Irorogö Nono Mbanuania Yehowa

1. Hadia mbörö wa iʼandrö Yesu khö Yehowa enaʼö irorogö ndra niha nifahaʼönia?

BA MBONGI fatua lö mate ia, so sambua zi tohude niʼandrö Yesu khö Namania ba zorugo. Iʼandrö khö Yehowa enaʼö irorogö ndra nifahaʼönia. (Yoh. 17:15, 20) Tatu manö irorogö, iʼameʼegö tödö, ba ilumöʼö nono mbanuania Yehowa. Hizaʼi, aboto ba dödö Yesu wa hasambalö lataögö wanandraigö sebua moroi khö Zatana ira nifahaʼönia. Moguna khöra wanolo moroi khö Yehowa ba wolawa fanandraigö andrö.

2. Moloʼö Sinunö 33:18-20, hadia mbörö wa lö moguna ataʼu ita na göna ita fanandraigö?

² Ba gulidanö nifatörö Zatana andre, oya wanandraigö nitaögö niha Keriso sindruhu. Tola manö göna ita abula dödö sangaʼasogö khöda faʼafatö dödö mazui sanandraigö faʼalöfaröida khö Yehowa. Hizaʼi simane nitutunöda dania ba artikel daʼa, lö moguna ataʼu ita. Irorogö ita Yehowa, eluahania iʼila hadia zalua khöda ba no ihenaigö ia wanolo yaʼita. Datafaigi dombua duma-duma ba Zura Niʼamoniʼö, hewisa ’wondrorogö Yehowa niha samosumange yaʼia’.—Baso Zinunö 33:18-20.

BA GINÖTÖ TARASOI WA LÖ AWÖ-AWÖ

3. Ba ginötö hadia manö tarasoi wa hulö zi lö awö-awö ita?

³ Hewaʼae ato ndra talifusöda ba mbanua niha Keriso, hizaʼi tola manö tarasoi wa lö awö-awö. Duma-dumania, ira si bohou ebua tola manö larasoi wa hulö lö awö-awöra ba ginötö latutunö nifaduhusira tödö föna nawöra sekola mazui na findra ira ba gangowuloa si bohou. So göi ba gotaluada zabu tödö ba safatö tödö, ba lawaʼö tödöra wa lö hadöi sanolo yaʼira ba gabula dödö nirasoira. Itaria abua khöda wanutunö ba niha böʼö hadia nirasoida, börö me aombö dödöda na lö aboto ba dödöra nirasoida. Itaria tarasoi göi wa lö hadöi soʼameʼegö tödö yaʼita. Gofu hadia mbörö, hasambalö afatö dödöda ba aombö dödöda na tarasoi wa lö awö-awö. Lö irai omasi Yehowa na alua khöda zimane daʼö. Hana wa tola tawaʼö daʼö?

4. Hadia mbörö wa iwaʼö Elia samaʼeleʼö, ”Hatö yaʼo zauri”?

⁴ Angeragö duma-duma niha si lö faröi sotöi Elia. No möi ba hölu Gizebela ba wamunu Gelia, andrö wa moloi Gelia ba zi töra 40 hari. (1 Ra. 19:1-9) Ba gafuriata, me ibiniʼö ia ba dögi gara imane khö Yehowa, ’Hatö yaʼo zamaʼeleʼö sauri.’ (1 Ra. 19:10) Sindruhunia, so nasa zamaʼeleʼö tanö böʼö ba Gizaraʼeli. So 100 zamaʼeleʼö tanö böʼö niʼefaʼö Gobadia ba danga Gizebela. (1 Ra. 18:7, 13) Na simanö, hana wa hulö zi lö awö-awö Gelia ba worasoinia? Hadia iwaʼö tödönia wa no ahori mate fefu zamaʼeleʼö niʼefaʼö Gobadia andrö? Hadia iwaʼö tödönia wa lö hadöi samosumange Yehowa si fao khönia hewaʼae no oroma wa faya Mbaʼali andrö ba Hili Garimeli? Hadia irasoi wa lö hadöi soʼameʼegö tödö yaʼia ba samösa lö sangila hawaʼabölö-bölö deʼala salua khönia? Lö nizara-zara Zura Niʼamoniʼö wanutunö nirasoi Gelia me luo daʼö. Hizaʼi, sambua zi faduhu dödöda, aboto ba dödö Yehowa hadia mbörö wa hulö zi lö awö-awö Gelia ba worasoinia, ba iʼila hadia wanolo si tefaudu nibeʼenia khö Gelia.

