Keriso—Faʼabölö Lowalangi

1. Hana wa iwaʼö Faulö ”Ba no keriso, waʼabölö Lowalangi”?

MOROI ba ngawalö nifalua Yesu oroma waʼabölö Yehowa. Me so Yesu ba gulidanö, oya dandra sahöli-höli dödö nifaluania. So ösa zi no tesura ba Zura Niʼamoniʼö, na tabaso ia, itugu aro wamatida. (Mataiʼo 9:35; Luka 9:11) No ibeʼe Yehowa waʼabölö khö Yesu. Imane Faulo, ”Ba no Keriso, faʼabölö Lowalangi”. (I Korindro 1:24) Hizaʼi, hadia lua-luania khöda dandra sahöli-höli dödö andrö?

2. Hadia niʼlada moroi ba dandra sahöli-höli dödö nifalua Yesu?

² Iʼombakhaʼö Fetero wa no ifalua Yesu ’dandra sahöli-höli’ dödö. (Halöwö Zinenge 2:22) Ba daʼa aboto ba dödöda hadia nifalua Yesu ba wamatörönia si hönö fakhe faʼara. Oya nifalua Yesu dania dandra sahöli-höli dödö soguna ba niha gulidanö. Tandra sahöli-höli dödö nifalua Yesu daʼö zamahaʼö yaʼita sanandrösa ba gamuatania hegöi amania. Ba duho daʼa, so tölu ngawalö dandra nifalua Yesu si tobali famahaʼö khöda iadaʼa hegöi ba zi so föna.

TANDRA SAHÖLI-HÖLI DÖDÖ ZAMAHAʼÖ YAʼITA ENAʼÖ SO KHÖDA WAʼOBÖWÖ

3. (a) Hana wa ifalua Yesu dandra sahöli-höli dödö si föföna? (b) Hewisa Yesu ba wangoromaʼö faʼoböwönia ba mbanua Kana?

³ Ifalua dandra sahöli-höli dödö siʼoföna sibai Yesu meʼalua walöwa ba mbanua Kana. Ba ginötö daʼö, lö laʼila hadia mbörö, wa agu nibadu lö abönö. Tola manö aila zamalua falöwa andrö, börö me yaʼira zangehenaigö gö niʼa ba nibadu. Ina Yesu sotöi Maria, samösa dome me luo daʼö. Iʼandrö khö Yesu enaʼö so nifaluania. Tola manö so ba wangera-ngerania, wa tola ifalua hadia ia Yesu börö me so khönia waʼabölö. Börö me iʼangeraigö wamaʼeleʼö sanandrösa khö nononia, ba iʼila wa hasambalö lafotöi ia ”Nono Wondrege Zalaŵa”. (Luka 1:30-32; 2:52) Si ndruhunia, Maria hegöi Yesu omasi sibai latolo niha samalua falöwa andrö. Tobali, ifalua dandra sahöli-höli dödö Yesu, ibaliʼö idanö zi 380 liter tobali ”nagu si sökhi”. (Baso Yohane 2:3, 6-11.) Hadia foʼömö Yesu wamalua tandra sahöli-höli dödö andrö? Löʼö. Ifalua daʼö börö me so khönia waʼomasi ba niha, ba no iʼoʼö faʼoböwö namania.

4, 5. (a) Hadia zi tobali famahaʼö khöda moroi ba dandra sahöli-höli dödö si föföna nifalua Yesu? (b) Moroi ba dandra sahöli-höli dödö nifalua Yesu ba Kana, hadia nidöna-dönada dania ba gulidanö si bohou?

⁴ Ifalua Yesu dandra sahöli-höli dödö ba wangasogö agu si sökhi ba niha sato. Hadia zi tobali famahaʼö khöda moroi ba dandra sahöli-höli dödö andrö? Lö atali Yehowa hegöi Yesu. Oböwö sibai ira. Daʼa zangoromaʼö khöda wa aboto ba dödö Yehowa ba Yesu hadia zalua khöda. Iʼogunaʼö waʼabölönia Yehowa ba wangasogö fefu ngawalö gö ba gulidanö si bohou, gofu hezo toröi ita.—Baso Yesaya 25:6.

