Tolo Niha Nifahaʼöu ba Zura Niʼamoniʼö Enaʼö Lafosumange Yehowa

1-2. (a) Hana wa so ösa niha nifahaʼö ba Zura Niʼamoniʼö saombö tödö tobali Samaduhuʼö Yehowa? (b) Hadia nitutunöda ba artikel daʼa?

HADIA no irai aombö dödömö ba wangai angetula tobali Samaduhuʼö Yehowa? Tola manö so khöu waʼataʼu alai na laʼuduni ndraʼugö ira awöu wohalöwö, si fahuwu khöu mazui ösi nomomö. Mazui, te no irai so ba wangera-ngeramö wa tebai öfaudugö waʼaurimö ba goi-goi Lowalangi. Na no irai örasoi zimane daʼö, tatu öʼila ötahö hewisa dödö niha nifahaʼömö ba Zura Niʼamoniʼö sangiwa tödö ba wangai angetula tobali Samaduhuʼö Yehowa.

² Iʼila Yesu wa fangera-ngera simane daʼö tola tobali fanaisi khö zi samösa niha irege lö tedou ia ba wamati. (Mat. 13:​20-22) Hizaʼi, lö tebulö itolo niha sangiwa tödö enaʼö lahalö gangetula tobali soloʼö khönia. Ifahaʼö ita hewisa lala ba wanolo niha simane daʼö enaʼö (1) laʼalui hadia zi tobali taha-taha irege lö tedou ira ba wamati, (2) itugu laʼomasiʼö Yehowa, (3) laʼofönaiʼö Yehowa ba waʼaurira, ba (4) tola lataögö na so wanandraigö. Börö daʼö, hewisa woloʼöda duma-duma Yesu ba ginötö taʼogunaʼö mbuku Lala ba Wanöndra Faʼohahau Dödö Sagötö Faʼara! ba wanolo niha nifahaʼöda enaʼö lahalö gangetula ba wamosumange Yehowa?

TOLO NIHA NIFAHAʼÖMÖ ENAʼÖ IʼILA HADIA ZANAHA YAʼIA BA WANGOROMAʼÖ FAʼATEDOU BA WAMATI

3. Hadia mbörö wa abua khö Nikodemo tobali soloʼö khö Yesu?

³ Mato önö waŵa me no ibörögö halöwö fanuriaigö Yesu ba gulidanö, no aboto ba dödö Nikodemo, samösa sondröniaʼö niha Yahudi, wa Yesu andrö nifatenge Lowalangi. (Yoh. 3:​1, 2) Hizaʼi, ibiniʼö ia ba wamalukhaisi Yesu börö me ataʼu ia khö ndra niha Yahudi. (Yoh. 7:13; 12:42) Abua khönia tobali soloʼö khö Yesu. Te ataʼu ia na taya dadaoma mazui okhötania.a

4. Hadia nifalua Yesu ba wanolo Nikodemo enaʼö iʼila hadia niʼandrö Lowalangi khönia?

⁴ No iʼila Nikodemo Goroisa Moze, hizaʼi moguna mutolo ia enaʼö aboto ba dödönia hadia niʼandrö Yehowa enaʼö ifalua. Hewisa wanolo Yesu yaʼia? Itehegö ginötönia Yesu ba wahuhuosa khö Nikodemo hewaʼae no bongi. Ihaogö wanutunö khönia Yesu wa moguna ifalalini gera-erania, tebayagö ia idanö ba iforomaʼö wa mamati ia khö Nono Lowalangi na omasi ia tobali nifahaʼö.—Yoh. 3:​5, 14-21.

5. Hadia zi tola tafalua ba wanolo niha nifahaʼöda enaʼö iʼila hadia zi tobali taha-taha khönia ba wondrouʼö yaʼia ba wamati?

