FAMAHAʼÖ 11
Hewisa Enaʼö Aboto ba Dödöda Zura Niʼamoniʼö?
Hadia no irai alangu dödöu ba wamörögö halöwö sebua sibai? Enaʼö lö abua khöu wamalua daʼö, böi samuzaigö wamalua yaʼia, sökhi na özara-zara. Simane daʼö göi ba wombaso Sura Niʼamoniʼö. Te manofu ndraʼugö, hezo ubörögö. Ba wamahaʼö daʼa dania, tatutunö hadia manö zinangea öfalua enaʼö ösöndra waʼomuso dödö ba wombaso Sura Niʼamoniʼö.
1. Hana wa moguna tabaso Zura Niʼamoniʼö ero maʼökhö?
Omuso dödöda na tabaso Zura Niʼamoniʼö mazui ”oroisa Yehowa” ero maʼökhö. Ba fefu nifaluada oi mofozu. (Baso Zinunö 1:1-3.) Ba wombaso yaʼia, tola öbörögö mato hauga menit ero maʼökhö. Na itugu monönö waʼaboto ba dödömö nösi Daromali Lowalangi, tatu manö itugu omasi ndraʼugö ba wombaso yaʼia.
2. Hadia zinangea öfalua enaʼö ötema mbua moroi ba wombaso Sura Niʼamoniʼö?
Enaʼö sindruhu-ndruhu tatema mbua moroi ba wombaso Sura Niʼamoniʼö, moguna taʼangeragö hadia nibasoda. Börö daʼö, na tabaso Zura Niʼamoniʼö moguna ’taʼangerönusi ia’. (Yosua 1:8, nisura ba gahe zura) Ba ginötö öbaso Zura Niʼamoniʼö, angeragö wanofu-nofu daʼa: ’Moroi ba ayati daʼa, hadia nifahaʼögu yaʼo sanandrösa khö Lowalangi Yehowa? Hewisa enaʼö tola ufalua zi no ufahaʼö yaʼo? Hewisa wangogunaʼögu ayati daʼa ba wanolo niha böʼö?’
3. Hadia abua khöu ba wameʼe inötö ba wombaso Sura Niʼamoniʼö?
Hadia abua khöu ba wameʼe inötö ba wombaso Sura Niʼamoniʼö? Ato zorasoi simane daʼö. Ifarou ita Sura Niʼamoniʼö enaʼö ’tahaogö wangogunaʼö inötö’. (Efeso 5:16) Tola öfalua daʼö yaʼia na öbeʼe ginötöu wombaso Sura Niʼamoniʼö ero maʼökhö. So niha somasi mombaso Sura Niʼamoniʼö ba zihulö wongi. So göi zomasi mombaso ba zi laluo te ba ginötö wolombase na no aefa manga. So göi zomasi mombaso Sura Niʼamoniʼö ba zi bongi fatua lö mörö ira. Hadia ginötö somasiʼö ba wombaso Sura Niʼamoniʼö?
ODÖDÖGÖ NASA WANGALUI
Datafatunö hewisa lala enaʼö ösöndra waʼomuso dödö ba wombaso Sura Niʼamoniʼö. Tafatunö göi dania hewisa lala wamaʼanöu yaʼugö fatua lö öfahaʼö ndraʼugö ba Zura Niʼamoniʼö enaʼö sindruhu-ndruhu ötema mbua moroi ba wamahaʼö andrö.
Tola taforege enaʼö omasi ita wombaso Sura Niʼamoniʼö, fagölö simane niha samorege enaʼö omasi ia wemanga gö si lö irai iʼa ba zilalö
4. Forege enaʼö omasi ndraʼugö wombaso Sura Niʼamoniʼö
Te abua khöu ba wamörögö fombaso Sura Niʼamoniʼö. Hizaʼi, tola öʼalui lala hewisa enaʼö omasi ndraʼugö wamalua daʼö. Fagölö simane niha samorege enaʼö omasi ia wemanga gö si lö irai iʼa ba zilalö. Baso 1 Fetero 2:2, ba beʼe wanema li ba wanofu daʼa:
Moloʼö yaʼugö, na öbaso Zura Niʼamoniʼö ero maʼökhö, hadia itugu monönö waʼomasiu wombaso Sura Niʼamoniʼö?
Futa VIDEO ba wamaigi hadia manö nifalua niha ba wamobörö irege omasi ira wombaso Sura Niʼamoniʼö. Aefa daʼö, beʼe wanema li ba wanofu-nofu daʼa:
Ba video andrö mege, hadia mbörö wa abua khö ndra si bohou ebua ba wamörögö fombaso Sura Niʼamoniʼö ero maʼökhö?
Hadia zanolo yaʼira enaʼö tola labaso Zura Niʼamoniʼö ero maʼökhö?
Hadia nifaluara irege adöni dödöra wombaso Sura Niʼamoniʼö?