⁵ Angeraigö atö: Ba zi lö aratö, iʼasogö Yehowa fefu ngawalö zoguna khöda. Ero samösa niha laʼokhögö nomo si sökhi ba ö si sökhi. Ba ginötö taʼangeraigö fefu daʼö taʼandrö sibai saohagölö khö Yehowa börö me ibeʼe khöda gulidanö Faradaiso.

6. Ha ökhö iʼogunaʼö waʼabölönia Yesu? Hewisa enaʼö taʼoʼö nifaluania?

⁶ Lö irai iʼogunaʼö waʼabölönia Yesu ba wangalui tana khönia samösa. Duma-dumania, me itandraigö Yesu Afökha, enaʼö ibaliʼö gara tobali roti, lö igoʼö. (Mataiʼo 4:2-4) Hizaʼi, iʼogunaʼö waʼabölönia Yesu ba wanolo niha böʼö. Hewisa ita ba woloʼö amuata Yesu si lö mangalui tana khönia? Imane Yesu enaʼö so khöda wa oböwö. (Luka 6:38) Tola tafalua daʼa na takaoni ndra talifusöda enaʼö manga ira ba nomoda. Tola göi tabeʼe ginötöda ba wanolo ira talifusöda na no awai gangowuloa. Duma-dumania, na so dalifusöda samomaha yaʼia ba huhuo sebua tola tabeʼe ginötöda ba wamondro-ndrongo. Mazui, tatolo ndra talifusöda ba wanuriaigö. Taʼodödögö wamalua hadia nifalua Yesu enaʼö tatolo ndra talifusöda ndrege zi tola ita.

”MANGA BA TEʼABUSOIʼÖ IRA FEFU”

7. Hadia gabula dödö si lö aefa-aefa ba gulidanö si so Afökha andre?

⁷ Tenga sawena nifotöi faʼanumana. Iʼombakhaʼö Yehowa khö ndraono Gizaraʼeli ”löʼö sa aefaʼaefa, wa so ba danö zi numana”. (V Moze 15:11) Ngaotu fakhe aefa daʼö, imane Yesu ”Löʼö sa mamalöʼmalö khömi zi numana.” (Mataiʼo 26:11) Hadia daʼö geluahania hasambalö so niha si numana ba gulidanö andre? Löʼö, eluaha niwaʼö Yesu hasambalö so waʼanumana sagötö so ita ba gulidanö si so Afökha. Hizaʼi, no faböʼö dania ba gulidanö si bohou! Ba ginötö daʼö, lö hadöi saʼae faʼanumana. Fefu niha ba luo daʼö ahori so zoguna khöra ba lö faʼolofo saʼae!

8, 9. (a) Hana wa ibeʼe Yesu gö niha sato si lima ribu? (b) Hadia zi tola öhalö wamahaʼö khöu ba ginötö öbaso dandra sahöli-höli dödö andrö?

⁸ Imane Dawido sanandrösa khö Yehowa, ”Öbokai dangau ba öʼabusoiʼö fefu zauri somasi ira.” (Zinunö 145:16) Me so ia ba gulidanö, moʼahonoa Yesu wamalua amuata namania ba iʼonorogö tödö zoguna ba niha gulidanö. Ifalua daʼö fefu tenga ha ba wangoromaʼö wa so khönia waʼabölö. Iʼonorogö tödö sibai Yesu niha gulidanö. Da tatutunö ba Mataiʼo 14:14-21. (Baso.) Meluo daʼö, ato niha si fao khö Yesu moroi ba mbanua si faböʼö-böʼö. (Mataiʼo 14:13) Me no bongi, abu dödö ndra nifahaʼönia ba wamaigi niha si fao khöra marase waʼolofo. Laʼandrö khö Yesu enaʼö ifofanö niha sato andrö ba wo wöli göra. Hadia nifalua Yesu?

⁹ Lima roti ba dua rozi giʼa, ibeʼe gö niha si lima ribu Yesu. Hana wa ifalua Yesu dandra sahöli-höli dödö andre? Börö me si ndruhu-ndruhu iʼomasiʼö ba iʼonorogö tödö fefu niha. Oya gö niʼasogö Yesu, me luo daʼö, andrö wa ”manga ira ba abuso fefu”. Daʼö mbörö wa tola abölö mangawuli ira. (Luka 9:10-17) Me no abuso ira, so 12 kude gakhö-khöla si toröi nasa!