⁵ Hewaʼae no oya ayati niʼila niha nifahaʼöda, te moguna nasa mutolo ia ba wangalui hadia nasa zi tobali taha-taha khönia ba wondrouʼö yaʼia ba wamati. Tola manö, abua khönia tobali Samaduhuʼö Yehowa börö halöwö mazui ösi nomonia. Börö daʼö, beʼe ginötöu wefao khönia. Tola fao ami wamadu kofi mazui manörö-nörö. Na öfalua zimane daʼö, te abölö aoha khönia wamatunö khömö hadia zi tobali taha-tahania. Na no ifatunö khömö, tolo ia ba wamalua fombulöʼö. Fasugi ba dödönia wa ohitö dödönia wamalua daʼö tenga ba wangomusoiʼö tödömö, hizaʼi ba wangomusoiʼö tödö Yehowa.

6. Hadia zi tola öfalua ba wanolo niha nifahaʼömö enaʼö barani ia wamalua hadia zi no ifahaʼö ia? (1 Korindro 16:13)

⁶ Na faduhu dödö niha nifahaʼömö wa hasambalö itolo ia Yehowa ba wamaudugö faʼaurinia ba goi-goi Zura Niʼamoniʼö, daʼö zanolo yaʼia enaʼö barani ia wamalua hadia zi no ifahaʼö yaʼia. (Baso 1 Korindro 16:13.) Halöwö nifaluamö fagölö simane halöwö nifalua guru ba zekola. Hewisa guru somasiʼö? Te omasiʼö guru sebolo tödö ba wanolo yaʼugö enaʼö faduhu dödömö wa tola öfalua zi sambua ngawalö. Simane daʼö göi niha samahaʼö ba Zura Niʼamoniʼö, tenga ha ifahaʼö hadia zomasi Yehowa, hizaʼi ifaduhuʼö göi ba niha nifahaʼönia wa tola ifalua wombulöʼö börö wanolo moroi khö Yehowa. Hewisa enaʼö tobali ndraʼugö guru mazui samahaʼö simane daʼö?

TOLO NIHA NIFAHAʼÖMÖ ENAʼÖ ITUGU IʼOMASIʼÖ YEHOWA

7. Hadia nifalua Yesu ba wanolo niha enaʼö itugu laʼomasiʼö Yehowa?

⁷ Aboto ba dödö Yesu wa hasambalö tefarou dödö zi samösa niha ba wamalua hadia zi no ifahaʼö yaʼia na sindruhu-ndruhu iʼomasiʼö Yehowa. Daʼö mbörö wa asese ifahaʼö ngawalö zi möi fanolo ndra nifahaʼönia enaʼö itugu laʼomasiʼö Namara si so ba zorugo. Duma-dumania, ifaomagö Yehowa andrö hulö nama sameʼe ngawalö zi sökhi khö ndraononia. (Mat. 7:​9-11) Te so ösa zamondrondrongo huhuo Yesu si lö mangokhögö satua mazui ama simane daʼö. Tobali, terara sibai dödöra me itutunö Yesu gamaedola sanandrösa khö zi samösa ama sangomasiʼö ba sanemaʼö ononia mangawuli hewaʼae no oya zi lö sökhi nifalua nononia andrö. Ba daʼa taʼila wa itolo ira Yesu enaʼö aboto ba dödöra wa sindruhu-ndruhu iʼomasiʼö ira Yehowa.—Luk. 15:​20-24.

8. Hadia zi tola öfalua ba wanolo niha nifahaʼömö enaʼö itugu iʼomasiʼö Yehowa?

⁸ Tola ötolo niha nifahaʼömö enaʼö itugu iʼomasiʼö Yehowa na asese öfahaʼö ia sanandrösa ba gamuata Yehowa. Ero na ifahaʼö ia, tolo ia enaʼö iʼila moroi ba wamahaʼö daʼö wa sindruhu-ndruhu iʼomasiʼö Yehowa. Duma-dumania, ba ginötö mitutunö sanandrösa ba höli, fatunö wa khönia ibeʼe daʼö Yehowa. (Rom. 5:8; 1 Yo. 4:10) Na iʼangerönusi niha nifahaʼömö wa sindruhu-ndruhu iʼomasiʼö ia Yehowa, daʼö zanolo yaʼia enaʼö itugu iʼomasiʼö Yehowa.—Gal. 2:20.