5. Hadia nifalua Yehowa irege faduhu dödö Gelia wa tenga zi lö awö-awö ia?

⁵ Oya lala niʼogunaʼö Yehowa ba wanolo Elia. Ibeʼe wanofu khö Gelia enaʼö ifaehagö nösi dödönia. Dua kali manofu Yehowa, ”Hadia nifaluau ba daʼa?” (1 Ra. 19:9, 13) Ero itutunö nösi dödönia Elia, ihaogö ifondrondrongo daʼö Yehowa. Ifaduhuʼö Yehowa wa hasambalö fao ia khö Gelia, ba yaʼia andrö Lowalangi sebua faʼabölö. Ifaduhuʼö göi khö Gelia wa ato nasa ndraono Gizaraʼeli si lö faröi ba wamosumange Lowalangi sindruhu. (1 Ra. 19:11, 12, 18) Tatu terara sibai dödö Gelia me no itutunö nösi dödönia khö Yehowa, ba me iʼila wanema li nibeʼe Yehowa. Ibeʼe halöwö si tohude Yehowa khö Gelia. Iʼandrö khönia enaʼö ibayoini Hazaeli tobali razo ba Ziria, ibayoini Yehu tobali razo ba Gizaraʼeli, aefa daʼö ibayoini Gelisa tobali samaʼeleʼö. (1 Ra. 19:15, 16) Daʼö lala niʼogunaʼö Yehowa ba wanolo Elia enaʼö iʼosambuaʼö dödönia ba ngawalö zi sökhi. Ibeʼe göi khönia zi fahuwu sanolo yaʼia ba wamalua halöwönia, yaʼia daʼö Elisa. Hewisa göi enaʼö ötema wanolo moroi khö Yehowa na örasoi wa hulö zi lö awö-awö ndraʼugö?

6. Hadia zi tola öʼohe ba wangandrö ba ginötö örasoi wa hulö zi lö awö-awö ndraʼugö? (Sinunö 62:8)

⁶ Ikaoni ndraʼugö Yehowa enaʼö mangandrö ndraʼugö khönia. Iʼila hadia wanandraigö nitaögömö ba ibeʼe khöu waʼafaduhu dödö wa hasambalö ifondrondrongo wangandrömö. (1 Te. 5:17) Omuso dödö Yehowa ba wamondrondrongo fangandrö niha samosumange yaʼia. (Amd. 15:8) Hadia zi tola öʼohe ba wangandrö ba ginötö örasoi wa hulö zi lö awö-awö ndraʼugö? Tutunö nösi dödömö khö Yehowa simane nifalua Gelia. (Baso Zinunö 62:8.) Tutunö khönia hadia zaombö dödömö ba hadia nirasoimö. Andrö wanolo khö Yehowa ba wolawa fangera-ngera si fasala. Duma-dumania, na örasoi hulö zi lö awö-awö ndraʼugö mazui na so khöu waʼataʼu ba wanuriaigö ba zekola, andrö khö Yehowa enaʼö ibeʼe khöu waʼabarani. Andrö khönia enaʼö ibeʼe khöu waʼatua-tua ba wanutunö hadia nifaduhusimö tödö. (Luk. 21:14, 15) Na örasoi waʼide-ide dödö mazui faʼafatö dödö, andrö khö Yehowa enaʼö itolo ndraʼugö fahuhuo ba niha Keriso saro ba wamati. Andrö khö Yehowa enaʼö itolo niha nifaduhusimö tödö andrö irege aboto ba dödönia nirasoimö. Na ötutunö khö Yehowa nösi dödömö, öʼila wa no ifondrondrongo wangandrömö, ba ötema wanolo, lö saʼae örasoi wa lö awö-awö.

