Hana Wa Itehegö Lowalangi Waʼalösökhi ba Famakao?

1. Hamega ibörögö so waʼalösökhi?

Ibörögö so waʼalösökhi ba gulidanö meʼinötö ilimo Khawa Afökha. Ba mböröta, Satana andrö malaʼika soʼahonoa. Tobali, ”Lö niʼagönia si duhu.” (Yohane 8:44) Omasi ia na labeʼe khönia zumange, si ndruhunia, ha Lowalangi zinangea manema sumange. Falimo zatana khö ndraʼalawe si föföna sotöi Khawa, ihaogö wangai tödö Khawa enaʼö iʼoʼö niwaʼönia, tenga niwaʼö Lowalangi. Ba fao göi Gadamo ba wolawa Lowalangi. Lua-lua gangetula nifalua Gadamo iʼaʼasogö wamakao ba faʼamate.​—Baso I Moze 3:1-6, 19.

Me inötö ilimo Khawa Satana ba wolawa Lowalangi, ifarou niha ba wolawa famatörö Lowalangi, ma dadaomania ba waʼasalawa. Ato niha gulidanö soloʼö khö Gafökha lö omasi ira na Lowalangi zamatörö yaʼira. Börö daʼö, Afökha zi tobali samatörö ulidanö iadaʼa.​—Baso Yohane 14:30; I Yohane 5:19.

2. Hadia lö moʼahonoa nifazökhi Lowalangi?

Fefu nifazökhi Lowalangi oi moʼahonoa. Malaʼika he göi niha moʼahonoa wa mazökhinia yaʼira ba tola lafalua zomasi Lowalangi. (V Moze 32:4, 5) No ibeʼe khöda waʼatua-tua Lowalangi meʼifazökhi ita enaʼö tola tafili zi sökhi mazui si lö sökhi. Andrö tebeʼe khöda ginötö ba wangoromaʼö faʼomasida Lowalangi.​—Baso Yakobo 1:13-15; I Yohane 5:3.

3. Hana wa itehegö Lowalangi wangabu dödö ba niha irugi iadaʼa?

Noʼara ginötö nitehegö Lowalangi ba niha solawa famatörönia. Hadia mbörö? Ba wangoromaʼö na lö yaʼia, löhadöi famatörö si tola mangohahauʼö tödö niha gulidanö. (Zangombakha 7:29; 8:9) Meno aefa 6.000 (ö nö ribu) fakhe ba zilalö badaʼö taʼila wa famatörö niha ambö sökhi. Samatörö ba gulidanö andre tebai laheta wasuwöta, faʼalösökhi, falöʼatulö, ba fökhö.​—Baso Yeremia 10:23; Roma 9:17.

Famatörö Lowalangi iʼaʼasogö howu-howu ba niha somasi ba sangataʼufi yaʼia. (Yesaya 48:17, 18) Ba zi lö aratö, iheta fefu wamatörö niha Yehowa. Niha sangataʼufi ba somasi famatörö Lowalangi daʼö zauri ba gulidanö.​—Yesaya 11:9. Baso Danieli 2:44.

Faigi video Hana Wa Itehegö So Wamakao Lowalangi?

4. Börö waʼebolo dödö Lowalangi, hadia ginötö nitehegönia khöda?

Iwaʼö Satana wa samösa lö sangataʼufi Yehowa soroi ba dödö. Hadia tola öʼoromaʼö wa faya niwaʼö zatana andrö? Tola! Börö meʼebolo dödö Lowalangi, tebeʼe khöda ginötö ba wangoromaʼö ba waʼaurida hezo nifilida hadia famatörö Lowalangi ma famatörö niha.​—Baso Yobi 1:8-12; Gamaedola 27:11.

5. Hadia dandra wa Lowalangi zi no tafili samatörö yaʼita?

Tandra wa Lowalangi nifilida tafosumange ia, taʼalui zomasi ia siʼodane-dane moroi ba Zura Niʼamoniʼö, Taromalinia. (Yohane 4:23) Tandra wa tatimba Gafökha böi fao ita ba wasuwöta ba bagorahua si lö faʼawö khö Lowalangi, taʼoʼö simane nifalua Yesu meföna.​—Baso Yohane 17:14.

Iʼogunaʼö waʼabölönia Afökha ba wamarou tödö niha wamalua horö ba bawamaʼala yaʼita. Na lö tafalua gamuata simane daʼö, laʼo aya ita ira si fahuwu khöda awö zoroi yomoda. (I Fetero 4:3, 4) Hizaʼi, yaʼita zo tatugöi. Hadia fao ita ba niha sangomasiʼö Lowalangi? Hadia ta goʼö goroisania si tobali fangoromaʼö waʼomasi ba faʼatua-tuania? Nasimanö, taforomaʼö wa faya niwaʼö Gafökha wa lö hadöi niha samosumange Lowalangi na göna ia fanandraigö.​—Baso I Korindro 6:9, 10; 15:33.

Börö waʼomasi Lowalangi niha gulidanö, hasambalö iheta waʼalösökhi ba famakao. Dozi samati ba daʼö, lasöndra waʼauri si lö aetu ba gulidanö.​—Baso Yohane 3:16.