9. Hadia mbörö wa ibulöʼö waʼaurinia Michael?

⁹ Nehegö zalua khö Michael moroi ba Indonesia. Teʼebuaʼö ia ba zindruhu, hizaʼi lö si tebayagö ia idanö. Me 18 fakhe ndröfinia, möi ia ba soi böʼö ba mohalöwö ia tobali sopir moto. Ba gafuriata, mangawuli ia ba ilau mangowalu. Hizaʼi, ifuli iröi nösi nomonia börö me mohalöwö ia ba soi böʼö. Sagötö so ia ba daʼö, foʼomonia hegöi ononia alawe ibörögö lafahaʼö ira ba Zura Niʼamoniʼö ba tedou ira ba wamati. Me no aefa mate ninania, ifuli ia Michael ba wondrorogö amania, ba omasi ia tefahaʼö ba Zura Niʼamoniʼö. Me latutunö faosatö ”Odödögö Nasa Wangalui” ba wamahaʼö 27 moroi ba mbuku Lala ba Wanöndra Faʼohahau Dödö Sagötö Faʼara!, asöndru sibai dödö Michael. Iʼangerönusi hewisa dödö Yehowa me iʼila tefakao nononia, ba ibörögö ilau meʼe. Iadaʼa aboto ba dödönia wa sindruhu-ndruhu iʼomasiʼö ia Yehowa hegöi Yesu. Iʼandrö sibai saohagölö, ba ibörögö ifalua wombulöʼö ba waʼaurinia irege tebayagö ia idanö.

TOLO NIHA NIFAHAʼÖMÖ ENAʼÖ IʼOFÖNAIʼÖ YEHOWA

10. Hadia nifalua Yesu ba wanolo niha nifahaʼönia enaʼö laʼofönaiʼö Yehowa ba waʼaurira? (Luka 5:​5-11) (Faigi göi gambara.)

¹⁰ Iʼanemaiʼö aboto ba dödö ndra nifahaʼö me abad siföföna wa Yesu andrö Mesia si no mufabuʼu. Hizaʼi, moguna mutolo ira enaʼö laʼofönaiʼö halöwö fanuriaigö. Duma-dumania, no tohöna tobali nifahaʼö Yesu ndra Fetero hegöi Andrea me ikaoni ira Yesu enaʼö mangai halöwö ira safönu inötö. (Mat. 4:​18, 19) Sindruhunia, fao ira khö Yakobo hegöi Yohane tobali si fagai ba mofozu sibai halöwö nifaluara. (Mrk. 1:​16-20) Hewaʼae simanö, ”laröi halöwöra” andrö ba laʼoʼö Yesu. Tatu manö laʼangeragö hewisa wangalui soguna ba nösi nomora. Hizaʼi, hadia mbörö wa laʼofönaiʼö halöwö fanuriaigö? Moloʼö nisura Luka, ifalua dandra sahöli-höli dödö Yesu ba wangaʼaroʼö famatira wa tola ibönökhi zoguna khöra Yehowa.—Baso Luka 5:​5-11.

11. Hadia zi tola tatutunö si möi fangaʼaroʼö wamati niha nifahaʼöda?

¹¹ Sindruhu wa tebai tafalua dandra sahöli-höli dödö simane nifalua Yesu. Hizaʼi, tola tatutunö ba niha nifahaʼöda hewisa wanolo Yehowa niha sangofönaiʼö yaʼia ba waʼaurira. Duma-dumania, hadia lö olifuʼö hewisa wanolo Yehowa yaʼugö me awena möiʼö ba gangowuloa? Te moguna öfalukhaisi gafalomö wohalöwö ba ötutunö khönia hadia mbörö wa tebai önönö ginötömö wohalöwö na tefaudu daʼö ba ngaluo gangowuloa. Ba ginötö ötutunö zi no irai alua khömö, haogö wangombakha khönia hewisa wa tola teʼaroʼö wamatimö me öʼila wa ituhini Yehowa gangetula nihalömö ba wangofönaiʼö yaʼia ba waʼaurimö.

