Felendrua Zamauze

Laröi Hili Zinaʼi iraono Gizaraʼeli ba mofanö ira ba Gadesi. Latörö danö si mate Farana. Imane Yehowa khö Moze ba Gadesi, ’Fatenge 12 ndra matua, samösa ero sambua mado, ba wamaigi tanö Ganaʼana. Ubeʼe ba ndraono Gizaraʼeli danö daʼö.’ Tobali, ifili 12 ndra matua Moze, imane khöra, ’Miʼaeʼe ba Ganaʼana. Mifaigi, hadia atabö zinanö ba daʼö mazui löʼö, hadia agabölö nihania mazui tebai, ba hadia toröi ira ba nose mazui ba mbanua sebua.’ Börö daʼö mofanö ba Ganaʼana zamauze si 12 andrö fao Yosua faoma Kalebi.

Me no 40 hari aefa daʼö mangawuli ira ba laʼohe mbua ara, delima, ba bua nagu. Lamane wangombakha, ’Baga sibai danö daʼö. Hizaʼi, nihania agabölö ba alawa sibai göli mbanua khöra.’ Aefa daʼö, imane Kalebi, ’Tola takalaisi ira. Aine möi ita ba daʼö iadaʼa!’ Moloʼö yaʼugö, hadia mbörö wa barani sibai Galebi? Börö me faduhu dödönia khö Yehowa. Simanö göi Yosua. Hizaʼi, samauze si dafulu faoma lamane, ’Böi! Yaʼira andrö egebua niha, ba wamaigira yaʼita andre hulö damo.’

Agataʼu ndraono Gizaraʼeli. Faoma lamane, ’Datafili zondröniaʼö yaʼita ba mangawuli ita ba Miserai. Na möi ita ba daʼö, hasambalö si mate ita.’ Lamane ira Yosua faoma Kalebi, ’Böi miʼataʼufi. Hasambalö taʼoʼö niwaʼö Yehowa börö me ilumöʼö ita.’ Hizaʼi, lö labeʼe dödöra iraono Gizaraʼeli, edöna labunu Yosua faoma Kalebi!

Hadia nifalua Yehowa? Imane khö Moze, ’No oya nifaluagu ba ndraono Gizaraʼeli, hizaʼi lö laʼoʼö niwaʼögu. Börö daʼö, lö aheta ira ba danö si mate sagötö zi 40 fakhe irege mate ira ba daʼö. Ha iraonora, ba Yosua faoma Kalebi zi toröi ba danö si no ufabuʼu.’