10. Ba zi so föna, hadia zalua ba waʼanumana?

¹⁰ Börö ndra samatörö ba gulidanö andre zangalui tana khöra, ngaotu zuta niha si numana. So ndra talifusöda sambö balazo. Hizaʼi, ba zi lö aratö, niha sangataʼufi Yehowa toröi ira ba gulidanö si lö mangalui tana khönia mazui si lö faʼanumana. Yehowa yaʼia daʼö Lowalangi Fondrege Zabölö si tola mangaʼasogö soguna ba niha fefu. No ifabuʼu Yehowa wa iheta dania wamakao!—Baso Zinunö 72:16.

11. Hana wa faduhu dödöda wa iʼogunaʼö waʼabölönia Yesu ba zi sagörö ulidanö? Börö daʼö, hadia gohitö dödömö?

¹¹ Tölu fakhe amatonga Yesu ba gulidanö ifalua dandra sahöli-höli dödö ba mbanua sigide-ide misa. (Mataiʼo 15:24) Hizaʼi, börö me Razo ia, itolo niha gulidanö ba ginötö Wamatörönia si Saribu Fakhe. (Zinunö 72:8) Faduhu dödöda wa iʼogunaʼö waʼabölönia Yesu wamalua tandra sahöli-höli dödö ba zoguna khöda. Hewaʼae lö khöda faʼabölö ba wamalua tandra sahöli-höli dödö, hadia zi tola tafalua? Tola taʼogunaʼö ginötö ba faʼabölöda ba wangombakha ba niha fefu sanandrösa hadia zalua ba zi so föna si no ifabuʼu Sura Niʼamoniʼö. Daʼö no sambua noro dödöda me yaʼita Samaduhuʼö Yehowa. (Roma 1:14, 15) Na taʼangeraigö hadia zi lö aratö nifalua Yesu, tatu manö owölö-ölö ita ba wanuriaigö.—Zinunö 45:2; 49:4.

YEHOWA BA YESU SO KHÖRA WAʼABÖLÖ BA WAMATÖRÖ ULIDANÖ

12. Hana wa faduhu dödöda wa iʼila Yesu hadia zalua ba gulidanö andre?

¹² Ba ginötö iwöwöi gulidanö Lowalangi hegöi ösinia, Yesu ”duka khönia”. (Gamaedola 8:22, 30, 31; Kolose 1:15-17) Aboto ba dödö Yesu hadia zalua ba gulidanö. Aboto ba dödönia hewisa wangogunaʼö ba famatörö simane asi, teu, angi ba tanö böʼönia.

13, 14. Beʼe duma-duma waʼabölö Yesu ba wamatörö salua ba gulidanö andre.

¹³ Me so Yesu ba gulidanö, oroma waʼabölö siʼotarai lowalangi ba nifaluania. Duma-dumania, datafaigi hewisa Yesu me ifahono mbade. (Baso Mareko 4:37-39.) Samösa zatua-tua ba Daromali, itutunö ba li Yunani, ngawua wehede ”mbade” ba buku Mareko eluahania angi sabölö-bölö. Bade si fao lawuo, angi sabölö-bölö, gari mbanua, ba teu sabölö-bölö. Me no alua daʼö fefu hadia ia ahori tekiko. Iʼamaedolagö Mataiʼo simane ”bade sabölö”.—Mataiʼo 8:24.

¹⁴ Datakhalaigö atö: Möi yawa mbade bakha ba göfa. Hewaʼae so mbade sabölö-bölö ba moloyo göfara misa, ilau manö mörö Yesu börö me no erege dödönia. Ataʼu ndra nifahaʼönia, ba lasusugi Yesu lamane, ”Tolo tua, tekiko ita!” (Mataiʼo 8:25) Hadia nifalua Yesu? Maoso ia itenawa nangi ba imane ba ndrulu, ”Böi hede-hede saʼae, honogöʼö!” (Mareko 4:39) Ahono mbade sabölö-bölö andrö ba ”tobali ahono sibai”. Salua andre zangoromaʼö wa so khönia waʼabölö ba tola ifatörö ngawalö zalua ba gulidanö andre!

