“Miʼabeʼeʼö Ami Wamati”

1. (a) Hadia zalua khö Wetero ba nidanö Galilaia? (Faigi gambara ba ngaʼörö 18.) (b) Hana wa ahöndrö Wetero?

BA ZI bongi, me laʼötö nidanö Galilaia ira Fetero ba nifahaʼö tanö böʼö, göna ira bade sabölö-bölö. Iʼanemai laʼila Yesu mowaö-waö ba dete nidanö. Mohede Wetero khö Yesu, hadia tola mowaö-waö ia ba dete nasi ba wangondrasi Yesu. Me iwaʼö khönia Yesu tola, möi tou Wetero moroi ba dundraha ba mowaö-waö ia ba dete nidanö iʼondrasi Yesu. Lö ara aefa daʼö ibörötaigö ahöndrö Wetero. Hadia mbörö? Börö me iʼila nangi ba bade sebua irege ataʼu ia. Muʼao Wetero ba wangandrö tolo, ba imane Yesu, ”He sambö famati, hana wa manufa dödöu?”​—Mataiʼo 14:24-32.

2. Hadia nifatunöda ba duho daʼa?

² So tölu ngawalö zinangea tafahaʼö ita so amakhaita ba wamati simane salua khö Wetero: (1) ba wamobörö, hana wa faduhu dödö Wetero wa itolo ia Yehowa, (2) hana wa awuwu wamati Wetero, (3) hadia zanolo Wetero enaʼö ifuli abeʼe ia ba wamati. Na tafahaʼö ita ba daʼa, ’tola abeʼe ita ba wamati’.​—I Korindro 16:13.

AMATI WA HASAMBALÖ ITOLO ITA LOWALANGI

3. Hana wa möi tou Wetero moroi ba dundraha, hadia geluahania khöda?

³ Abeʼe wamati Wetero. Me ikaoni ia Yesu, möi tou Wetero moroi ba dundraha ba mowaö-waö ia ba dete nidanö. Faduhu dödönia wa hasambalö itolo ia Lowalangi simane nifaluania khö Yesu. Simanö göi me ikaoni ita Yesu ba woloʼö yaʼia, talulu waʼaurida khö Yehowa ba tafabayagöʼö ita idanö. Hadia mbörö? Börö me mamati ita khö Yehowa ba khö Yesu, ba faduhu dödöda wa hasambalö latolo ita.​—Yohane 14:1; baso I Fetero 2:21.

4, 5. Hana wa moguna nifotöi famati?

⁴ Moguna sibai nifotöi famati. Börö me mamati Wetero, andrö wa tola mowaö-waö ia ba dete nidanö, si tebai lafalua niha gulidanö. Famati zanolo yaʼita ba wamalua si tebai lafalua niha gulidanö. (Mataiʼo 21:21, 22) Börö me no tafalalini gera-erada, niha sangila yaʼita me föna, laʼila wa no faehu gamuatada iadaʼa. Wa tafalalini gamuatada börö me taʼomasiʼö Yehowa ba ibeʼe khöda wanolo. (Baso Kolose 3:5-10.) Börö memamati ita daʼö zamarou tödöda ba wolulu faʼaurida khö Yehowa ba tobali si fahuwu khönia. Tebai tafalua daʼa na tenga wanolo moroi khö Yehowa.​—Efeso 2:8.

⁵ Famati andrö zangabölöʼö yaʼita. Duma-dumania, börö wamati andrö wa tola talawa Gafökha, nudu fondrege zabölö. (Efeso 6:16) Börö me faduhu dödöda khö Yehowa, lö khöda faʼaombö dödö na göna ita fangabu dödö. No ifabuʼu khöda Yehowa wa ibönökhi zoguna khöda na mamati ita khönia ba na taʼofönaiʼö wangalui Banuania. (Mataiʼo 6:30-34) Börö me so khöda wamati, ibeʼe Yehowa mbuala sebua khöda yaʼia daʼö faʼauri si lö aetu.​—Yohane 3:16.

NA MANGOLOI DÖDÖDA TAYA WAMATIDA

6, 7. (a) Hadia zi fagölö ba nangi ba bade sataʼu Wetero? (b) Hana wa moguna aboto ba dödöda wa tola taya wamatida?