Lala wamörögö fombaso Sura Niʼamoniʼö:
Fili Zura Niʼamoniʼö si tefaudu ba salio öʼila eluaha. Tola öʼogunaʼö Zura Niʼamoniʼö Famoʼeluaha Gulidanö si Bohou na no tehenaigö daʼö ba li niʼogunaʼöu.
Börögö wombaso Sura Niʼamoniʼö moroi ba faosatö sabölö adöni dödöu. Enaʼö öʼila duma-duma faosatö sadöni dödöu, faigi tabel ”Börögö Wombaso Sura Niʼamoniʼö”.
Beʼe dandra-tandra hezo örugi wombaso Sura Niʼamoniʼö. Ogunaʼö tabel ”Faʼatedoumö ba Wombaso Sura Niʼamoniʼö” ba mbuku daʼa.
Ogunaʼö aplikasi JW Library®. Ba aplikasi daʼa, tola öbaso Zura Niʼamoniʼö mazui öfondrondrongo rekamannia gofu hezo manö. Tola öʼogunaʼö HP mazui perangkat tanö böʼö.
Ogunaʼö Lampiran si so ba Wamoʼeluaha Gulidanö si Bohou. Ba daʼö dania so peta, tabel hegöi eluaha ngawua wehede. Fefu daʼö tobali fanolomö enaʼö omuso dödöu na öbaso Zura Niʼamoniʼö.
5. Faʼanö ndraʼugö fatua lö öfahaʼö ndraʼugö ba Zura Niʼamoniʼö
Baso Zinunö 119:34, ba beʼe wanema li ba wanofu daʼa:
Hana wa moguna ölau mangandrö fatua lö öbaso mazui fatua lö öfahaʼö ndraʼugö ba Zura Niʼamoniʼö?
Hewisa enaʼö so mbuania khöu ero öfahaʼö ndraʼugö ba Zura Niʼamoniʼö? Ba ginötö öfaʼanö ndraʼugö ero sambua famahaʼö moroi ba mbuku daʼa, tandraigö falua daʼa:
Baso ngenoli ba wamobörö ero sambua famahaʼö.
Bokai ba baso fefu ayatinia, ba tandraigö angeragö hadia gamakhaita ayati daʼö ba duho nifatunö.
Tandra ngawua wehede si tobali tuho fanema li ero sambua fanofu. Tola möi fanolomö daʼa ba wameʼe fanema li na öfahaʼö ndraʼugö khö zamahaʼö yaʼugö ba Zura Niʼamoniʼö.
Hadia öʼila?
Ira Samaduhuʼö Yehowa, no irai laʼogunaʼö Zura Niʼamoniʼö si faböʼö-böʼö. Hizaʼi abölö maʼomasiʼö Mbuku Niʼamoniʼö Famoʼeluaha Gulidanö si Bohou börö me no tesura ba daʼö döi Lowalangi, tefaudu wamoʼeluaha yaʼia ba alio aboto ba dödöda.—Faigi artikel web ”Hadia Laʼokhögö Samösa Zura Niʼamoniʼö Ira Samaduhuʼö Yehowa?”
SO ZANGUMAʼÖ: ”Ha ira fandrita mazui sohalöwö ba gosali zombaso-mbaso Sura Niʼamoniʼö. Lö moguna saʼae tabaso, lö inötöda.”
Hewisa moloʼö yaʼugö?
RAHU-RAHU WAMAHAʼÖ
Enaʼö ötema mbua moroi ba Zura Niʼamoniʼö, beʼe ginötöu wombaso yaʼia. Angandrö enaʼö aboto ba dödöu hadia nibasomö ba faʼanö ndraʼugö fatua lö tohare zamahaʼö yaʼugö.
Hadia Wamahaʼö si Tola Öhalö?
Hadia zinangea öfalua enaʼö ötema mbua moroi ba Zura Niʼamoniʼö?
Hawaʼara ginötö si tefaudu ba wombaso hegöi ba wamahaʼö yaʼugö ba Zura Niʼamoniʼö?
Hana wa moguna öfaʼanö ndraʼugö fatua lö tohare zamahaʼö yaʼugö?
ALUI NASA DANÖ BÖʼÖ
Baso wanuturu lala si tobali fanolou enaʼö ösöndra mbua moroi ba wombaso Sura Niʼamoniʼö.
”Tema Mbua moroi ba Wombaso Sura Niʼamoniʼö” (Manuriaigö No. 1 2017)
So tölu lala ba wombaso Sura Niʼamoniʼö.
”Hadia Gunania Khögu Zura Niʼamoniʼö?—Faosatö 1: Alui Nösi Zura Niʼamoniʼö” (Artikel web)
Alui hewisa lala enaʼö ösöndra waʼomuso dödö ba wombaso Sura Niʼamoniʼö.
Fondrondrongo hadia manö wanuturu lala niwaʼö niha si no asese mombaso Sura Niʼamoniʼö.