7. Hadia wamahaʼö si tola öhalö moroi ba duma-duma Mauricio?

⁷ Fefu ita no ibeʼe khöda halöwö si sökhi Yehowa. Faduhu dödöda wa inehegö ba iʼameʼegö tödö fefu halöwö nifaluada ba gangowuloa hegöi ba wanuriaigö. (Si. 110:3) Na oya taʼogunaʼö ginötö ba wamalua halöwö ba wamati, lö tarasoi wa hulö zi lö awö-awö ita. Angeragö duma-duma zi bohou ebua sotöi Mauricio.b Lö ara me no aefa tebayagö idanö ia, so samösa zi fahuwu khönia zondröi sindruhu. Imane Mauricio, ”Me faröi ia khö Yehowa, ibörögö mangiwa dödögu. Aombö dödögu hadia tola ufalua mbuʼusa ligu ba lö tebulö tobali ndraʼo ösi nomo Yehowa. Hulö zi lö awö-awö ndraʼo ba samösa lö sangila hadia nirasoigu.” Hadia zanolo Mauricio? Imane, ”Oya ubeʼe ginötögu ba wanuriaigö. Daʼa zanolo yaʼo enaʼö lö uʼosambuaʼö dödögu ba nirasoigu ba lö uʼera-era sibai niʼaombösigu tödö. Omuso dödögu ba lö saʼae urasoi wa lö awö-awö börö me falulu fohalöwö ndraʼo khö ndra talifusö tanö böʼö ba wanuriaigö.” Hewaʼae na lö faʼila bawa ita khö ndra talifusöda ba wanuriaigö, hizaʼi tola falulu fohalöwö ita khöra, taʼogunaʼö telefo mazui sura. Möi fangaroʼöda daʼö. Hadia nasa nifalua Mauricio? Imane, ”Oya göi uʼogunaʼö ginötögu ba wangai halöwö ba gangowuloa. Uhaogö wamaʼanö na labeʼe khögu halöwö ba sekolah teokratis ba ufaʼema daʼö soroi ba dödö. Halöwö daʼa zameʼe khögu faʼaro dödö wa iʼameʼegö tödö ndraʼo Yehowa hegöi ira talifusöda tanö böʼö.”

ITOLO ITA YEHOWA NA GÖNA ITA ABULA DÖDÖ

8. Hadia nirasoida na göna ita abula dödö sebua?

⁸ No taʼila wa hasambalö göna ita abula dödö ba ginötö safuria. (2 Ti. 3:1) Hewaʼae simanö, hasambalö tokea ita na alua khöda gabula dödö. Duma-dumania, te ba zi lö tadöna-döna göna ita fökhö sabölö-bölö, tosasa ita wangalui soguna, mazui mate niha niʼomasiʼöda. Na alua zimane daʼö, tola manö afatö dödöda ba taya waʼabölöda, mendrua manö na fatete-tete gabula dödö mazui ha samuza waʼaluania ba ginötö si fagölö. Hizaʼi, böi olifu ita wa hasambalö irorogö ita Yehowa, ba börö wanolo moroi khönia tola tataögö fefu gabula dödö andrö si fao faʼaro dödö.

9. Hadia manö gabula dödö salua khö Yobi? Tutunö.

⁹ Angeragö duma-duma niha si lö faröi sotöi Yobi. Fatete waʼalua khönia gabula dödö. Ba zi sahari lafatunö khönia wa no ahori mate fefu gurifönia ba no göi labunu zohalöwö khönia hegöi iraononia. (Yob. 1:13-19) Lö ara aefa daʼö me lö nasa si taya waʼabu dödönia, göna Yobi fökhö sabölö-bölö sogoro niha. (Yob. 2:7) Börö zi lö sökhi salua khönia andrö wa imane Yobi, ”Fatuwu khögu waʼaurigu. Omasido mate.”—Yob. 7:16.

