Si Bohou Ebua​—”Miʼalui Wangorifimi”

1. Hana wa moguna sibai wamayagö idanö? (Faigi gambara ba wamobörö wamahaʼö.)

ERO röfi, ngahönö niha nifahaʼö ba Zura Niʼamoniʼö nibayagö idanö. Ato ba gotaluara zi bohou ebua mazui iraono side-ide. Tola manö no lafahaʼö ira ba zindruhu iʼotarai ba waʼide-ide. Hadia tefarahu göi ndraʼugö ba gotaluara? Na yaʼia, no öfalua zabölö sökhi. Fefu niha Keriso moguna tebayagö idanö. Daʼa no sambua lala enaʼö tola teʼorifi ba auri ita sagötö faʼara.​—Mataiʼo 28:19, 20; 1 Fetero 3:21.

2. Hana wa lö moguna ataʼuʼö ba wolulu faʼaurimö khö Yehowa?

² Na no tebayagö ndraʼugö idanö, oya howu-howu si bohou nibeʼe Yehowa khömö. Hizaʼi, so göi noro dödö si bohou niʼokhögömö. Hadia daʼö? Me tebayagö ndraʼugö idanö, ibeʼe khömö wanofu talifusöda sangolohesi huhuo imane, ”Teʼodane-dane ba höli si no ibeʼe Yesu Keriso, hadia no öfalalini gera-erau, ba ölulu waʼauriu khö Yehowa ba wamalua ohitö dödönia?” Ötema li, ya. Öfabuʼu wa öʼomasiʼö Yehowa ba öʼofönaiʼö wamosumange yaʼia ba waʼaurimö. Hadia maniasa ndraʼugö börö me no öfabuʼu daʼö? Tatu löʼö! Lö irai maniasa ndraʼugö ba wolulu faʼaurimö khö Yehowa. Niha si lö mangokhögö faʼaboto ba dödö sanandrösa khö Yehowa no tobali ira ösi gulidanö Zatana. Lö irorogö ndraʼugö hegöi yaʼira Afökha. Sindruhunia, omuso dödönia na lö öʼokhögö waʼauri si lö aetu börö me fao ndraʼugö khönia ba ötimbagö Yehowa.

3. Hewisa wamahowuʼö Yehowa ndraʼugö me no ölulu waʼaurimö khönia?

³ Angeraigö hewisa wamahowuʼö Yehowa yaʼugö börö me no ölulu waʼaurimö khönia ba me no tebayagö ndraʼugö idanö. No ölulu waʼaurimö khö Yehowa, andrö wa tola öwaʼö si fao faʼafaduhu dödö, ”Awögu Yehowa, ba lö ataʼu ndraʼo. Hadia nilau niha khögu enaʼö?” (Zinunö 118:6) No töi sebua na faʼawö ndraʼugö khö Lowalangi ba na öʼila wa omuso dödönia khömö.

NORO DÖDÖ ZAMÖSANA

4, 5. (a) Hana wa folulu faʼauri no noro dödöda zamösana? (b) Hadia wanandraigö nitaögö niha Keriso?

⁴ Fahuwusamö khö Yehowa lö teʼodaligö khö ndra satuamö. Hewaʼae na khö ndra satuamö toröi nasa ndraʼugö, hizaʼi yaʼugö samösa zonorogö tödö wahuwusamö khö Yehowa. Hana wa moguna ötörö tödömö daʼö? Fefu ita, tola manö tetandraigö wamatida ba zi so föna. Duma-dumania, te no tebayagö ndraʼugö idanö fatua lö sibiha mboto nasa ndraʼugö. Hizaʼi me itugu ebua-bua ndraʼugö, so gisö-isö dödö hegöi abula dödömö si bohou. Imane samösa ono alawe si bohou ebua, ”Me ide-ide ita, tola manö lö maniasa ita tobali Samaduhuʼö Yehowa ha börö me lö tatema kue ulang tahun ba zekola. Hizaʼi, hauga fakhe aefa daʼö, na ibörögö ebua gisö-isö dödö ba wamalua fohorö, moguna sindruhu-ndruhu tafaduhusi tödö wa no angetula si sökhi na taʼoʼö goi-goi Yehowa.”

⁵ Tenga ha si bohou ebua zanaögö abula dödö si bohou. Niha nibayagö idanö me no tobali satua, tola manö tetandraigö wamatira ba zi lö mudöna-döna. Duma-dumania, abula dödö ba wongambatö, fökhö hegöi ba halöwöra. Hizaʼi, gofu hauga fakhe ndröfida, moguna böi faröi ita khö Yehowa gofu hadia zalua khöda.​—Yakobo 1:12-14.

6. (a) Hadia geluahania ölulu waʼaurimö khö Yehowa gofu hadia zalua? (b) Hadia wamahaʼö nihalömö ba Filifi 4:11-13?