⁶ Me mowaö-waö Wetero ba dete nidanö Galilaia, hadia mbörö wa ataʼu ia? Börö nangi faoma bade. Fagölö simane fanandraigö nitaögö niha Keriso ba ginötö andre. Hewaʼae oya gabula dödö si göna ita, tola tataögö börö wanolo Yehowa. Hizaʼi, böi olifuʼögö hadia zalua khö Wetero. Tenga börö nangi mazui bade wa ahöndrö ia. Si ndruhunia, imane Sura Niʼamoniʼö, ”me iʼila nangi ba ataʼu ia”. (Mataiʼo 14:30) Iböhöli Fetero wamaigi Yesu, ba no itöngö mbade awö nangi sabölö. Aefa daʼö awuwu wamatinia. Simane daʼö göi ita, na ha abula dödö manö niʼera-erada, tola aombö dödöda wanolo Yehowa.

⁷ Moguna aboto ba dödöda wa tola taya wamatida. Hadia mbörö? Imane Sura Niʼamoniʼö börö ”horö samasui yaʼita.” (Heberaiʼo 12:1) Simane Fetero, na mangoloi dödöda ba wamalua somasi Lowalangi, tola awuwu wamatida. Tobali, hezo taʼila na no ibörögö awuwu wamatida? Fanofu daʼa mitou zanolo yaʼita ba wamareso tödöda.

8. Hadia mbörö wa ibörögö lö faduhu dödöda ba zi no ifabuʼu Lowalangi?

⁸ Hadia faduhu dödöda ba zi no ifabuʼu Lowalangi simane faʼafaduhu dödöda ba zi no numalö? Duma-dumania, no ifabuʼu Lowalangi wa ifakiko gulidanö nifatörö Gafökha. Hadia mangoloi dödöda ba ngawalö nösi gulidanö andre? Na simanö, ibörögö lö faduhu dödöda wa no ahatö ginötö waʼatua danö. (Habakuki 2:3) Angeraigö duma-duma tanö böʼö. No ihenaigö höli Yehowa, ba no ifabuʼu wa iʼefaʼö horöda. Tobali, na tatörö-törö manö tödöda horö nifaluada ba zi lalö, ibörögö lö khöda faʼafaduhu dödö wa iʼefaʼö horöda Yehowa. (Halöwö Zinenge 3:19) Lua-luania, lö khöda faʼomuso dödö ba wamalua halöwö Lowalangi ba tabato weʼamöi manuriaigö.

9. Hadia zalua na ha tana khöda taʼalui?

⁹ Hadia no ubeʼe zabölö sökhi khö Yehowa? Na taforege wangai halöwö Yehowa, lö tebulö dötönaföda ba zi so miföna. Hewisa na ibörögö taʼalui dana khöda? Duma-dumania, tatema halöwö si sökhi sebua gazi, tobali alö ginötöda ba wangai halöwö Lowalangi. Tola manö awuwu wamatida ba ’abeʼe dödöda’ lö tafalua saʼae halöwö sinangea tabeʼe khö Yehowa.​—Heberaiʼo 6:10-12.

10. Hana wa moguna taʼefaʼö zala nawöda?

¹⁰ Hadia abua khögu wangefaʼö zala nawögu? Na so niha zoʼafökhöiʼö tödöda, hadia mofönu ita ba lö fahede ita khöra? Na tafalua daʼö, ha si sökhi khöda niʼera-erada. Na taʼefaʼö zala nawöda, daʼö dandra wa mamati ita khö Yehowa. Hana wa tola? Na so niha si fasala khöda, hulö zoʼömö ia khöda. Ba na fasala ita khö Yehowa, yaʼita zoʼömö khönia. (Luka 11:4) Na taʼefaʼö zala nawöda, faduhu dödöda khö Yehowa wa ifahowuʼö nifaluada andrö. Ebua mböli howu-howu Yehowa moroi ba nibuʼa niha si fasala khöda. Aboto ba dödö ndra nifahaʼö Yesu wa moguna sibai wamati ba wangefaʼö zala niha si fasala. Me iwaʼö khöra Yesu enaʼö laʼefaʼö zala niha si no asese fasala khöra, laʼandrö khö Yesu, ”douʼö wamatima.”​—Luka 17:1-5.

11. Hadia gamuata si lö tefaudu ba ginötö laʼamenesi ita?

¹¹ Hadia abao dödögu na laʼamenesi ndraʼo? Halö wamahaʼö moroi ba mene-mene si no labeʼe khöu moroi na öfaigi-faigi zala niha soʼamenesi yaʼugö. (Gamaedola 19:20) Böi ositengagö ginötö daʼö ba wamahaʼö yaʼugö ba woloʼö wangera-ngera Yehowa!

