Duʼu Sakhozi

Me 40 fakhe Moze, toröi ia ba Midiano. Mangowalu ia ba tumbu khönia ndraono. Samuza maʼökhö me itarogö mbiri-biri ahatö ba Hili Zinaʼi, iʼila sambua zahöli-höli dödö. So ndruʼu sakhozi ba galitö, hizaʼi lö ariri! Me ifahatö ia Moze wamaigi salua andrö, irongo li moroi bakha ba ndruʼu sakhozi andrö: ’He Moze! Böi fahatö ndraʼugö. Heta zandralamö, börö me tanö niʼamoniʼö zi so yaʼugö.’ Yehowa zi fahuhuo daʼö, iʼogunaʼö malaʼika.

Börö waʼataʼu, ibalugö mbawania Moze. Aefa daʼö imane si hede andrö, ’No anehe ndraʼo wamakao ndraono Gizaraʼeli. Uʼefaʼö ira moroi ba niha Miserai, ba uʼohe ira ba danö si sökhi. Yaʼugö zondröniaʼö banuagu ba wangeheta yaʼira moroi ba danö Miserai.’ Tatu manö tokea Moze.

Manofu Moze, ’Na lasofu khögu haniha zamatenge yaʼo, hadia ubeʼe fanema li?’ Imane Lowalangi, ’Fatunö khöra wa Yehowa zamatenge yaʼugö, Lowalangi Gaberahamo, Izaʼaki ba Yakobo.’ Aefa daʼö imane Moze, ’Hewisa na lö lafondrondrongo niwaʼögu?’ Ibeʼe dandra Yehowa khö Moze wa hasambalö itolo ia. Iwaʼö khö Moze ba wamazaumba siʼonia tou ba danö. Siʼo daʼö tobali ulö! Me igogohe giʼo gulö daʼö Moze, ifuli zui tobali siʼo. Aefa daʼö imane Yehowa, ’Tandra sahöli-höli dödö andre zangoromaʼö wa yaʼodo zamatenge yaʼugö.’

Imane Moze, ’Lö onekhedo fahuhuo.’ Fazazi khönia Yehowa, ’Ufatunö khömö hadia zinangea öwaʼö, ba ufatenge gaʼamö Aʼaroni ba wanolo yaʼugö.’ Börö me iʼila wa itolo ia Yehowa, andrö mangawuli Moze ba danö Miserai iʼohe ndraono hegöi foʼomonia.