⁶ Enaʼö lö faröi ndraʼugö, böi aetu törö tödömö wa no fawuʼuli ndraʼugö khö Yehowa gofu hadia zalua. Eluahania, fawuʼu li ndraʼugö khö Lowalangi Fondrege Zalawa wa öfosumange ia gofu hadia zalua, hewaʼae na laböhöli wamalua daʼö ira awömö hegöi ira satuamö. (Zinunö 27:10) Gofu hadia zalua, andrö wanolo moroi khö Yehowa enaʼö tola öfalua hadia zi no öfabuʼu khönia.​—Baso Filifi 4:11-13.

7. Hadia geluahania mangalui fangorifi si fao ’faʼataʼu ba fanizi-nizi’?

⁷ Omasi Yehowa na tobali ndraʼugö si fahuwu khönia. Hizaʼi, moguna öforege enaʼö lö mamalö aro wahuwusamö khönia ba enaʼö ösöndra wangorifi. Imane Filifi 2:12, ”Simanö göi miʼalui wangorifimi andrö ba mbanua furi, sataʼu ami ba sanizi-nizi.” Eluahania, moguna tahaogö taʼangeraigö hewisa enaʼö lö mamalö ahatö ita khö Yehowa ba lö faröi ita gofu hadia zalua. Tebai taʼaohasi wangumaʼö wa tola tafalua daʼö. Törö tödömö wa niha si no hauga fakhe mamosumange Lowalangi tola manö faröi. Hadia zi tola manolo yaʼugö ba wanöndra fangorifi?

MOGUNA SIBAI WAMAHAʼÖ BA ZURA NIʼAMONIʼÖ

8. Hadia manö zi tefarahu ba wamahaʼö samösa? Hana wa moguna daʼö?

⁸ Enaʼö tobali ita si fahuwu khö Yehowa, moguna tafondrondrongo ba fahuhuo ita khönia. Lala si oföna ba wamondrondrongo Yehowa yaʼia daʼö tafahaʼö ita ba Zura Niʼamoniʼö. Duma-dumania, tabaso ba taʼangerönusi Daromali Lowalangi hegöi publikasi si teʼodane-dane ba Zura Niʼamoniʼö. Hizaʼi, famahaʼö ba Zura Niʼamoniʼö tenga ha asala tatanö ba dödöda simane na so ujian ba zekola. Moguna taʼosisiʼö ba taʼalui ngawalö zi bohou sanandrösa khö Yehowa. Buania, tola itugu ahatö ndraʼugö khö Lowalangi ba tola göi ahatö ia khöu.​—Yakobo 4:8.

9. Hadia manö fakake niʼogunaʼömö ba wamalua famahaʼö samösa?

⁹ Oya fakake si no ihenaigö organisasi Yehowa sanolo yaʼugö ba wamalua famahaʼö ba Zura Niʼamoniʼö. Duma-dumania, seri ”Menggali Isi Alkitab” ba faosatö ”Anak Muda” si so ba jw.org, sanolo yaʼugö ba wamalua hadia wamahaʼö nisöndramö ba waö-waö Zura Niʼamoniʼö. Aefa daʼö, ba jw.org so panduan belajar ”Apa yang Sebenarnya Alkitab Ajarkan?” Tola itolo ndraʼugö daʼa ba wangaroʼö famatimö ba enaʼö tola öfatunö ba niha böʼö hadia nifaduhusimö tödö. Tola ösöndra mene-mene tanö böʼö ba artikel ”Kaum Muda Bertanya . . . Bagaimana Aku Bisa Menikmati Pembacaan Alkitab?” ba Sedarlah! Baŵa si Öfa 2009. Famahaʼö hegöi foʼangerönusi moguna sibai ba wangalui fangorifimö samösa.​—Baso Zinunö 119:105.

MOGUNA SIBAI WANGANDRÖ

10. Hana wa moguna mangandrö niha Keriso si no tebayagö idanö?

¹⁰ Na tafahaʼö ita ba Zura Niʼamoniʼö, no tafondrondrongo Yehowa. Ba na talau mangandrö, no fahuhuo ita khönia. Böi so ba wangera-ngerada wa no si toʼölö mufalua wangandrö mazui simane ’hazima’ solohe howu-howu. Ba ginötö mangandrö, sindruhu-ndruhu fahuhuo ita khö Zomböi yaʼita. Omasi Yehowa ifondrondrongo hadia wangandrömö. (Baso Filifi 4:6.) Andrö, gofu hadia gabula dödömö, imane Sura Niʼamoniʼö, ”Beʼe noro Yehowa norou andrö.” (Zinunö 55:23) Zuta ndra talifusöda si no morasoi wanolo moroi ba mene-mene daʼö. Ba tola göi möi fanolomö daʼö!

