Rorogö Wahuwusa si Sökhi khö Nama ba Ina Matuau

Na no mangowalu ami, no mifasindro wongambatö si bohou. Lö aetu miʼomasiʼö ba mifosumange zatuami, hizaʼi, iadaʼa, foʼomou zabölö öʼosinangegö ba waʼauriu. Tola manö lö fatema ba dödö zatuami zimane daʼö. Tobali, goi-goi Zura Niʼamoniʼö zi tola manolo yaʼami ba wondrorogö fahuwusa si sökhi khöra, hegöi ba dalifusö tanö böʼö, gasa-gasa wangaʼaroʼömi fongambatö si bohou.

1 OKHÖGÖ WANGERA-NGERA SI SÖKHI KHÖ NAMA BA INA MATUAU

HADIA NIWAʼÖ ZURA NIʼAMONIʼÖ: ”Fosumange namau awö ninau.” (Efeso 6:2) Gofu haʼuga ndröfiu iadaʼa, böi tebulö öfosumange zatuau. So zatua ngambatöu göi sinangea iʼosinangegö. ”Faʼomasi andrö lö iʼafökhöi tödö nawönia”, böi afökhö dödöu na öʼila fahuwu ngambatöu khö zatuania.—I Korindro 13:4; Galatia 5:26.

SI TOLA ÖFALUA:

• Böi waʼö wehede, ”Laʼosiwawöi manö ndraʼo ösi nomou” mazui ömane ”Lö irai omasi ninau ba nifaluagu andre”

• Tandraigö angeraigö simane niʼangeraigö ngambatöu

2 TARIA FATANDRO NA MOGUNA

HADIA NIWAʼÖ ZURA NIʼAMONIʼÖ: ”Iʼerogö ndra amania inania niha, ba molemba ia ba ngambatönia, ba tobali ha sambua boto ira.” (I Moze 2:24) Na no mangowalu ndraʼugö, tola manö so ba dödö zatua wa lö aefa larorogö ndraʼugö nasa. Lahalö khöra na so zalua ba nomomi si tenga sinangea lafalua.

Yaʼami zangai angetula hezo zi tola larongo ba hezo zi tebai. Aefa daʼö, haogö liu ba wamatunö khöra. Böi mibiniʼö zi so ba dödömi, ba böi miʼofönu. (Gamaedola 15:1) Fangide-ngideʼö, fehede nihaogö, ba faʼebolo dödö, daʼö zanolo yaʼami enaʼö fahuwu ami khö nama ba ina matuami ba ”faoma mibologö dödömi khö nawömi, miʼomasiʼö ia”.—Efeso 4:2.

SI TOLA ÖFALUA:

• Na öʼila wa no lahalö khöra satuami zalua ba nomomi, fatunö khö woʼomou ba ginötö si tefaudu

• Mihalö wahasara dödö hewisa wangasiwaisi na alua zimane daʼö