15. Hewisa Yehowa ba wangoromaʼö wa tola ifatörö ngawalö zalua ba gulidanö?

¹⁵ Faʼabölö niʼokhögö Yesu moroi khö Yehowa, ba daʼö taʼila wa Lowalangi andrö Sebua Faʼabölö ba wamatörönia ulidanö. Duma-dumania, fatua lö anönö danö idanö, imane Yehowa, ”Hatö fitu bongi sa ba moteu ba gulidanö ubeʼe, öfa wulu ngaluo ba öfa wulu mbongi.” (I Moze 7:4) Aefa daʼö, II Moze 14:21 imane, ”Ahele nasi ibeʼe Yehowa, sara wongi manö ba angi sabeʼe si oroi ba gatumbukha luo.” Tabaso göi ba zura Yona 1:4 ”Ba ifatörö nangi sabeʼe ba nasi Yehowa tobali bade sabölö-bölö, ba nasi, hatö maʼifutö, ba aboto nowo.” Ha wa omuso dödöda me taʼila ba gulidanö sibohou dania, so waʼabölö khö Yehowa ba wamatörö fefu hadia ia.

16. Hana wa omuso dödöda me no taʼila wa Yehowa hegöi Yesu tola lafatörö fefu hadia ia zalua ba gulidanö andre?

¹⁶ Tatu manö omuso sibai dödöda me no taʼila wa so waʼabölö khö Yehowa hegöi Yesu ba wamatörö fefu hadia zalua ba gulidanö. Ba Wamatörö Yesu si Saribu Fakhe, fefu niha ba luo daʼö so waʼahono dödö. Lö hadöi niha si mate börö zalua ba gulidanö simane angi sabölö-bölö, tsunami, hili samoka mazui duru danö. Lö moguna ataʼu ita gofu hadia ia zalua börö ”nose Lowalangi” so ba gotalua niha! (Famaʼeleʼö 21:3, 4) Faduhu dödöda wa no ibeʼe waʼabölö Yehowa khö Yesu ba wamatörö hadia ia zalua ba gulidanö andre ba zi Saribu Fakhe faʼara.

TAʼOʼÖ LOWALANGI HEGÖI YESU IADAʼA

17. Hadia zi tola tafalua ba woloʼö Lowalangi hegöi Yesu iadaʼa?

¹⁷ Tatu manö tebai tatimbagö fefu ngawalö hadia ia zalua ba gulidanö andre. Ha Yehowa ba Yesu si tola wo timbagö daʼö. Hizaʼi, so zi tola tafalua. Tola taʼoʼö hadia niwaʼö ba zura Gamaedola 3:27. (Baso) Ba ginötö alua wangabu dödö khö ndra talifusöda, tola tatolo ira ba wameʼe soguna khöra, ba tarara dödöra. (Gamaedola 17:17) Duma-dumania, tatolo ira ba ginötö alua khöra wangabu dödö. Imane samösa talifusöda lakha mbanua si no tekiko omo ba ginötö alua nangi sabölö-bölö, ”uʼandrö sibai saohagölö me no so ndraʼo ba gotalua Zamaduhuʼö Yehowa, tenga ha latolo ndraʼo ba zoguna khögu, latolo ndraʼo ba wamati.” Samösa dalifusöda ira alawe si no aetu fanötöna börö me no tekiko nomonia ba nangi sabölö-bölö. Börö wanolo moroi khö ndra talifusöda, imane wangumaʼö ”Ahöli-höli sibai dödögu! Lö uʼila hadia zinangea uwaʼö börö waʼomuso dödögu.” Imane nasa, ”Saohagölö Yehowa!” Taʼandrö sibai saohagölö khö ndra talifusöda börö me no laʼameʼegö tödö ndra talifusöda si göna abula dödö. Abölö sibai taʼandrö saohagölö khö Yehowa hegöi khö Yesu börö me so so ba dödöra ita.

18. Hana wa adöni dödöu me ifalua dandra sahöli-höli dödö Yesu?

¹⁸ Sagötö fanuriaigö Yesu ba gulidanö, daʼö zangombakhaʼö khöda wa yaʼia andre no ”faʼabölö Lowalangi”. Lö irai iʼogunaʼö waʼabölönia Yesu ba wangalui tana khönia. Hizaʼi, iʼogunaʼö Yesu waʼabölönia ba wamalua tandra sahöli-höli dödö börö waʼomasinia niha gulidanö. Tafatunö ba migu fönada.