12. (a) Ba ginötö tafahaʼö niha ba Zura Niʼamoniʼö, hana wa moguna tafaböʼö-böʼöni nawöda? (b) Hewisa wangogunaʼöda video ba wanolo niha nifahaʼöda enaʼö laʼofönaiʼö Yehowa? Beʼe duma-duma.

¹² So mbuania ba niha nifahaʼöda na larongo waö-waö waʼauri ndra talifusöda sangofönaiʼö Yehowa. Börö daʼö, ohe ndra talifusöda si faböʼö-böʼö ba ginötö öfahaʼö niha nifahaʼömö. Andrö khöra enaʼö latutunö hewisa wa tola laʼila zindruhu ba hadia nifaluara ba wangofönaiʼö Yehowa ba waʼaurira. Baero daʼö, mifao ba wamaigi video si so ba faosatö ”Odödögö Nasa Wangalui” mazui ”Alui Nasa Danö Böʼö” moroi ba mbuku Lala ba Wanöndra Faʼohahau Dödö Sagötö Faʼara! Duma-dumania, ba ginötö mitutunö wamahaʼö 37, tola ötolo niha nifahaʼömö ba wangalui hadia goi-goi Zura Niʼamoniʼö si so ba video Iʼasogö Yehowa Zoguna Khöda.

TOLO NIHA NIFAHAʼÖMÖ BA WANAÖGÖ FOLOHI

13. Hadia nifalua Yesu ba wanolo ira nifahaʼönia ba wanaögö folohi?

¹³ No hauga kali ifatunö khö ndra nifahaʼönia Yesu wa hasambalö göna ira folohi, tola manö moroi ba nösi nomora. (Mat. 5:11; 10:​22, 36) Fatua lö mate ia, ifasugi ba dödö ndra nifahaʼönia wa tola manö labunu ira börö me lafosumange Yehowa. (Mat. 24:9; Yoh. 15:20; 16:2) Börö daʼö, iʼamenesi ira enaʼö mangelama ira irege lö tebulö tola lafalua halöwö fanuriaigö. Duma-dumania, ifatunö khöra enaʼö laʼokhögö waʼatua-tua ba lö fabuʼa-buʼa ira ba niha sanaisi halöwö nifaluara.

14. Hadia nifaluada ba wamaʼanö niha nifahaʼöda ba wanaögö folohi? (2 Timoteo 3:12)

¹⁴ Simane Yesu, moguna tafatunö ba niha nifahaʼöda wa tola manö so dania nawönia wohalöwö, si fahuwu khönia, mazui ösi nomonia sanaisi yaʼia. (Baso 2 Timoteo 3:12.) Te so ösa nawönia wohalöwö sangoʼaya yaʼia börö me iforege woloʼö hadia zi no ifahaʼö yaʼia. Te so göi niha böʼö mazui ösi nomonia si lö fao tödö ba zi no ifahaʼö yaʼia ba Zura Niʼamoniʼö. Na lö tataha-taha ba wamaʼanö niha nifahaʼöda, itugu tefaʼanö ia na so wolohi salua.

15. Hadia nifaluada ba wanolo niha nifahaʼöda ba ginötö lasaisi ia ira ösi nomonia?

¹⁵ Na lasaisi niha nifahaʼöda ira ösi nomonia, tolo ia enaʼö aboto ba dödönia hadia mbörö wa lafalua daʼö. Tola manö so ba wangera-ngera nösi nomonia wa no lafaelungu ia mazui te lö omasi ira khö ndra Samaduhuʼö Yehowa. No irai göi göna folohi Yesu moroi ba nösi nomonia. (Mrk. 3:21; Yoh. 7:5) Börö daʼö, tolo niha nifahaʼömö enaʼö lö tebulö so khönia waʼebolo dödö hegöi faʼasökhi dödö ba ginötö fahuhuo ia ba nösi nomonia mazui niha böʼö sanaisi yaʼia.

