FAOSATÖ 4
Fawuʼu Li Lowalangi khö Gaberahamo
Iʼoʼö niwaʼö Lowalangi Aberahamo si fao famati, ba ifabuʼu khönia Yehowa wa ifahowuʼö ia ba iʼoyaiʼö ngaʼötönia
ARAKHAGÖ 350 fakhe me no aefa Anönö Danö Idanö ba götö Noakhi. So samösa niha samati sotöi Aberahamo niha si kayo si toröi ba mbanua Guri, banua daʼö lafotöi ia iadaʼa Irak. Aberahamo andre sebua famati khö Lowalangi. Iadaʼa tetandraigö wamatinia.
Iwaʼö Yehowa khö Gaberahamo enaʼö iröi mbanua si tumbu yaʼia, isawa mbanua Kanaʼana. Iʼoʼö Aberahamo wehede Lowalangi. Iʼohe zoroi yomonia, foʼomonia Saraʼi, ba Loti ono dalifusönia. Me no aröu lala latörö, larugi danö Kanaʼana ifazökhi nosenia ba daʼö. Fawuʼu li Yehowa khö Gaberahamo wa tobali ia dania soi sebua, ba tefahowuʼö fefu ngaʼötönia ba yaʼira zangokhögö tanö Kanaʼana.
Itugu tedou manö gokhöta Gaberahamo faoma Loti, börö me itugu oya guriföra. Aberahamo tenga ha tana khönia niʼera-erania. Iwaʼö khö Loti, faigi hezo mbanua somasiʼö. Ituyu khönia Loti mbanua Yoridano satabö sinanö ba soya idanö, sahatö ba mbanua Zodoma. Niha Zodoma andrö—sebua horö föna Yehowa.
Ifuli ifaduhuʼö Yehowa khö Gaberahamo, wa simane faʼoya ndröfi ba dalu mbanua waʼoya ngaʼötönia. Mamati Gaberahamo ba nifabuʼu Yehowa. Hizaʼi, foʼomo Gaberahamo niʼomasiʼönia sotöi Saraʼi, lö soʼono. Me no 99 fakhe ndröfi Gaberahamo ba lö aratö 90 fakhe ndröfi Zaraʼi, imane Lowalangi tumbu dania nono matua khö Gaberahamo ba khö Zaraʼi. Itörö niwaʼö Lowalangi, moʼono Zaraʼi, yaʼia daʼö Izaʼaki. Ba tumbu nasa ndraono tanö böʼö khö Gaberahamo, tobali, moroi ba ngaʼötö Gizaʼaki tumbu dania Zangefaʼö andrö si no tefabuʼu ba kabu Edena.
Loti ba soroi yomonia toröi ba mbanua Zodoma. Loti niha satulö tödö, tenga simane niha Zodoma sebua horö föna Lowalangi. Me ihalö gangetula Yehowa ba wamakiko Sodoma, ifatenge malaʼikania khö Loti ba wamangelama yaʼia wa hasambalö alua wamakiko andrö. Lafangaösö Loti ba soroi yomonia ira malaʼika andrö enaʼö moloi ira laröi Zodoma ba tebai lafaigi furi. Iʼekhugö Lowalangi dalö balera ba alitö ba mbanua Zodoma ba Gomora, irugi tehori niha ba mbanua andrö. Teʼorifi Loti ba ononia alawe si darua. Hizaʼi, ifaigi furi foʼomo Loti börö me no toröi dödönia ba harato. Lua-luania, tobali ia kara moʼasio.
—Teʼodane-dane ba I Moze 11:10-19:38.