Hadia Halöwö ndra Enoni?

Moloʼö Sura Niʼamoniʼö, so dombua faosatö zangai halöwö bakha ba gangowuloa niha Keriso, yaʼia daʼö ”satua ba enoni”. (Filifi 1:1) Si toʼölönia, ero sambua angowuloa so ndra satua sokubaloi so göi ndra enoni. Hadia halöwö nifalua ndra enoni?

Manolo ira satua sokubaloi. Ira enoni he satua he sawuyu-wuyu nasa, yaʼira andre si so fangera-ngera si sökhi ba wamati, abeʼe dödöda ira, ba laʼonorogö tödö halöwöra. Lö aetu lafalua halöwö soguna ba nono mbanua Lowalangi ba Nahia Gorahua Mbanua Lowalangi. Börö zimanö, ira satua sokubaloi tola laʼosambuaʼö wangera-ngerara ba halöwö famahaʼö ba fokubaloi ono mbanua Lowalangi.

Oya halöwö nifaluara. So ba gotalua ndra enoni mohalöwö ira ba wotemaʼö simöi ba nahia gangowuloa. So göi zohalöwö ba wangebuaʼö li, so göi zombagi buku, sololohe kefe, ba sotatugöi hezo mbanua möi ba wanuriaigö. Latolo göi wangehaogö Nahia Gorahua Mbanua Lowalangi. Tola laʼandrö khöra ira satua sokubaloi enaʼö latolo niha sagatua. Sinangea na lafosumange genoni börö me no aoha gölöra wamalua halöwö nibeʼe khöra.​—I Timoteo 3:13.

Labeʼe ira duma-duma si sökhi ba niha Keriso. Latuyu genoni andrö börö gamuatara si sökhi. Na inötö lafaʼema huhuo ba gangowuloa niha Keriso, tola aro ndraʼaga ba wamati. Börö me no labeʼe ira d̀uma-duma ba halöwö fanuriaigö, tefarou göi dödöma. Börö me omasi ira falulu fohalöwö, daʼö zondrouʼö faʼomuso dödöma ba sangaʼasogö khöma fahasara dödö. (Efeso 4:16) Samuza inötö, tola göi tobali ira satua sokubaloi.

• Hewisa ndra talifusö ira matua simöi enoni andrö?

• Hewisa wa tola fao ira ba wamalua fefu halöwö bakha ba mbanua niha Keriso?