Ifotöi Ia Yehowa ’si Fahuwu Khögu’

1, 2. (a) Hezo taʼila wa tola fahuwu niha gulidanö khö Lowalangi? (b) Hadia nifatunöda ba duho daʼa?

IʼOTARAI me tumbu ita irugi mate, moguna khöda nifotöi faʼomasi. Moguna ba niha gulidanö fahuwusa saro si fao faʼomasi, tenga ha faʼomasi ba gotalua zi fasita. Hizaʼi, sabölö moguna yaʼia daʼö faʼomasi moroi khö Yehowa. Ato niha si lö faduhu tödö wa tola fahuwu niha gulidanö khö Lowalangi Fondrege zabölö börö me tebai taʼila höröda. Hizaʼi, sindruhunia tola fahuwu ita khönia!

² Tola taʼila moroi ba Zura Niʼamoniʼö wa so niha si fahuwu khö Lowalangi. Moguna tafahaʼö ita moroi khöra. Hadia mbörö? Börö me fahuwusa khö Lowalangi andrö, no ohitö dödö sabölö moguna ba waʼaurida. Datafaigi duma-duma moroi khö Gaberahamo. (Baso Yakobo 2:23.) Hana wa tobali ia si fahuwu khö Lowolangi? Teʼodane-dane wahuwusa Gaberahamo khö Lowalangi börö wamati, ba tobali ia ”tua zamati”. (Rom. 4:11) Na tafahaʼö ita ba duma-dumania, sofu khöu samösa, ’Hewisa enaʼö tola uʼoʼö wamati Gaberahamo hegöi ba wangaʼaroʼö fahuwusagu khö Yehowa?’

HANA WA TOBALI SI FAHUWU KHÖ YEHOWA GABERAHAMO?

3, 4. (a) Tutunö hadia wanandraigö sebua ba wamati Gaberahamo. (b) Hana wa itehegö Aberahamo tobali sumange Gizaʼaki?

³ Khalaigö atö me 125 fakhe ndröfi Gaberahamo, idaʼi-daʼi wofanö numalö ba hili.^[1] Igoʼö-goʼö moroi furi ononia Izaʼaki si 25 fakhe. Iʼohe geu galitö Izaʼaki ba Aberahamo zolohe rosö hegöi soguna tanö böʼönia ba wangewuaʼö alitö. Daʼa wondrege zafökhö si no irai itörö Aberahamo ba waʼaurinia, tenga börö me atua ia. Abölö ia nasa. Hizaʼi, börö me ibeʼe nononia tobali sumange khö Yehowa!​—I Moz. 22:1-8.

⁴ Daʼa wanandraigö sebua ba wamati Gaberahamo. So niha sangumaʼö wa lö sökhi Lowalangi andrö börö me iʼandrö khö Gaberahamo wameʼe ononia tobali sumange. So göi danö böʼö zangumaʼö wa lö iʼomasiʼö nononia Aberahamo, andrö wa ifalua daʼö. Lawaʼö daʼö börö me lö khöra famati ba lö laʼila hadia zindruhunia nifotöi famati. (I Kor. 2:14-16) Hizaʼi, ifalua daʼö Aberahamo tenga börö me nifaso ia, mazui tenga zi lö iʼangeraigö wamalua yaʼia. Ifalua daʼö börö me so khönia wamati sindruhu. Aboto ba dödönia wa lö irai iʼandrö khönia Yehowa wamalua hadia ia zi möi fangabu dödönia sagötö faʼara. Aboto ba dödö Gaberahamo na so khönia woloʼö, hasambalö ifahowuʼö ia Yehowa hegöi ono niʼomasiʼönia. Hewisa enaʼö tola aro wamati Gaberahamo? Moguna so khönia waʼaboto ba dödö hegöi si no irai itörö.

5. Hewisa wa tola tefahaʼö Gaberahamo sanandrösa khö Yehowa ba hadia lua-lua me so khönia waʼaboto ba dödö andrö?

⁵ Faʼaboto ba dödö. Ba mbanua Guri tumbu Gaberahamo. Hizaʼi, niha ba daʼö lafosumange lowalangi sofaya, simanö göi namania. (Yos. 24:2) Tobali, hewisa wa tola tefahaʼö Gaberahamo sanandrösa khö Yehowa? Ifatunö khöda Sura Niʼamoniʼö wa Aberahamo andrö ngaʼötö Semi, ono Noakhi. Lö si mate Semi me 150 fakhe ndröfi Gaberahamo. Iʼokhögö Semi wamati saro ba idunö-dunö khö zi tenga böʼönia sanandrösa khö Yehowa. Lö aboto sibai ba dödöda, hizaʼi tola manö ba daʼö tefahaʼö Gaberahamo sanandrösa khö Yehowa. Börö me so khönia waʼaboto ba dödö, andrö wa iʼomasiʼö Yehowa ba so khönia wamati.

