Taya Waradaiso

FATUA lö iwöwöi niha Lowalangi, no oföna iwöwöi mboto eheha si lö oroma yaʼia daʼö—ira malaʼika. Ba Gedena, so samösa malaʼika solawa, nifotöi Afökha ba Satana. Onekhe sibai ia wamaelungu Khawa enaʼö iʼa mbua geu si no itegu Lowalangi.

Afökha, iʼodela gulö ba wahuhuosa khö Khawa enaʼö lafaduhusi tödö wa no itaha zi sökhi Lowalangi khö Gadamo ba Khawa. Imane Malaʼika khö Khawa, lö mate ira na laʼa mbua geu andrö. Iböbögö zi lö duhu Afökha khö Lowalangi wa no ilimo niha. Samaelungu andrö, idönisi dödö niha enaʼö faröi ira khö Lowalangi ba lasöndra waʼatua-tua, ba tola lafalua zomasi dödöra. Hizaʼi, falimosa daʼö—falimosa si oföna ba gulidanö. Si ndruhunia si tobali amadöniwa yaʼia daʼö, famatörönia—hadia sinangea mamatörö Lowalangi ba hadia atulö wamatörönia, ba hadia simöi fangohahau dödö nono mbanuania.

Faduhu dödö Khawa ba walimosa Gafökha andrö. Ibörögö iʼisö mbua geu andrö, ba ihalö, ba iʼa. Aefa daʼö, ibeʼe göi ö woʼomonia ba faoma laʼa. Lua-luania, tobali ira niha si so horö. Si ndruhunia, nifaluara andrö tandra wa lalawa Lowalangi. Börö me laʼodödögö wanawö oroisa Lowalangi ira Adamo ba Khawa, laʼerogö wamatörönia, si no mombönökhi soguna khöra, ba sameʼe faʼauri soʼahonoa.

Ihuku ira Lowalangi börö me no lalawa ia. No ifaʼeleʼö Lowalangi wa tohare dania Maʼuwu mazui Sangefaʼö si no tefabuʼu, samunu Afökha andrö. Börö me so khö Lowalangi waʼahakhö dödö khö maʼuwu Gadamo ba Khawa, andrö lö iʼanemai ibunu ira. So göi wanötöna ba ngaʼötö Gadamo börö me Niha nifatenge Lowalangi dania zangefaʼö yaʼira moroi ba lua-lua horö Gadamo ba Khawa ba Kabu Edena. Hewisa wamalua ohitö dödö Lowalangi ba wamatenge Sangorifi—ba haniha nifatengenia—tezara-zara wamatunö ba Zura Niʼamoniʼö.

Ifofanö Gadamo ba Khawa Lowalangi moroi ba Waradaiso. Lua-luania laforege wohalöwö baero ba Kabu Edena. Manabina Khawa ba tumbu khöra nono siaʼa, Kaʼino. Ba tumbu nasa khöra ndraono, ono alawe ono matua, simane Habeli ba Seti, tua Noakhi.

​—Teʼodane-dane ba I Moze faza 3 irugi 5; Famaʼeleʼö 12:9.