Famahaʼö moroi ba Wehede Yakobo Safuria—Faosatö 2

1. Hadia dania nitutunöda ba artikel daʼa?

NO OWULO ndraono Yakobo ba zinga namara ba wamondrondrongo fehedenia safuria nifaʼemania khöra zamösana. Simane si no tatutunö ba artikel silalö, fehede Yakobo khö Rubeno, Simeoni, Lewi hegöi Yehuda, te tenga simane nidöna-dönara. Daʼö mbörö wa omasi göi ira laʼila hadia nasa niwaʼö Yakobo khö ndraononia si dawalu tanö böʼö. Datatutunö hadia wamahaʼö si tola tahalö moroi ba wehede Yakobo khö Zebuloni, Isasari, Dano, Gado, Aseri, Nafetali, Yosefo hegöi Beniami.a

SEBULONI

2. Hadia niwaʼö Yakobo khö Zebuloni, ba hewisa waʼaluania daʼö? (1 Moze 49:13; faigi göi kotak.)

² Baso 1 Moze 49:13. Iwaʼö Yakobo wa mado Zebuloni dania toröi ira ba zinga nasi tanö yöu Danö Amabuʼula. Töra 200 fakhe aefa daʼö, latema danö ondröita ira mado Zebuloni ba gotalua Nasi Gineroti (Asi Galilaia) hegöi Asi Sebolo (Asi Mediterania). Sindruhu sa, tenga sibai gamaudu ba zinga nasi danö gondröita nitemara. Hewaʼae simanö, lö tebulö lasöndra waʼomuso dödö. Hadia mbörö? Börö ba gotalua nasi si dombua andrö so mbanuara, aoha khöra ba wamalua fogale. Te daʼö geluaha moroi ba wamaʼeleʼö nifaʼema Moze andre, ”Omusoiʼö dödöu ba döröwamö misa ba wogale, yaʼugö Sebuloni.”—5 Mo. 33:18.

3. Hewisa enaʼö ahono dödöda ba zi no so?

³ Hadia wamahaʼönia khöda? Gofu hezo toröi ita ba gofu hadia zalua khöda, tola tarasoi waʼomuso dödö. Börö daʼö, moguna ahono dödöda ba zi no taʼokhögö. (Si. 16:6; 24:5) Hizaʼi, itaria abua khöda wamalua daʼö börö me abölö taʼosambuaʼö dödöda ba ngawalö zi lö taʼokhögö. Börö daʼö, forege enaʼö öʼosambuaʼö dödöu ba ngawalö zi sökhi salua ba waʼaurimö.—Gal. 6:4.

ISASARI

4. Hadia wehede Yakobo khö Gisasari, ba hewisa waʼaluania daʼö? (1 Moze 49:​14, 15; faigi göi kotak.)

⁴ Baso 1 Moze 49:​14, 15. Isuno nononia Isasari Yakobo börö me owölö-ölö ia wohalöwö. Ifaomagö Gisasari andrö hulö galide sabeʼe töla, sasese muʼogunaʼö ba wolohe noro sabua. Iwaʼö göi Yakobo wa itema dania danö si sökhi Isasari. Alua daʼö me latema danö gondröita ira mado Gisasari ba danö satabö sinanö ba ngai Nungo Nidanö Yoridano. (Yos. 19:22) Tatu manö laforege sibai wohalöwö ba wondrorogö tanöra. Hizaʼi, laforege göi ba wanolo niha böʼö. (1 Ra. 4:​7, 17) No lafaʼanö ira wanolo mado tanö böʼö ba wolawa udu. Duma-dumania, fao ira ba wanolo Sanguhuku sotöi Baraki hegöi Debora samaʼeleʼö ba wolawa Sisera.—Sangu. 5:15

5. Hadia wamahaʼö nihalöda moroi ba nifalua mado Gisasari?

⁵ Hadia wamahaʼönia khöda? Iʼameʼegö tödö Yehowa wamorege nifaluada ba wamosumange yaʼia, simane foʼameʼegönia tödö nifalua mado Gisasari. (Sango. 2:24) Duma-dumania, nehegö wamorege nifalua ndra talifusöda satua sokubaloi ba wondrorogö banua niha Keriso. (1 Ti. 3:1) Hewaʼae na tenga sindruhu-ndruhu fasuwö ira, hizaʼi laforege sibai wondrorogö ono mbanua Lowalangi enaʼö aro ira ba wamati. (1 Ko. 5:​1, 5; Yud. 17-23) Laforege göi wohalöwö ba wamaʼanö hegöi ba wamaʼema huhuo si möi fangaroʼö mbanua niha Keriso.—1 Ti. 5:17.