6, 7. Ba zi no alua khö Gaberahamo, hana wa tola aro wamatinia?

⁶ Si no irai itörö. Hadia zi no irai itörö Aberahamo si möi fangaʼaroʼö wamatinia khö Yehowa? So zangumaʼö, hadia zi so ba wangera-ngera daʼö zi numalö ba dödö, moroi ba dödö oroma ba mbua-bua. Tefarou dödö Gaberahamo wamalua hadia zi no ifahaʼö ia sanandrösa khö Lowalangi, andrö wa ifosumange ”Yehowa, Lowalangi Fondrege Zalawa Samazökhi banua si yawa awö danö”. (I Moz. 14:22) Famosumange andrö mufotöi ia ba Zura Niʼamoniʼö ’fangataʼufi soroi ba dödö’. (Heb. 5:7) Moguna so khöda wangataʼufi soroi ba dödö enaʼö aro wahuwusada khö Lowalangi. (Zin. 25:14) Daʼa zamarou dödö Gaberahamo ba woloʼö li Yehowa.

⁷ Imane Lowalangi khö Gaberahamo hegöi Sara enaʼö laröi danö Guri ba lafawuʼa ira ba mbanua böʼö. No atua ira saʼae ba toröi ba nose-ose sandrohu faʼaurira. Hewaʼae iʼila Aberahamo wa oya deʼala ba waʼaurira dania, lö tebulö iʼoʼö li Yehowa. Börö me so khönia woloʼö, ifahowuʼö ba ilumöʼö ia Lowalangi. Duma-dumania me laraʼu woʼomonia si baga-baga sotöi Sara, ba me arakhagö labunu Gaberahamo, ifalua dandra sahöli-höli dödö Yehowa ba wolumöʼö yaʼira. Tenga ha sakali alua daʼa. (I Moz. 12:10-20; 20:2-7, 10-12, 17, 18) Aro wamati Gaberahamo börö zi no alua andre.

8. Enaʼö aro wahuwusada khö Yehowa, hadia zinangea tafalua ba wanöndra faʼaboto ba dödö hegöi si no irai alua?

⁸ Hadia tola fahuwu ita khö Yehowa? Tatu manö tola! Moguna tafahaʼö ita sanandrösa khö Yehowa, simane nifalua Gaberahamo. Ba ginötö andre, moguna khöda waʼaboto ba dödö hegöi si no irai alua, si so ba Zura Niʼamoniʼö. Abölö oya nasa niʼokhögöda iadaʼa moroi ba niʼokhögö Gaberahamo. (Dan. 12:4; Rom. 11:33) Oya waʼaboto ba dödö si so ba Zura Niʼamoniʼö sanandrösa khö ’Zamazökhi banua si yawa, awö danö’. Moroi ba zi no tafahaʼö yaʼita, tumbu waʼomasida khö Yehowa ba tafosumange ia. Daʼa zamarou tödöda woloʼö linia. Na tafalua daʼa, tola taʼila hewisa wolumöʼö hegöi famahowuʼönia yaʼita irege aro wamatida. Na soroi ba dödö tafalua halöwö Yehowa, so khöda waʼahono dödö, faʼohahau dödö, ba faʼomuso dödö. (Zin. 34:9; Gamd. 10:22) Itugu oya waʼaboto ba dödö hegöi si no tatörö, itugu aro wahuwusada khönia.

LALA GABERAHAMO BA WONDROROGÖ FAHUWUSANIA KHÖ LOWALANGI

9, 10. Hewisa enaʼö aro wahuwusada? (b) Hadia zangoromaʼö wa irorogö ba iʼaroʼö wahuwusania Gaberahamo khö Yehowa?

⁹ Fahuwusa saro no sambua harato sebua. (Baso Gamaedola 17:17.) Tenga simane naha mbunga sebua böli, niʼogunaʼö ha enaʼö moadu nomoda. Sindruhunia sa hulö simane mbunga si baga-baga, moguna idanö hegöi fondrorogö yaʼia enaʼö itugu tedou. Simanö göi Gaberahamo, iʼomasiʼö ba irorogö wahuwusania khö Yehowa. Hewisa wa tola ifalua daʼö?

