FAMAHAʼÖ 13
Omasi Dimoteo Wanolo Niha Böʼö
Timoteo andrö ono matua somasi manolo niha. Oya mbanua itöröi ba wanolo niha böʼö. Andrö wa so khönia waʼohahau dödö. Hadia omasiʼö öʼila waö-waönia?—
Lafahaʼö Dimoteo inania ba awenia sanandrösa khö Yehowa
Ba Lisitera toröi Dimoteo. Iʼotarai meʼide-ide ia, no ifahaʼö ia gawenia Loise ba inania Oinike sanandrösa khö Yehowa. Andrö omasi Dimoteo itolo niha böʼö ba wamahaʼö yaʼira ba Daromali Yehowa.
Me iraono Dimoteo, isofu khönia Faulo hadia omasi ia fao wanuriaigö ba mbanua tanö böʼö. Imane Timoteo, ’Omasido!’ Omasi möi Dimoteo ba wanolo niha böʼö.
Möi Waulo ba Timoteo ba mbanua Desalonika si so ba Makedonia. Aröu latörö tanö, aefa daʼö latörö göfa nasi, awena larugi mbanua andrö. Lafahaʼö niha sanandrösa khö Yehowa ba daʼö. Hizaʼi, so niha sofönu khöra ba samakao yaʼira. Andrö wa mofanö Waulo ba Timoteo, möi ira manuriagö ba mbanua böʼö.
Ohahau sibai dödö Dimoteo
Haʼuga waŵa aefa daʼö, iʼoʼou Dimoteo Faulo weʼamöi ba Desalonika wamaigi ira talifusö si so ba daʼö. So nasa niha si fatiu tödö khönia ba Desalonika. Hewaʼae simanö, hasambalö möi Dimoteo ba mbanua andrö börö me so so dödönia khö ndra talifusö ba daʼö. Ifatunö Timoteo khö Waulo wa lö hadia ia khö ndra talifusö si so ba mbanua andrö!
Ara falulu fohalöwö Dimoteo khö Waulo. Moloʼö Faulo, Timoteo zinangea manolo ira talifusö ba gangowuloa niha keriso. Hadia mbörö? Börö me Timoteo iʼomasiʼö Yehowa hegöi ira talifusö tanö böʼö.
Hadia omasi ndraʼugö ötolo niha böʼö ba wamahaʼö yaʼira sanandrösa khö Yehowa?— Na öfalua daʼö, ohahau dödöu simane Timoteo!