11. Hana wa moguna asese öʼandrö saohagölö khö Yehowa?

¹¹ Hizaʼi, tenga ha na so niʼandröda awena talau mangandrö khö Yehowa. Ifasugi ba dödöda Sura Niʼamoniʼö, ”Ba miʼandrö saohagölö.” (Kolose 3:15) Itaria, abu sibai dödöda ba wanandraigö nitaögöda irege olifu ita hadia zi sökhi si no tatema. Andrö, tandraigö falua daʼa: Ero maʼökhö, angeraigö si löʼö-löʼönia tölu ngawalö niʼandrömö saohagölö, ba andrö saohagölö khö Yehowa daʼö. Imane Abigail si bohou ebua si no tebayagö idanö me 12 fakhe ndröfinia, ”Ha Yehowa zinangea manema fangandröda saohagölö. Andrö wa no sinangea taʼandrö saohagölö khönia ba mbuala si no ibeʼe khöda.” Itaria, isofu khönia samösa Abigail wanofu si no irai irongo, ”Na mahemolu taʼokhögö nasa hadia niʼandröda saohagölö khö Yehowa ba zi maʼökhö andre, hadia manö nasa niʼokhögöda?”a (Faigi nisura ba gahe zura.)

MOGUNA SIBAI ZI NO IRAI TARASOI SAMÖSA

12, 13. Hadia zi no irai alua khömö sangoromaʼö wa no si sökhi Yehowa, ba hana wa moguna sibai öʼangeraigö hewisa wanolonia yaʼugö?

¹² Itolo Razo Dawido Yehowa ba wanaögö ngawalö gabula dödönia. Ba zi no irai alua khönia samösa, andrö wa tola iwaʼö Dawido, ”Mitandra ba mifaigi, wa no sebua tödö Yehowa, yaʼahowu zanötöna khönia.” (Zinunö 34:9) Ayati daʼa zangoromaʼö khöda wa moguna tarasoi samösa waʼasökhi dödö Yehowa. Na öbaso Zura Niʼamoniʼö, publikasida hegöi na möiʼö ba gangowuloa, öfahaʼö ndraʼugö hewisa lala Lowalangi ba wanolo niha böʼö enaʼö lö faröi ira. Hizaʼi, enaʼö itugu aro wahuwusamö khö Yehowa, moguna örasoi samösa hewisa wanolonia yaʼugö. Hadia zi no irai alua khömö si tola mamaduhuʼö tödömö wa no si sökhi Yehowa?

¹³ Fefu niha Keriso no larasoi samösa hewisa waʼasökhi dödö Yehowa khöra. So sambua lala si tohude. Ikaoni ita zamösana enaʼö tahatöʼö ita khönia hegöi khö Nononia. Imane Yesu, ”Lö sangila möi khögu, na tenga Amagu, samatenge yaʼo, zondrönisi yaʼia.” (Yohane 6:44) Hadia örasoi wa no idöni ndraʼugö Yehowa? Mazui, hadia so ba wangera-ngeramö daʼa, ’No idöni zatuagu Yehowa ba ha si fao-fao ndraʼo’? Törö tödömö wa no öʼokhögö wahuwusa si sökhi khö Yehowa me ölulu waʼaurimö khönia ba tebayagö ndraʼugö idanö. Itutunö khöda Sura Niʼamoniʼö, ”Ba na so zangomasiʼö Lowalangi, daʼö zaboto ba dödö Lowalangi.” (1 Korindro 8:3) Böi mamalö ameʼegö tödö ginötö nibeʼe Yehowa khömö tobali ösi organisasinia.

14, 15. Hewisa wanuriaigö möi fanolomö ba wangokhögö famati saro?

¹⁴ Örasoi göi waʼasökhi dödö Yehowa ba ginötö ibeʼe khöu waʼabarani ba wamatunö hadia nifaduhusimö tödö ba niha böʼö, he ba wanuriaigö mazui ba zekola. Tola manö abua khömö wanuriaigö khö ndra awöu sekola. Te aombö dödömö hadia dania nifaluara. Mendrua manö na ötutunö hadia nifaduhusimö tödö föna niha sato. Hadia zi tola manolo yaʼugö?

¹⁵ Angeraigö hana wa aro dödömö ba nifaduhusimö tödö. Na so panduan belajar ba jw.org ba li niʼogunaʼömö, ogunaʼö daʼö. Daʼa zanolo yaʼugö ba woʼangeraigö hadia nifaduhusimö tödö, hana wa faduhu dödömö ba daʼö hegöi lala wanutunö yaʼia ba niha böʼö. Na sindruhu-ndruhu faduhu dödömö ba na no öhaogö öfaʼanö ndraʼugö, hasambalö omasiʼö ötutunö sanandrösa khö Yehowa.​—Yeremia 20:8, 9.