¹⁰ Lö aetu-aetu Gaberahamo ba wangaroʼö fangataʼufinia soroi ba dödö hegöi ba woloʼö. Duma-dumania, me möi ia ba mbanua Ganaʼana fao nösi nomonia hegöi sohalöwö khönia. Iʼoʼö fefu wanuturu lala nibeʼe Yehowa khönia ba wangaʼi angetula sebua hegöi side-ide. Döfi tö fatua lö tumbu Gizaʼaki, me 99 fakhe ndröfi Gaberahamo, iʼoʼou ia Yehowa ba woboto fefu ndra matua si so ba nösi nomonia. Hadia aombö dödö Gaberahamo khö Yehowa mazui iʼalu-alui lala enaʼö lö ifalua niʼandrö Yehowa? Löʼö, faduhu dödönia khö Yehowa ba iʼoʼö ”meluo daʼö”.​—I Moz. 17:10-14, 23.

11. Hana wa abu dödö Gaberahamo sanandrösa ba mbanua Zodoma hegöi Gomora, ba hewisa wanolo Yehowa yaʼia?

¹¹ Börö me lö tebulö iʼoʼö li Yehowa Gaberahamo irugi ba wondrege zide-ide, itugu aro wahuwusara. Tola fahuhuo ia khö Yehowa gofu hadia ia, duma-dumania iʼandrö wanolo khö Yehowa na so wanofu-nofu dödönia. Me iwaʼö khönia Yehowa wa ifakiko mbanua Zodoma hegöi Gomora, abu sibai dödö Gaberahamo. Ataʼu ia na fao niha si sökhi ba waʼamate niha si lö sökhi. So so dödönia khö nono mbeneʼönia sotöi Loti hegöi soroi yomonia, si toröi ba mbanua Zodoma. Faduhu dödönia khö Yehowa, ”Sanguhuku ulidanö maʼasagörö”. Börö daʼö ifatunö khö Yehowa gabula dödönia andrö si fao fangide-ngideʼö. Lö mofönu Yehowa khönia ba ifatunö wa so khönia waʼahakhö dödö. Ifatunö Yehowa wa iʼalui niha si sökhi amuata ba iʼorifi ira fatua lö ifalua wanguhuku.​—I Moz. 18:22-33.

12, 13. (a) Hadia gunania khö Gaberahamo me so khönia waʼaboto ba dödö hegöi si no irai alua? (b) Hadia zangoromaʼö wa faduhu dödö Gaberahamo khö Yehowa?

¹² Fefu waʼaboto ba dödö hegöi si no irai alua khö Gaberahamo, daʼö zanolo yaʼia ba wangaʼaroʼö fahuwusania khö Yehowa. Aefa daʼö, me iwaʼö khönia Yehowa ba wameʼe ononia tobali sumange, iʼila Aberahamo wa so khö Yehowa waʼebolo dödö, faʼahakhö dödö, tola lafaduhusi tödö, ba ilumöʼö ira. Faduhu dödö Gaberahamo wa lö iʼozumaigö tobali Lowalangi si lö sökhi Yehowa! Hana wa tola tawaʼö daʼö?

¹³ Fatua lö iröi zohalöwö khönia, imane Aberahamo, ”Miʼiagö daʼe, awö galide, möiga misa mangandrö, daruaga ono, ba na noa daʼö, ba mafuliga khömi.” (I Moz. 22:5) Hadia geluaha wehede Gaberahamo andrö? Hadia falimo ia me iwaʼö wa mangawuli ia hegöi Gizaʼaki, hewaʼae sindruhunia möi ia ba wameʼe ononia tobali sumange? Löʼö. Imane Sura Niʼamoniʼö, aboto ba dödö Gaberahamo wa tola isusugi Gizaʼaki Yehowa moroi ba waʼamate. (Baso Heberaiʼo 11:9.) No iʼila samösa Aberahamo wa tola ibeʼe khöra ndraono Yehowa hewaʼae no atua ira. (Heb. 11:11, 12, 18) Iʼila wa lö si tebai khö Yehowa. Lö aboto ba dödö Gaberahamo hadia zalua me luo daʼö. Hizaʼi, mamati ia wa tola isusugi nononia Yehowa, ba alua zi no ifabuʼu Lowalangi. Andrö wa lafotöi Gaberahamo ”tua zamati”.

