Lö Laʼoʼö Niwaʼö Lowalangi Ira Adamo ba Khawa

Samuza inötö me ha samö-samösa Khawa, so sara gulö si fahuhuo khönia. Isofu khönia ulö andrö, ’Hadia sindruhu no iwaʼö khömi Lowalangi wa tebai miʼa fefu mbua geu?’ Imane Khawa, ’Tola maʼa fefu mbua geu, hizaʼi so sambua zi tebai maʼa. Na maʼa mbua geu daʼö ba mate ndraʼaga.’ Imane ulö, ’Lö mate ami. Na miʼa mbua geu daʼö, tobali ami simane Lowalangi.’ Hadia atulö daʼö? Löʼö, faya-faya daʼö. Hizaʼi faduhu dödö Khawa. Lö aetu ifaigi-faigi mbua geu daʼö Khawa, irege edöna ia wemanga. Lua-luania, iʼa mbua geu daʼö ba ibeʼe göi ö Gadamo. Iʼila Adamo wa hasambalö mate ira na lasawö niwaʼö Lowalangi. Hizaʼi, iʼa manö göi mbua geu andrö.

Tanö owinia, manofu Yehowa khö Gadamo hegöi Khawa hadia mbörö wa lö laʼoʼö niwaʼönia. Khawa isalaikö gulö, ba Adamo isalaikö Khawa. Börö me lö moloʼö Gadamo hegöi Khawa, ifofanö ira Yehowa moroi ba kabu daʼö. Enaʼö tebai saʼe lafuli ira, ifataro malaʼika sanaro ba ibeʼe wöda alitö ba mbawandruhönia.

Iwaʼö Yehowa wa hasambalö göi muhuku zolimo Khawa. Sindruhunia, si fahuhuo khö Khawa tenga ulö. Lö ifazökhi Lowalangi gulö enaʼö tola fahuhuo. So malaʼika si lö sökhi sangogunaʼö ulö ba wolimo Khawa. Mufotöi malaʼika daʼö Afökha Satana. Enaʼö tebai saʼe ilimo niha Satana ba wamalua si lö sökhi, ihori ia Yehowa ba zi so miföna.