DANO

6. Hadia halöwö nitema mado Dano? (1 Moze 49:​17, 18; faigi göi kotak.)

⁶ Baso 1 Moze 49:​17, 18. Ifaomagö Dano andrö Yakobo hulö simane ulö sokalaisi urifö sabölö ebua moroi khönia, duma-dumania kudo niʼogunaʼö ba wasuwöta. No alua daʼö. Laforomaʼö waʼabarani ira mado Dano ba lö tebulö lafaʼanö ira ba wanuwö udu. Sagötö fofanöra ba Danö Amabuʼula, lalumöʼö ndraono Gizaraʼeli tanö böʼö, yaʼia me ”tobali ira saradadu si so tanö furi ngawawa maʼafefu”. (4 Mo. 10:25) Moguna sibai halöwö nifaluara andrö, hewaʼae lö oroma daʼö ba mado tanö böʼö.

7. Hewisa zinangeania wamaigida halöwö nitemada moroi khö Yehowa?

⁷ Hadia wamahaʼönia khöda? Hadia no irai fao ndraʼugö ba wamalua halöwö si lö laʼila niha sato, duma-dumania ba wangehaogö Nahia Gangowuloa, mazui tobali relawan ba gangowuloa sebua ba zi sambua wilayah hegöi regional? Na no irai öfalua daʼö, sökhi sibai! Törö tödöu wa inehegö Yehowa ba iʼameʼegö tödö fefu zi sökhi nifaluamö khönia. Mendrua manö, abölö omuso nasa dödönia na öfalua halöwö andrö börö me sindruhu-ndruhu öʼomasiʼö ia, tenga börö me omasiʼö nizuno-zuno.—Mat. 6:​1-4.

GADO

8. Hana wa aoha ba nudu ba wanuwö mado Gado? (1 Moze 49:19; faigi göi kotak.)

⁸ Baso 1 Moze 49:19. Ifaʼeleʼö Yakobo wa lasuwö dania mado Gado ira sorabu. Töra 200 fakhe aefa daʼö, latema danö ondröita ira mado Gado tanö ba gatumbukha Nungo Nidanö Yoridano, si faola ba mbanua nudu. Lua-luania, aoha ba nudu ba wanuwö yaʼira. Hewaʼae simanö, omasi ira toröi ba daʼö börö me tefaudu mbanua daʼö ba gurifö niʼurira. (4 Mo. 32:​1, 5) Ba daʼa taʼila wa barani sibai niha Gado. Hizaʼi, tenga ha daʼö. Faduhu göi dödöra wa hasambalö itolo ira Yehowa ba wondrorogö danö ondröita nibeʼe khöra moroi khö ndra sorabu. Sagötö zi hauga fakhe, möi göi ndra matua moroi ba mado Gado ba wanolo mado tanö böʼö ba wokalaisi niha si so ba Danö Amabuʼula tanö ba gaekhula Nungo Nidanö Yoridano. (4 Mo. 32:​16-19) Faduhu dödöra wa hasambalö ilumöʼö woʼomora Yehowa hegöi iraonora. Daʼö mbörö wa ifahowuʼö Yehowa waʼabarani hegöi famorege si no lafalua.—Yos. 22:​1-4.

9. Hadia mbuania na faduhu dödöda khö Yehowa?

⁹ Hadia wamahaʼönia khöda? Hewaʼae oya gabula dödö salua ba waʼaurida, lö tebulö tola tafosumange Yehowa na faduhu dödöda khönia. (Si. 37:3) Ato ndra talifusöda iadaʼa sanehegö inötöra, faʼabölöra hegöi okhötara ba wefao ba wamazökhi Nahia Gangowuloa hegöi tomosa organisasi tanö böʼö, mangai halöwö ba mbanua si lö ato sanuriaigö, mazui ba wamalua halöwö tanö böʼö. Omasi ira lafalua daʼö börö me faduhu dödöra wa hasambalö ibönökhi zoguna khöra Yehowa.—Si. 23:1.

ASERI

10. Hadia zi lö ifalua Aseri? (1 Moze 49:20; faigi göi kotak.)

¹⁰ Baso 1 Moze 49:20. Ifaʼeleʼö Yakobo wa tobali dania banua si kayo mado Gaseri. Sindruhu wa daʼö zalua. Oya danö satabö sinanö ba Gizaraʼeli si farahu tobali tanö ondröita ba mado Gaseri. (5 Mo. 33:24) Banuara so ba ngai Nasi Sebolo, ba farahu ba daʼö labua göfa Zidona, si no tobali naha wogale. Hizaʼi, lö lafofanö niha Ganaʼana moroi ba daʼö. (Sangu. 1:​31, 32) Fondrönisi dödö moroi ba niha Ganaʼana hegöi faʼakayo mado Gaseri, te daʼö mbörö wa ambö mohiʼa dödöra ba wamosumange Yehowa. Duma-dumania, me iʼandrö Sanguhuku sotöi Baraki enaʼö tohare zaradadu ba wokalaisi niha Ganaʼana, lö omasi fao mado Gaseri. Lua-luania, lö laʼila hewisa me ifalua dandra sahöli-höli dödö Yehowa ba wameʼe faʼamöna ba mbanua ”sahatö ba Megido”. (Sangu. 5:​19-21) Tatu aila sibai göi ira me laʼanunöisi zinunö waʼamöna ira Baraki hegöi Debora, ba lamane, ”Modadao Gaseri ba zinga nasi.”—Sangu. 5:17.

