Mowaö-waö Yesu ba Dete Nidanö

Tenga ha asala ifadöhö niha sofökhö Yesu ba iʼorifi niha si no mate. Tola göi ifatörö nangi awö deu. Me no aefa mangandrö ia ba hili, ifaigi Nasi Galilaia Yesu ba iʼila wa mobade. So ba daʼö ndra sinengenia laforege woʼalukhaini tundraha ba wolawa angi. Möi tou Yesu ba ibörögö wofanö ba dete nidanö ifahatö ia ba dundrahara. Ataʼu ira me laʼila so zowaö-waö ba dete nidanö. Imane khöra Yesu, ’Böi miʼataʼufi. Yaʼodo daʼa.’

Imane Fetero, ’Na sindruhu-ndruhu yaʼugö daʼö Soʼaya, fatenge ndraʼo ba daʼö, möido khömö.’ Imane Yesu, ’Aine ba daʼa.’ Andrö, möi tou Wetero moroi ba dundraha itörö gotalua mbade mowaö-waö ia ba dete nidanö ba wangondrasi Yesu. Me arakhagö irugi, ifaigi mbade Fetero izumaigö ataʼu ia. Ibörögö ahöndrö ia. Muʼao ia, ’He Soʼaya, tolodo!’ Igogohe dangania Yesu aefa daʼö imane, ’Hana wa aombö dödöu? Hezo wamatimö?’

Möi yawa ba dundraha Yesu faoma Fetero ba tebato göi mbade. Khalaigö atö hewisa dödö ndra sinenge me luo daʼö ba lamane, ”Duhu wa Ono Lowalangi ndraʼugö.”

Tenga ha sakali daʼö itenawa mbade Yesu. Samuza inötö me latörö dundraha ira sinenge numalö yefo nasi, ba no mörö Yesu tanö furi dundraha. Tefaudu ba wemörönia alua mbade sabölö-bölö. Telobi mbade ba dundrahara ba möi yawa nidanö. Lasusugi Yesu ira sinenge muʼao ira, ’He samahaʼö, mate ita! Tolo ndraʼaga!’ Maoso Yesu ba mohede ia ba nasi andrö imane, ”Honogöʼö!” Iʼanemaiʼö tebato mbade ba ahono nasi. Imane Yesu khö ndra sinengenia, ’Hezo wamatimi andrö?’ Faoma lamane khö nawöra, ”Angi hegöi asi laʼoʼö linia.” Tobali famahaʼö daʼa khö ndra sinenge, na sindruhu-ndruhu faduhu dödöra khö Yesu, lö sinangea laʼataʼufi.