FAOSATÖ 18
Ifalua Dandra Sahöli-höli Dödö Yesu
Ba dandra sahöli-höli dödö nifalua Yesu, ba daʼö oroma hewisa wangogunaʼönia faʼabölö na mamatörö ia tobali Razo
IBEʼE Lowalangi waʼabölö khö Yesu ba wamalua tandra sahöli-höli dödö si tebai lafalua niha gulidanö. Oya dandra sahöli-höli dödö nifalua Yesu—sasesenia föna niha sato. Tandra sahöli-höli dödö andrö zangoromaʼö faʼabölö Yesu ba wolawa udu ba ba wangeheta sanaisi si tebai laheta niha gulidanö si lö moʼahonoa. Faigi duma-duma andre.
Ibeʼe gö niha ba idanö nibadu. Tandra sahöli-höli dödö si föföna nifalua Yesu, yaʼia daʼö ibaliʼö agu nidanö. Ba ginötö tanö böʼö dua kali ibeʼe gö niha solofo, ngahönö waʼato, ha maʼifu giʼa ba roti. Oya zi töra gö ba zi dua kali ibeʼe gö niha sato.
Ifadöhö wökhö. Ifadöhö Yesu ngawalö wamakao ”ba ngawalö wökhö fefu, awö ngawalö waʼatebai”. (Mataiʼo 4:23) Ifadöhö hörö zauʼa, tögi dalinga zafiso, sobou auri, saniri, sakela-kela ba tanö böʼönia. Lö fökhö si tebai ifadöhö.
Tola ifahono mbade. Me laʼötö nidanö Galilaia awö ndra nifahaʼönia, tohare mbade sabölö-bölö. Ataʼu ndra nifahaʼönia. Ha ifaigi mbade andrö Yesu ba imane, ”Böi hede-hede saʼae!, Honogöʼö!” Ba tebato nangi ba tobali ahono sibai. (Mareko 4:37-39) Ba ginötö tanö böʼö, mowaö-waö ia ba dete nidanö si so bade sabölö-bölö.—Mataiʼo 14:24-33.
Ifofanö mbekhu. Abölö mbekhu moroi ba niha. Ato niha si tebai mangefaʼö yaʼira moroi ba danga zi faʼudu khö Lowalangi andre. Hizaʼi, tenga ha sakali ifofanö mbekhu Yesu, enaʼö aheta ira ba niha nifakao-kaonia. Lö ataʼu Yesu khöra. Yaʼira zataʼu khö Yesu börö me no laʼila waʼabölönia.
Isusugi zi no mate. Faʼamate lafotöi ia ”safuria zi faʼudu”, börö me faʼamate andrö si faʼudu si tebai lalawa niha gulidanö. (I Korindro 15:26) Hewaʼae simanö, no isusugi zi no mate Yesu, isusugi nono matua ono lakha mbanua, isusugi göi nono alawe ono Yaʼiro. Sabölö ahöli-höli dödöda, me tesusugi Lazaro si fahuwu khö Yesu, ifalua daʼö föna niha sato si no abu tödö, hewaʼae no öfa bongi Lazaro ba lewatö! Si faʼudu khö Yesu lafaduhuʼö wa no ifalua dandra sahöli-höli dödö.—Yohane 11:38-48; 12:9-11.
Hana wa ifalua Yesu fefu dandra sahöli dödö andrö? Hadia tenga no ahori mate fefu niha nitolonia andrö? Atulö, hizaʼi, moguna dandra sahöli-höli dödö nifalua Yesu andrö ba zi so föna. Daʼö zangoromaʼö wa si ndruhu-ndruhu alua fefu zi no tefaʼeleʼö sanandrösa ba waʼa Razo Mesia. Lö mangiwa dödöda wa Razo si no ifataro Lowalangi tola iheta waʼolofo, fökhö, bade samakiko niha, bekhu, mazui faʼamate. No iforomaʼö wa no ibeʼe khönia waʼabölö Lowalangi ba wamalua daʼö.