11. Hana wa moguna tatimbagö lala wangera-ngera gulidanö daʼa sanandrösa ba gefe?

¹¹ Hadia wamahaʼönia khöda? Na omasi ita tabeʼe wondrege zi sökhi khö Yehowa, moguna tatimbagö lala wangera-ngera gulidanö daʼa sanandrösa ba gefe hegöi harato. (Amd. 18:11) Sindruhu wa moguna khöda gefe, hizaʼi böi abölö tohude daʼö moroi ba wamaluada halöwö khö Yehowa. (Sango. 7:12; Heb. 13:5) Lö omasi ita tahorigö ginötö hegöi faʼabölöda ba ngawalö zi lö moguna sibai khöda. Hizaʼi, omasi ita tabeʼe wondrege zi sökhi khö Yehowa iʼotarai iadaʼa. Aboto ba dödöda wa tola tarasoi waʼahono dödö sindruhu hegöi faʼauri si lö ametaʼuö, ha na no tarugi gulidanö si bohou.—Si. 4:8.

NAFETALI

12. Hewisa waʼalua wamaʼeleʼö Yakobo sanandrösa khö Nafetali? (1 Moze 49:21; faigi göi kotak.)

¹² 1 Moze 49:21. Ifaʼeleʼö Yakobo wa ’iwaʼö dania wehede si sökhi’ Nafetali. Tola manö daʼö geluahania lala wamaʼema Yesu famahaʼönia sagötö halöwö fanuriaigö nifaluania. No ara toröi Yesu ba mbanua Gafanauma, yaʼia daʼö sambua banua sebua si so ba mbanua Nafetali. Börö daʼö ba wamaigi Yesu, Kafanauma andrö hulö ”mbanuania” samösa. (Mat. 4:13; 9:1; Yoh. 7:46) Ifaʼeleʼö göi Yesaya wa laʼila dania ”haga sabölö tara” ira niha Zebuloni hegöi Nafetali. (Yes. 9:​1, 2) Simane si no tefaʼeleʼö, moroi ba wamahaʼönia iforomaʼö Yesu wa yaʼia andrö ”haga sindruhu sohagaini fefu niha gulidanö”.—Yoh. 1:9.

13. Hewisa enaʼö möi fangomuso dödö Yehowa wehededa?

¹³ Hadia wamahaʼönia khöda? Tohude sibai ba wamaigi Yehowa wehededa hegöi lala wamaehagöda daʼö. Na simanö, hewisa enaʼö tola taʼogunaʼö ”wehede si sökhi” sangomusoiʼö tödö Yehowa? Moguna tatörö zindruhu ba ginötö fahuhuo ita. (Si. 15:​1, 2) Moguna göi tafarou dödö niha böʼö, yaʼia na tasuno ira ba lö taʼalu-alui zalara mazui mukökö-kökö ita. (Ef. 4:29) Baero daʼö, moguna göi taforege enaʼö itugu onekhe ita ba wamörögö fahuhuosa ba wamalua fanuriagö.

YOSEFO

14. Hewisa waʼalua wamaʼeleʼö sanandrösa khö Yosefo? (1 Moze 49:​22, 26; faigi göi kotak.)

¹⁴ Baso 1 Moze 49:​22, 26. Tatu omuso sibai dödö Yakobo khö Yosefo. Yosefo andrö niha ’nifili Yehowa moroi ba gotalua ndra talifusönia’. Ifotöi ia Yakobo ”daha geu satabö”. Yakobo döla geu, ba Yosefo ndrahania. Yosefo andre ono siaʼa moroi khö woʼomo fondrege niʼomasiʼönia, yaʼia daʼö Rakhela. Ifaʼeleʼö Yakobo wa itema dania gondröita Yosefo dua kali winaeta. Sindruhunia menaʼö daʼö gondröita nitema Rubeno, börö me ono siaʼa ia moroi khö woʼomo Yakobo siföföna, yaʼia daʼö Lea. (1 Mo. 48:​5, 6; 1 Ng. 5:​1, 2) Hewisa waʼalua wamaʼeleʼö daʼö? Ngaʼötö moroi ba ndraono Yosefo, yaʼia daʼö Eferai hegöi Manase, tobali ira dombua mado ba Gizaraʼeli, ba faoma latema danö gondröita.—1 Mo. 49:25; Yos. 14:4.