10. Hadia nifalua Yehowa ba wanolo Yobi enaʼö anau gölönia? (Faigi gambara ba guli majalah.)

¹⁰ Irorogö Yobi Yehowa. Börö me iʼomasiʼö Yobi, ibeʼe Yehowa zoguna khönia enaʼö tola anau gölönia wanaögö abula dödö. Fahuhuo Yehowa khö Yobi, ifasugi ba dödönia waʼatua-tua hegöi faʼomasi niforomaʼönia ba gomböila dangania. Oya itutunö sanandrösa ba gurifö sahöli-höli dödöda. (Yob. 38:1, 2; 39:9, 13, 19, 27; 40:15; 41:1, 2) Iʼogunaʼö göi nono matua si lö faröi sotöi Elihu ba wangaʼaroʼö hegöi ba wondrara tödö Yobi. Ifaduhuʼö khönia Elihu wa lö tebulö ifahowuʼö Yehowa niha sanau ölö ba wamosumange yaʼia. Hizaʼi, ifarou göi Gelihu Yehowa ba wameʼe mene-mene safönu faʼomasi khö Yobi. Itolo Yobi enaʼö lö iʼosambuaʼö dödönia ba gabula dödö salua khönia. Ifasugi ba dödö Yobi wa alawa nasa Yehowa moroi ba niha gulidanö börö me Yehowa andrö Somböi banua si yawa awö danö. (Yob. 37:14) Ibeʼe göi Yehowa halöwö khö Yobi. Iʼandrö khönia enaʼö mangandrö ia salahi zi datölu si fahuwu khönia si no mamalua sala. (Yob. 42:8-10) Iadaʼa, hewisa Yehowa wanolonia yaʼita na alua khöda gabula dödö?

11. Hadia ayati si möi fondrara dödöda na göna ita abula dödö?

¹¹ Iadaʼa, lö fahuhuo khöda Yehowa simane nifaluania khö Yobi. Hizaʼi, iʼogunaʼö Daromalinia Sura Niʼamoniʼö ba wahuhuosa khöda. (Rom. 15:4) Ibeʼe khöda dötönafö ba zi so miföna ba wondrara tödöda. Angeragö hadia manö ayati si tobali fondrara dödöda na alua khöda gabula dödö. Duma-dumania, ifaduhuʼö khöda Yehowa wa lö hadöi si tola ’mamabali yaʼita moroi ba waʼomasinia’ farahu ba daʼö gabula dödö sebua. (Rom. 8:38, 39) Ifaduhuʼö göi khöda wa ”ahatö [ia] ba niha soʼangaröfili yaʼia” ba wangandrö. (Si. 145:18) Itutunö khöda Yehowa na sindruhu-ndruhu taʼodaligö ia hasambalö anau gölöda wanaögö abula dödö ba tarasoi waʼomuso dödö hewaʼae göna ita fanandraigö. (1 Ko. 10:13; Yak. 1:2, 12) Ifasugi göi ba dödöda Taromali Lowalangi wa abula dödö salua khöda andrö ha ba zi lö arara, hizaʼi howu-howu nihenaigö Yehowa khöda tarasoi ia sagötö faʼara. (2 Ko. 4:16-18) Ifabuʼu göi khöda Yehowa wa hasambalö ihori fefu zangaʼasogö abula dödö, yaʼia daʼö Afökha Satana hegöi fefu zoloʼö khönia. (Si. 37:10) Hadia so ayati Zura Niʼamoniʼö si no ötanö ba dödöu sanolo yaʼugö enaʼö anau gölöu wanaögö abula dödö salua ba zi so miföna?

12. Enaʼö anau gölöda, hadia zomasi Yehowa enaʼö tafalua?

¹² Iʼandrö khöda Yehowa enaʼö tabeʼe ginötöda ba wamahaʼö yaʼita ba Zura Niʼamoniʼö ba tahaogö taʼangerönusi zi no tabaso. Na tafalua hadia zi no tafahaʼö yaʼita, itugu aro wamatida ba itugu ahatö ita khö Namada si so ba zorugo. Buania, itugu anau gölöda wanaögö abula dödö. Ibeʼe göi khöda geheha niʼamoniʼö Yehowa na taʼodaligö Daromalinia. Eheha niʼamoniʼö andrö zameʼe khöda ’faʼabölö sahöli-höli dödö’ ba wanaögö abula dödö.—2 Ko. 4:7-10.