12. Na asese mokökö-kökö ita khö ndra satua sokubaloi, hadia geluahania?

¹² Hadia mokökö-kökö ndraʼo khö ndra satua sokubaloi ba gangowuloa? Me lafondro-ndrongo iraono Gizaraʼeli duria moroi ba zamauze si dafulu, mokökö ira khö Moze ba Aʼaroni. Imane Yehowa khö Moze, ”Hawaʼara wa lö faduhu dödöra khögu?” (IV Moze 14:2-4, 11) Iʼila Yehowa wa lö faduhu dödö ndraono Gizaraʼeli khönia börö me mokökö-kökö ira khö Moze ba khö Gaʼaroni, niha si no ifataro ba wolohe iraono Gizaraʼeli. Simanö göi na mokökö-kökö ita khö ndra Satua sokubaloi niʼogunaʼö Yehowa ba wondröniaʼö yaʼita, daʼö dandra wa no awuwu wamatida khö Lowalangi.

13. Hana wa lö moguna ide-ide dödöda na taʼila no awuwu wamatida?

¹³ Me no öʼangerönusi zinofu-nofu andre, böi ide-ide dödöu na öʼila no awuwu wamatiu. Törö tödöu wa Fetero samösa no irai so khönia waʼataʼu ba faʼaombö dödö. Iʼamenesi ndra nifahaʼönia Yesu börö me, ”sambö famati” ira. (Mataiʼo 16:8) Hewaʼae simane daʼö, tola tahalö khöda wamahaʼö moroi ba zalua khö Wetero. Faigi hadia nifaluania me ibörögö awuwu wamatinia ba ahöndrö ia.

OʼÖ YESU ENAʼÖ ARO WAMATIU

14, 15. (a) Hadia nifalua Wetero me ibörötaigö ahöndrö ia? (b) Hewisa enaʼö tola taʼila Yesu?

¹⁴ Onekhe Wetero wolangi, tola manö ifuli ia ba dundraha me arakhagö ahöndrö ia. (Yohane 21:7) Tobali lö ifalua daʼö, börö me lö iʼodaligö waʼabölönia samösa. Lö tebulö wanötönania khö Yesu ba wanema fanolo. Na taʼila ibörögö awuwu wamatida, taʼoʼö nifalua Wetero. Hadia zinangea tafalua?

¹⁵ Simane Fetero, yaʼita göi ’böi tebulö wamaigida’ Yesu. (Baso Heberaiʼo 12:2, 3.) Lö taʼila Yesu faoma höröda samösa simane Fetero. Tola taʼila Yesu na tafahaʼö ita ba Zura Niʼamoniʼö, ba taʼodödögö woloʼö yaʼia. Natafalua daʼö itugu aro wamatida. Datafaigi hewisa lalada ba wanara lahe Yesu.

16. Hewisa Zura Niʼamoniʼö wangaʼaroʼö famatida?

¹⁶ Aʼaroʼö waʼafaduhu dödöu ba Zura Niʼamoniʼö. Faduhu dödö Yesu wa Sura Niʼamoniʼö andrö Taromali Lowalangi sanuturu lala khöda. (Yohane 17:17) Enaʼö tola tatara lahe Yesu, moguna tabaso Zura Niʼamoniʼö ero maʼökhö, tafahaʼö ita ba taʼangerönusi hadia zi no tabaso. Taʼalui wanema li moroi ba wanofu-nofu dödöda. Duma-dumania, hadia faduhu dödöu wa no auri ita ba ngaluo safuria? Aroʼö wamatiu börö me no ahatö waʼatua danö, fahaʼö ndraʼugö ba zi no ifaʼeleʼö Sura Niʼamoniʼö. Hadia omasiʼö öʼaroʼö wamatiu sanandrösa ba nifabuʼu Lowalangi ba zi so miföna? Tola öfahaʼö ndraʼugö ba wamaʼeleʼö si no irai alua si so ba Zura Niʼamoniʼö. Hadia faduhu dödöu wa moguna Zura Niʼamoniʼö ba ginötö andre? Tola öbaso waö-waö waʼauri ndra talifusöda si no mamalalini faʼaurira börö me no lafahaʼö ira ba Zura Niʼamoniʼö.a (Faigi zi no musura ba gahe zura.)—I Tesalonika 2:13.