15. Hadia nifalua Yosefo me alua khönia zi lö atulö?

¹⁵ Itutunö Yakobo wa ira samana ”lafana [Yosefo], ba lö aetu fatuwu ira khönia”. (1 Mo. 49:23) Ira samana andrö yaʼia daʼö ira gaʼa Yosefo safökhö tödö khönia, samalua khönia si lö atulö ba samakao faʼaurinia. Hadia nifalua Yosefo? Imane Yakobo, ”No ifaʼanö khönia [Yosefo] wana sinali, abölö ba alio dangania.” (1 Mo. 49:24) Hulö no ikalaisi waʼafökhö dödö ndra talifusönia faoma ono wana faʼahakhö dödö ba faʼasökhi dödö. Sindruhu-ndruhu ibologö dödönia khöra Yosefo. Lö afökhö dödönia khöra mazui itahigö Yehowa. Iʼodaligö Yehowa ba ginötö si lö sökhi salua khönia. (1 Mo. 47:​11, 12) Fefu zi lö atulö salua khönia, ibaliʼö daʼö fangaʼazökhinia. (Si. 105:​17-19) Buania, iʼogunaʼö ia Yehowa ba wamalua ngawalö zahöli-höli dödö.

16. Hewisa woloʼöda duma-duma Yosefo na alua khöda gabula dödö?

¹⁶ Hadia wamahaʼönia khöda? Böi tafandröndröu ita khö Yehowa hegöi khö ndra talifusöda ha börö gabula dödö salua khöda. Törö tödöu, tola manö itehegö göna ita famakao Yehowa si tobali famomaha khöda. (Heb. 12:7) Famomaha simane daʼö zanolo yaʼita ba wangokhögö hegöi ba wondrouʼö amuata niha Keriso, simane faʼahakhö dödö ba fangefaʼö sala. (Heb. 12:11) Na anau gölöda ba wanaögö abula dödö, hasambalö ifahowuʼö ita Yehowa, simane famahowuʼönia Yosefo.

BENIAMI

17. Hewisa waʼalua wamaʼeleʼö sanandrösa khö Mbeniami? (1 Moze 49:27; faigi göi kotak.)

¹⁷ Baso 1 Moze 49:27. No ifaʼeleʼö Yakobo wa sagabölö fasuwö dania mado Mbeniami simane asu gatua. (Sangu. 20:​15, 16; 1 Ng. 12:2) Hewisa waʼalua wamaʼeleʼö daʼö? Ba ’zihulö wongi’, mazui ba wamobörö waö-waö wamatörö Gizaraʼeli, razo siföföna yaʼia daʼö Saulo moroi ba mado Mbeniami. Sindruhu wa saradadu sabölö ia ba lö ataʼu ia ba wolawa niha Wilisiti. (1 Sa. 9:​15-17, 21) ”Ba zi bongi”, mazui ba gafuriata waö-waö wamatörö andrö, Ratu Esitera hegöi Perdana Menteri Morodokhai moroi ba mado Mbeniami, laʼefaʼö soira me edöna tehori ira ba Wamatörö Weresia.—Est. 2:​5-7; 8:3; 10:3.

18. Hewisa woloʼöda waʼalöfaröi mado Mbeniami?

¹⁸ Hadia wamahaʼönia khöda? Omuso sibai dödö mado Mbeniami me so samösa moroi ba gotaluara zi tobali razo ba Gizaraʼeli. Hizaʼi me ifili razo tanö böʼö Yehowa yaʼia daʼö Dawido moroi ba mado Yehuda, ba gafuriata latuhini gangetula andrö ira mado Mbeniami. (2 Sa. 3:​17-19) Ngafulu fakhe aefa daʼö, me mamadaö mado tanö böʼö ba wolawa mado Yehuda, lö faröi mado Mbeniami ba wotuhini mado Yehuda hegöi razo nifili Yehowa. (1 Ra. 11:​31, 32; 12:​19, 21) Simane mado Mbeniami, yalöfaröi göi ita ba wotuhini niha nifili Yehowa ba wondröniaʼö ono mbanuania iadaʼa.—1 Te. 5:12.

19. Hadia mbua nihalöda moroi ba wehede Yakobo safuria?

¹⁹ So mbuania khöda wamaʼeleʼö nifaʼema Yakobo ba wehedenia safuria. Me no tafahaʼö ita hewisa waʼalua wamaʼeleʼö andrö, itugu faduhu dödöda wa hasambalö alua fefu zi no ifaʼeleʼö Yehowa. Itugu aboto göi ba dödöda hadia zinangea tafalua ba wangomusoiʼö tödö Yehowa.