16. Hadia zi tola öfalua ba wanolo niha nifahaʼömö ba wanutunö hadia zi no ifahaʼö yaʼia?

¹⁶ Hewisa wanolomö niha nifahaʼömö ba wanutunö nifaduhusinia tödö na so nösi nomonia sadöni tödö ba zindruhu? Fatunö khönia enaʼö lö isamuzaigö wanutunö fefu zi no aboto ba dödönia. Hadia mbörö? Enaʼö lö aföli nösi nomonia andrö mazui afökhö högöra irege lö saʼae omasi ira latutunö sanandrösa ba Zura Niʼamoniʼö. Börö daʼö, tolo niha nifahaʼömö enaʼö ihaogö wanutunö hadia zi no ifahaʼö yaʼia ba lala salio aboto ba dödöra. (Kol. 4:6) Tola öfatunö khöra situs web jw.org, enaʼö laʼalui samösa sanandrösa khö ndra Samaduhuʼö Yehowa.

17. Hewisa wanolomö niha nifahaʼömö ba wangoʼawögö nifaduhusinia tödö? (Faigi göi gambara.)

¹⁷ Enaʼö tola ibeʼe wanema li ba lala salio aboto ba dödö nösi nomonia mazui awönia wohalöwö sanofu sanandrösa ba nifaduhusinia tödö, tola ötolo niha nifahaʼömö na mitutunö seri artikel ”Sasese Lasofu Niha Sanandrösa khö Ndra Samaduhuʼö Yehowa” si so ba jw.org. (2 Ti. 2:​24, 25) Böi olifu göi ami wanutunö faosatö ”So Zangumaʼö” si so ba gafuriata ero wamahaʼö ba mbuku Lala ba Wanöndra Faʼohahau Dödö Sagötö Faʼara! Tolo ia enaʼö ifaʼanö ia ba wangoʼawögö nifaduhusinia tödö faoma fehedenia samösa, ba fao khönia ba wamalua famadumaisi. Böi ataʼu ndraʼugö ba wameʼe khönia fanuturu lala enaʼö itugu sökhi wamaluania daʼö. Famomaha simane daʼö zanolo yaʼia ba wangoʼawögö famatinia si fao faʼafaduhu dödö.

18. Hewisa wanolomö niha nifahaʼömö enaʼö tobali sanuriaigö? (Mataiʼo 10:27)

¹⁸ Ibeʼe goroisa Yesu khö ndra nifahaʼönia enaʼö laturiaigö duria somuso dödö ba niha fefu. (Baso Mataiʼo 10:27.) Na lö ötaha-taha wamahaʼö niha nifahaʼömö enaʼö ibörögö manuriaigö, itugu alio göi ifahaʼö ia ba wangodaligö Yehowa. Börö daʼö, hewisa wanolomö niha nifahaʼömö enaʼö iʼokhögö gohitö dödö tobali sanuriaigö? Na so kegiatan pengabaran khusus ba mbanua niha Keriso si farahu yaʼami, tolo ia enaʼö iʼila hadia manö zinangea ifalua enaʼö tobali ia sanuriaigö. Fatunö khönia wa si toʼölönia abölö aoha manuriaigö na so kegiatan simane daʼö. Tola göi itema mbua si sökhi na ifaʼema halöwö nitemania ba gangowuloa barö migu. Na iforege enaʼö tobali ia sanuriaigö, hasambalö tefahaʼö dania ia hewisa enaʼö sökhi wanutunönia nifaduhusinia tödö.