16. Hadia zi tola öfalua enaʼö so khöu waʼabarani ba wanutunö hadia nifaduhusimö tödö?

¹⁶ Hewaʼae no öhaogö öfaʼanö ndraʼugö, te so nasa khöu waʼataʼu ba wanutunö hadia nifaduhusimö tödö. Imane samösa talifusöda ira alawe si no 18 fakhe ba si no tebayagö idanö me 13 fakhe ndröfinia, ”Uʼila hadia nifaduhusigu tödö, hizaʼi itaria abua khögu ba wamaʼanö fehede niʼogunaʼögu.” Andrö wa iʼogunaʼö lala wahuhuosa hegöi ngawua wehede si toʼölö manö ba wanutunö famatinia. Imane nasa, ”Asese latutunö ira awögu sekola hadia manö halöwöra si fao faʼafaduhu dödö. Simane daʼö göi ndraʼo menaʼö. Andrö wa ufaogö-faogö wanutunö yaʼia ba wahuhuosagu. Duma-dumania umane, ’Menewi no ufahaʼö niha ba Zura Niʼamoniʼö, ba . . . ’ Aefa daʼö, utohugö manö fahuhuo. Sindruhusa wa tenga sanandrösa ba Zura Niʼamoniʼö duho si oföna nifatunögu. Hizaʼi, ato ndra awögu somasi mangila hadia nifaluagu na ufahaʼö niha ba Zura Niʼamoniʼö. Itaria lasofu khögu sanandrösa ba daʼö. Itugu asese uʼogunaʼö lala daʼa, ba itugu aoha khögu ba wanutunö hadia nifaduhusigu tödö. Buania, urasoi waʼomuso dödö sebua!”

17. Hadia manö zi tola manolo yaʼugö ba wanutunö hadia nifaduhusimö tödö?

¹⁷ Na larasoi niha böʼö wa sindruhu-ndruhu öʼameʼegö tödö ba öʼosinangegö ira, aoha khöra ba woʼameʼegö tödö ndraʼugö hegöi hadia nifaduhusimö tödö. Imane Olivia si no 17 fakhe ba si no tebayagö idanö me awuyu-wuyu sibai ndröfinia, ”Ataʼudo ma lawaʼö khögu fanatik na ututunö sanandrösa ba Zura Niʼamoniʼö na fahuhuodo.” Hizaʼi, ibörötaigö faböʼö lala wangera-ngerania. Moroi na aombö dödönia ba daʼö, iʼangeraigö daʼa: ”Ato ndra si bohou ebua si lö mangokhögö faʼaboto ba dödö sanandrösa khö ndra Samaduhuʼö Yehowa. Te awena laʼila ia moroi khöda. Andrö, lalada ba wamaʼema yaʼia möi fotatugöi hewisa lagura khö ndra Samaduhuʼö. Na aila ita, ataʼu mazui abua khöda ba wanutunö famatida, hulö na tawaʼö wa aila ita tobali Samaduhuʼö Yehowa. Ba tola manö lö omasi ira saʼae khö ndra Samaduhuʼö börö me lö khöda faʼabarani. Hizaʼi, na tatutunö khöra hadia nifaduhusida tödö si fao faʼahono ba faʼafaduhu dödö, simane si toʼölö na fahuhuo ita, tola itugu laʼameʼegö tödö ita.”

FOREGE WANGALUI FANGORIFIMÖ

18. Hadia zinangea öfalua ba wangalui fangorifimö samösa?

¹⁸ Öʼokhögö noro dödö sebua ba wangalui fangorifimö samösa. Ba wamalua daʼö, moguna öbaso ba öʼangerönusi Daromali Lowalangi, angandrö khö Yehowa ba haogö angeraigö fefu zi no ifalua ba wanolo yaʼugö. Na öfalua daʼö tetolo ndraʼugö enaʼö tola itugu faduhu dödömö wa Yehowa no si Fahuwu khömö. Daʼa zamarou tödömö ba wanutunö hadia nifaduhusimö tödö ba niha böʼö.​—Baso Zinunö 73:28.

19. Hana wa tenga zaya-zaya gölö na öforege wangalui fangorifimö?

¹⁹ Imane Yesu, ’Na so zedöna moloʼö yaʼo, ba yamuʼositengagö ia ba yamuluʼi döla geu famakao ba yamuʼoʼö ndraʼo.’ (Mataiʼo 16:24) Enaʼö tola tobali soloʼö khö Yesu, fefu niha Keriso moguna lalulu waʼaurira khö Yehowa ba tebayagö idanö. Hizaʼi, awena famobörö daʼö ba wangokhögö faʼauri si sökhi iadaʼa. Daʼa zanolo yaʼita ba wangokhögö faʼauri si lö aetu ba gulidanö si bohou khö Lowalangi. Börö daʼö, falua fefu zi tola öfalua ba wangalui fangorifimö samösa!