʼö wa ”lö falimosa” khö Yehowa Lowalangi. (5 Moze 32:4) Duma-dumania, tatu tenga börö Lowalangi wa aekhu göfa si hombo irege ngaotu niha si mate ha börö me omasi ia ihuku zi samösa niha! Imane Aberahamo, enoni Lowalangi si lö faröi wa lö ’ifarahugö Lowalangi wamakiko si lö horö, awö zi so horö’. Moloʼö Aberahamo no aröu khö Lowalangi wolau simanö. (1 Moze 18:23, 25) Imane göi Sura Niʼamoniʼö, ”Lö ibilaʼö lala Lowalangi” mazui ”ifatörö zi lö atulö”.​—Yobi 34:10-12.

IFAHAʼÖ ITA SURA NIʼAMONIʼÖ SANANDRÖSA BA WAMAKAO

Famakao andrö tenga hukuma moroi khö Lowalangi börö horö si no tafalua. Ifatunö daʼa Yesu khö ndra nifahaʼönia me laʼila niha sauʼa iʼotarai me tumbu. ”Manofu khönia ndra nifahaʼönia, ’He Samahaʼö, haniha mbörö wa auʼa niha daʼa iʼotarai me tumbu? Hadia börö horönia mazui horö zatuania?’ Imane Yesu, ’Tenga börö horönia mazui horö zatuania, hizaʼi wa alua zimane daʼa enaʼö oroma ba niha halöwö Lowalangi.’”​—Yohane 9:1-3.

Tatu manö tokea ndra nifahaʼö Yesu me iwaʼö khöra wa auʼa niha daʼö tenga börö zala nifaluania mazui nifalua zatuania. Faehu sibai daʼa ba lala wangera-ngera si toʼölö laʼokhögö niha me luo daʼö. Tobali, tenga ha ifadöhö wökhö niha daʼö Yesu, hizaʼi iʼatulöʼö göi lala wangera-ngerara si fasala me lawaʼö wa famakao andrö no hukuma moroi khö Lowalangi. (Yohane 9:6, 7) Iadaʼa, terara dödö niha si göna fökhö sabölö-bölö börö me laʼila wa tenga moroi khö Lowalangi wamakao salua khöra.

Ayati Zura Niʼamoniʼö sondrara tödöda

• ”Tebai tetandraigö Lowalangi ba lö göi itandraigö niha ba zi lö sökhi.” (YAKOBO 1:13) Sindruhu sa wa lö ara tö muhori ngawalö ”zi lö sökhi” samakao niha ba zi hauga abad, simane fökhö, faʼabu dödö hegöi faʼamate.

• ”Ifadöhö fefu zofökhö” Yesu Keriso. (MATAIʼO 8:16) Me ifadöhö fefu niha si möi khönia Ono Lowalangi, daʼö zangoromaʼö hadia nifalua Wamatörö Lowalangi ba niha gulidanö maʼasagörö.

• ”Iʼosi [Lowalangi] daŵa hörö fefu ba höröra. Lö hadöi saʼae faʼamate, faʼabu dödö, fege-ege, mazui fökhö, me no numalö ziföföna andrö.”​—FAMAʼELEʼÖ 21:3-5.

HANIHA ZINANGEA TATAHIGÖ?

Hana wa oya sibai wamakao hegöi abula dödö? No hauga abad so wanofu daʼö. Na tenga Lowalangi, haniha mbörö? Tatutunö wanema linia ba duho aefa daʼa.