13. Hewisa wa tobali fanolo khöda gö ba wamati nihenaigö ”zawuyu si lö faröi ba satua-tua”?

¹³ Börö wanolo moroi khö Yehowa, fahöna gö ba wamati nihenaigö ”zawuyu si lö faröi ba satua-tua” simane artikel, video hegöi musik sanolo yaʼita ba wangaʼaroʼö famati hegöi enaʼö itugu ahatö ita khö Yehowa. (Mat. 24:45) Moguna taʼogunaʼö fefu gö ba wamati andrö. Itutunö si samösa talifusöda ira alawe ba Amerika Serikat wa iʼandrö sibai saohagölö ba gö wamati. Imane, ”Sagötö zi 40 fakhe mangai halöwö ndraʼo khö Yehowa, asese tetandraigö waʼalöfaröigu.” Oya gabula dödö sebua salua khönia, duma-dumania mate kakenia me itandru ia solohe moto si no mabu, mate göi zatuania börö wökhö sabölö-bölö ba dua kali göna ia kanker. Hadia zanolo yaʼia irege anau gölönia? Imane wangumaʼö, ”Lö tebulö irorogö ndraʼo Yehowa. Ö ba wamati nihenaigö ndra sawuyu si lö faröi ba satua-tua zanolo yaʼo irege anau gölögu. Börö daʼö, urasoi niwaʼö Yobi me imane, ’Irege aetu nosogu, ba lö uböhöli waʼalöfaröigu!’”—Yob. 27:5.

14. Hewisa wangogunaʼö Yehowa ira talifusöda ba wameʼe khöda famarou dödö na göna ita abula dödö? (1 Tesalonika 4:9)

¹⁴ No ifahaʼö nono mbanuania Yehowa ba wangomasiʼö hegöi ba wondrara dödö nawöra zamösana na göna ira abula dödö sebua. (2 Ko. 1:3, 4; baso 1 Tesalonika 4:9.) Simane nifalua Gelihu, omasi sibai göi latolo ita ira talifusöda si sara lala wamati enaʼö lö faröi ita na alua khöda gabula dödö. (Hal. 14:22) Angeragö atö zalua khö Diane. Me göna fökhö sabölö-bölö woʼomonia, lafarou dödönia ira talifusö si so ba gangowuloa ba latolo ia enaʼö aro ba wamati. Imane, ”Abua sibai daʼa. Hizaʼi, marasoi waʼabölö hegöi faʼomasi Yehowa sagötö mbaŵa waʼatosasa andrö. Latolo ndraʼaga ira talifusö si so ba gangowuloa. Laʼondrasi ndraʼaga ba nomo, latelefo ba latalagui ndraʼaga irege anau gölöma. Börö me lö uʼila uʼohe moto, laʼalui lala ira talifusö enaʼö tola möido ba gangowuloa hegöi manuriaigö.” Omuso sibai dödöda me taʼokhögö ndra talifusö sangomasiʼö yaʼita!

ANDRÖ SAOHAGÖLÖ WAʼOMASI NIFOROMAʼÖ YEHOWA

15. Hadia zangaʼaroʼö tödöda wa hasambalö anau gölöda wanaögö abula dödö?

¹⁵ Fefu ita hasambalö alua khöda gabula dödö. Hewaʼae simanö, simane si no tatutunö tenga ha yaʼita zanaögö daʼö. Simane ama sebua faʼomasi, hasambalö irorogö ita Yehowa. Ahatö ia khöda, ifondrondrongo na taʼandrö khönia wanolo, ba omasi ia itolo ita. (Yes. 43:2) Faduhu dödöda wa hasambalö anau gölöda wanaögö abula dödö börö me no ihenaigö fefu zoguna khöda irege tola anau gölöda. No ibeʼe khöda mbuala fangandrö, Sura Niʼamoniʼö, ö ba wamati si fahöna hegöi faʼafatalifusöta safönu faʼomasi sanolo yaʼita ba ginötö si tefaudu.

16. Hewisa enaʼö lö tebulö irorogö ita Yehowa?

¹⁶ Taʼandrö sibai saohagölö me lö tebulö irorogö ita Amada si so ba zorugo! ”Börö ia wa omuso dödöda.” (Si. 33:21) No taforomaʼö wangandrö saohagölö na taʼogunaʼö fefu zi no ihenaigö Yehowa ba wanolo yaʼita. Moguna göi so nifaluada. Eluahania, böi tebulö tafalua zabölö sökhi ba woloʼö li Yehowa ba tafalua göi zatulö, irege irorogö ita sagötö faʼara!—1 Fe. 3:12.