FAMAHAʼÖ 4
Iʼomusoiʼö Dödö Namania hegöi Yehowa
Hadia nifabuʼu Yefita khö Yehowa?
Omasi nono Yefita wanolo amania wamalua si no ifabuʼu, hewaʼae afökhö
Hadia no öʼila nono alawe ba gambara andre?— Yaʼia andre ono Yefita. Lö nifatunö Zura Niʼamoniʼö haniha döi nono alawe andrö, hizaʼi, imane ba Zura Niʼamoniʼö wa no iʼomusoiʼö dödö namania hegöi Yehowa. Databaso waö-waöra andre.
Yefita andre ira matua si sökhi bua-bua. Asese ifahaʼö nononia alawe sanandrösa khö Yehowa. Yaʼia andre göi ira matua sabölö ba sondröniaʼö si sökhi. Andrö wa lafili ia iraono Gizaraʼeli tobali sondröniaʼö yaʼira ba wasuwöta.
Samuza inötö, mangandrö Yefita khö Lowalangi fatua lö möi ia fasuwö. Ifabuʼu Yefita, na möna ia, niha siʼoföna möi baero ba wamaondragö yaʼia, ibeʼe khö Yehowa tobali sumange. Toröi ia ba gosali Lowalangi sagötö faʼaurinia. Osali andrö nahia wamosumange Lowalangi ba ndraono Gizaraʼeli. Duhu sa, möna Yefita! Haniha ziʼoföna möi mamaondragö Yefita me mangawuli ia ba nomo?—
Atulö, ononia alawe! Ono si ha sambua khö Yefita, iadaʼa itehe mofanö ia Amania. Abu sibai dödö Yefita. Hizaʼi, no ifabuʼu Yefita khö Yehowa. Imane ononia alawe khö Yefita, ’He Ama, na no öfabuʼu khö Yehowa, ba hasambalö öfalua khögu zimane daʼö.’
Ero röfi, möi nono alawe tanö böʼö wamaigi ono Yefita
Abu sibai göi dödö nono Yefita. Ba gosali, tebai möi ia nihalö ba moʼono. Hizaʼi, itolo namania ba wamalua si no ifabuʼu ba iʼomusoiʼö dödö Yehowa. Iröi nomora, möi ia ba gosali ba wangaʼi halöwö Yehowa sagötö faʼaurinia, me daʼö halöwö sabölö sökhi moloʼö yaʼia moroi na möi ia nihalö ba moʼono.
Moloʼö yaʼugö, hadia omuso dödö namania hegöi Yehowa ba nifaluania?— Tatu manö! Tola göi öfalua zimane daʼö. Tola öʼomusoiʼö dödö zatuamö hegöi Yehowa na öʼomasiʼö ba öʼoʼö li Yehowa.