14. Hadia zi tobali daha-tahau ba wangaʼi halöwö khö Yehowa, ba hewisa wa tola tetolo ndraʼugö moroi ba duma-duma Gaberahamo?

¹⁴ Ba ginötö andre, lö iʼandrö khöda Yehowa ba wameʼe onoda tobali sumange. Iʼandrö khöda enaʼö taʼoʼö goroisania. Itaria lö aboto ba dödöda hana wa ibeʼe goroisa andrö mazui abua khöda ba woloʼö yaʼia. Hadia simane daʼö nirasoimö? So zangumaʼö wa abua halöwö fanuriaigö. Tola manö aila ira ma abua khöra wahuhuosa ba niha si lö irai falukha khöra. Tanö böʼönia, aila ira na faböʼö moroi ba nawöra wohalöwö mazui ba nawöra sekola. (II Moz. 23:2; I Tes. 2:2) Na laʼandrö khöu wamalua halöwö sabua, törö tödöu duma-duma wamati hegöi falöʼataʼu Gaberahamo. Na taʼangerönusi duma-duma ndra matua hegöi ira alawe si lö faröi, tola terou dödöda ba woloʼö amuatara hegöi ba wangahatöʼö yaʼita khö zi Fahuwu khöda, Yehowa.​—Heb. 12:1, 2.

SO HOWU-HOWU MOROI BA WAHUWUSA

15. Hana wa faduhu dödöda wa lö maniasa Gaberahamo me iʼoʼö li Yehowa?

¹⁵ Hadia maniasa Gaberahamo me iʼoʼö goroisa Yehowa? Imane Sura Niʼamoniʼö wa ’mate [Gaberahamo] ba waʼatua omasiö, no atua ia ba ahono dödönia’. (I Moz. 25:8, NW) Hewaʼae 175 fakhe ndröfinia, ahono dödönia ba zi no ifalua ba waʼaurinia. Hadia mbörö? Börö me abölö moguna khönia wahuwusa khö Yehowa moroi ba danö böʼö. Na tabaso wa ’no atua ia ba ahono dödönia’, tenga daʼö geluahania wa lö omasi ia auri ba zi so föna.

16. Hadia manö zomuso dödö Gaberahamo ba Waradaiso?

¹⁶ Imane Sura Niʼamoniʼö wa ”ibaze-bazeʼö sa mbanua andrö [Aberahamo], saro dane-dane, ba zi no möi tuka ba sotomo Lowalangi”. (Heb. 11:10) Faduhu dödö Gaberahamo wa samuza inötö dania hasambalö iʼila mbanua andrö, na mamatörö Mbanua Lowalangi ba gulidanö! Khalaigö atö hawaʼomuso dödö Gaberahamo na auri ia ba gulidanö Faradaiso ba itohugö wangaʼaroʼö fahuwusania khö Lowalangi. Omuso dödönia na iʼila wa famatinia andrö no tobali wangaroʼö ono mbanua Lowalangi ba zi ngahönö fakhe faʼara! Ba Waradaiso, awena iʼila dania Aberahamo wa so geluaha zumange nibeʼenia ba Hili Moria. (Heb. 11:19) Aboto ba dödönia dania wa faʼafökhö nirasoinia me ibeʼe Gizaʼaki tobali sumange, no tobali fanolo ba niha si hauga zuta faʼato ba wangila hewisa waʼafökhö dödö Yehowa me ibeʼe Nononia Yesu Keriso tobali höli ba niha gulidanö. (Yoh. 3:16) Duma-duma Gaberahamo zanolo yaʼita enaʼö taʼameʼegö tödö ba wangandrö saohagölö höli si no mubeʼe, börö me no daʼö waʼomasi sebua!

17. Hadia gangetula nihalöda, ba hadia nifatunöda ba duho aefa daʼa?

¹⁷ Böi tebulö taʼoʼö wamati Gaberahamo. Simane yaʼia, moguna so khöda waʼaboto ba dödö hegöi si no irai alua. Na lö aetu tafahaʼö ita sanandrösa khö Yehowa ba taʼoʼö niwaʼönia, tarasoi howu-howu hegöi folumöʼö nibeʼenia khöda. (Baso Heberaiʼo 6:10-12.) Yatobali si Fahuwu khöda Yehowa irugi zi lö aetu! Ba duho aefa daʼa, so tölu duma-duma nifatunöda sanandrösa ba niha samati si no tobali si fahuwu khö Lowalangi.