FADUHUSI TÖDÖ NIHA NIFAHAʼÖMÖ

19. Hadia nifalua Yesu me lö aboto ba dödö ndra nifahaʼönia wehedenia, ba hewisa woloʼöda duma-dumania?

¹⁹ Fatua lö mangawuli Yesu ba zorugo, ifatunö khö ndra nifahaʼönia wa ifuli dania falukha ira. Hizaʼi, lö aboto ba dödöra wa eluaha niwaʼö Yesu yaʼia daʼö feʼamöira ba zorugo. Hewaʼae simanö, faduhu dödö Yesu wa lö faröi ira khönia. (Yoh. 14:​1-5, 8) Iʼila Yesu wa moguna khöra ginötö enaʼö aboto ba dödöra zi sambua ngawalö, duma-dumania tötönafö faʼauri ba zorugo. (Yoh. 16:12) Simane Yesu, tola göi taforomaʼö wa faduhu dödöda ba niha nifahaʼöda wa omasi ira laʼomusoiʼö dödö Yehowa.

20. Hewisa wangoromaʼö Chifundo waʼafaduhu dödö wa hasambalö ifalua zatulö niha nifahaʼönia?

²⁰ Nehegö duma-duma Chifundo, samösa talifusöda ira alawe ba Malawi. Ifahaʼö Zura Niʼamoniʼö khö zi samösa ono alawe sotöi Alinafe, si fao ba agama Katolik. Me no aefa latutunö wamahaʼö 14 moroi ba mbuku Lala ba Wanöndra Faʼohahau Dödö Sagötö Faʼara!, manofu Chifundo khö Alinafe hewisa mbua gera-erania sanandrösa ba wangogunaʼö adu hegöi gambara ba wamosumange Lowalangi. Abao sibai dödö Alinafe, ba imane, ”Angetula zi samö-samösa niha daʼö!” Tumbu ba dödö Chifundo wa lö saʼae ifahaʼö ia Alinafe ba Zura Niʼamoniʼö. Hizaʼi, si fao faʼebolo dödö, lö iböhöli Chifundo wamahaʼö Alinafe ba itötöna samuza inötö dania aboto ba dödönia wamahaʼö daʼö. Hauga waŵa aefa daʼö me no larugi wamahaʼö 34, ifuli zui manofu Chifundo, ”Me no aefa öfahaʼö ndraʼugö ba Zura Niʼamoniʼö ba no aboto ba dödömö sanandrösa khö Lowalangi sindruhu sotöi Yehowa, hadia manö mbua nitemamö?” Itutunö Chifundo, ”Oya sibai zi sökhi nitutunö Alinafe. Sambua ba gotaluania yaʼia daʼö ira Samaduhuʼö Yehowa lö lafalua zi lö tefaudu moloʼö Sura Niʼamoniʼö.” Lö ara aefa daʼö, ibato Alinafe wangogunaʼö adu hegöi gambara ba tebayagö ia idanö. Ba daʼa taʼila wa moguna tafaduhusi tödö niha nifahaʼöda wa omasi ira lafalua zatulö.

21. Hewisa wanoloda niha nifahaʼöda enaʼö lahalö gangetula ba wamosumange Yehowa?

²¹ Sindruhu sa, Yehowa ”zamanöi” niha nifahaʼöda, hizaʼi so zinangea tafalua ba wanolo yaʼira enaʼö tedou ira ba wamati. (1 Ko. 3:7) Tenga ha tafahaʼö ia sanandrösa ba zomasi Yehowa. Hizaʼi, tatolo göi ia enaʼö sindruhu-ndruhu iʼomasiʼö Yehowa ba iforomaʼö waʼomasinia andrö yaʼia me iʼofönaiʼö Yehowa ba waʼaurinia. Tafahaʼö göi ia hewisa lala ba wangodaligö Yehowa ba ginötö so wolohi. Na taforomaʼö wa faduhu dödöda wa hasambalö ifalua zatulö, itugu faduhu göi dödönia wa tola ifosumange Yehowa.