17. Hana wa tola itaögö wamakao Yesu, ba hewisa wanarada lahenia?

¹⁷ Böi mangoloi dödöu ba howu-howu si no ifabuʼu Yehowa. Lö mangoloi dödö Yesu wamaigi howu-howu nibeʼe khönia ba zi so miföna, daʼö zanolo yaʼia ba wanaögö famakao. (Heberaiʼo 12:2) Lö adöni dödönia ba ngawalö gisö-isö nösi gulidanö andre. (Mataiʼo 4:8-10) Hewisa enaʼö tola taʼoʼö Yesu? Angerönusi howu-howu si no ifabuʼu Yehowa ba zi so miföna. Khalaigö wa no so ndraʼugö ba gulidanö si bohou. Sura hadia halöwö somasi öfalua ba ginötö daʼö. Sura döi niha somasiʼö fahuo-huo khöu ba gotalua niha nisusugi ba hadia zinofumö khöra. Baliʼö fefu daʼa si tobali buʼusa li Lowalangi khöu, tenga ha ba niha böʼö.

18. Hewisa wangandrö tola itolo ita enaʼö abeʼe ba wamati?

¹⁸ Angandrö enaʼö itugu tedou wamatiu. Ifahaʼö ndra nifahaʼönia Yesu enaʼö laʼandrö geheha khö Yehowa. (Luka 11:9, 13) Ba ginötö öʼandrö geheha, andrö enaʼö itugu tedou wamatiu. Famati andrö no bua-bua geheha. Tola öʼandrö hadia zabölö moguna ba waʼauriu. Duma-dumania, na abua khöu wangefaʼö zala niha si fasala khöu, andrö wanolo moroi khö Yehowa enaʼö iʼabeʼeʼö wamatiu irege tola öʼefaʼö zalania.

19. Haniha zinangea tafili zi fahuwu khöda?

¹⁹ Fili nawöu saro ba wamati. Ihaogö sibai Yesu wofili si fahuwu khönia, yaʼia daʼö ira nifahaʼönia, niha si lö faröi, samati ba soloʼö khönia. (Baso Yohane 15:14, 15.) Oʼö Yesu ba haogö sibai wofili niha si fahuwu khöu, enaʼö saro ba wamati ba soloʼö khö Yesu. Niha si fahuwu faoma lö lalimo nawöra, he ba ginötö ibeʼe mazui itema mene-mene.​—Gamaedola 27:9.

20. Hadia zalua na tatolo ndra talifusöda enaʼö aro ira ba wamati?

²⁰ Tolo niha böʼö wangaʼaroʼö famatira. Itolo ndra nifahaʼönia Yesu enaʼö aro ira ba wamati, moroi ba wehede hegöi ba nifaluania. (Mareko 11:20-24) Moguna taʼoʼö Yesu. Na tafalua daʼö, tola aro wamatida hegöi famati niha böʼö. (Gamaedola 11:25) Hewisa wanolomö niha si so ba zi fasui yaʼugö? Ba ginötö öfahaʼö niha böʼö ba Zura Niʼamoniʼö, fatunö wa si ndruhu-ndruhu so Lowalangi, ba iʼosinangegö sibai ita, ba si ndruhu-ndruhu ösi Zura Niʼamoniʼö andrö Taromali Lowalangi. Hewisa wanolomö ira talifusöda enaʼö aro ira ba wamati? Na öʼila so dalifusöda si kökö-kökö khö ndra satua sokubaloi, böi anemaiʼö fatuwu ndraʼugö khönia. Alui lala wanolo yaʼia enaʼö ifuli aro wamatinia. (Yuda 22, 23) Na ono sekola ndraʼugö, na inötö so wamahaʼö sanandrösa ba evolusi, böi ataʼu ndraʼugö wangombakha hadia niwaʼö Zura Niʼamoniʼö ba nifazökhi Lowalangi. Tola manö, gurumö hegöi awöu ba zekola lasuno ndraʼugö hegöi Lowalangi börö wamatimö.

21. Hadia nifabuʼu Yehowa khöda?

²¹ Yehowa ba Yesu zanolo Fetero enaʼö lö khönia faʼataʼu ba faʼaombö-aombö dödö. Ba gafuriatania, tobali ia duma-duma si sökhi ba niha tanö böʼö. No ifabuʼu göi Yehowa wa itolo ita enaʼö aro ba wamati. (Baso I Fetero 5:9, 10.) Moguna so khöda wangodödögö famati, ba faduhu dödöda hasambalö ifahowuʼö ita Yehowa.