”Mifalua Daromali”

1-2. Hadia mbörö wa ohahau dödö nono mbanua Lowalangi? (Yakobo 1:​22-25)

YEHOWA hegöi Ono niʼomasiʼönia, omasi ira na tasöndra waʼomuso dödö. Imane sanura Sinunö 119:​2, ”Yaʼahowu niha soloʼö famasugi ba dödö andrö khönia, sangalui yaʼia soroi ba dödö.” Imane göi Yesu, ”Nifahowuʼö yaʼia daʼö, samondrongo ba samalua taromali Lowalangi!”—Luk. 11:28.

² Yaʼita ono mbanua Yehowa, tarasoi waʼomuso dödö. Hadia mbörö? Oya sibai dane-dane waʼomuso dödöda. Sambua ba gotaluania yaʼia daʼö börö me lö taböhöli wombaso Taromali Lowalangi ba taforege wamalua yaʼia ba waʼaurida.—Baso Yakobo 1:​22-25.

3. Hadia mbuania na tafalua zi no tabaso ba Daromali Lowalangi?

³ Na ’tafalua daromali’ ba waʼaurida, hasambalö oya mbua nitemada. Duma-dumania, tola taʼomusoiʼö dödö Yehowa ba tasöndra göi waʼomuso dödö. (Sango. 12:13) Itugu aro göi gamakhaitada ba nösi nomoda hegöi khö ndra talifusöda si sara lala wamati. Te no örasoi samösa daʼö. Baero daʼö, lö göna ita abula dödö simane salua ba niha si lö moloʼö oroisa Yehowa. Simane niwaʼö Razo Dawido ba zinunönia, hasambalö tatema luo sebua na lö tebulö tafalua goroisa Lowalangi, fanuturu lala nibeʼenia ba taʼoʼö gangetula nihalönia.—Si. 19:​7-11.

4. Hadia mbörö wa itaria abua khöda wamalua niwaʼö Daromali Lowalangi?

⁴ Sindruhu sa, itaria abua khöda wamalua hadia zi no tabaso ba Daromali Lowalangi. Fefu ita, oya sibai halöwö sinangea tafalua. Hizaʼi, moguna tabeʼe ginötöda ba wombaso hegöi ba wamahaʼö yaʼita ba Daromali Lowalangi enaʼö taʼila hadia niʼandrö Yehowa khöda. Börö daʼö, datatutunö hadia manö zanolo yaʼita enaʼö lö taböhöli wombaso Sura Niʼamoniʼö. Tatutunö göi hewisa enaʼö tola taʼangerönusi hadia zi no tabaso ba tafalua ia ba waʼaurida.

BEʼE GINÖTÖU BA WOMBASO TAROMALI LOWALANGI

5. Hadia manö halöwö sangohorigö inötöda?

⁵ Arakhagö fefu nono mbanua Yehowa, oya sibai halöwö sinangea lafalua. Oya ginötö niʼogunaʼöda ba wamalua noro dödö simane niwaʼö Zura Niʼamoniʼö. Duma-dumania, ato ba gotaluada zohalöwö ba wombönökhi soguna khöda samösa hegöi ba nösi nomoda. (1 Ti. 5:8) So göi zondrorogö ösi nomora sofökhö mazui salawa döfi. Baero daʼö, fefu ita moguna tabeʼe ginötöda ba wondrorogö botoda faböi mofökhö. So göi noro dödö sinangea tafalua ba mbanua niha Keriso, sambua ba gotaluania sabölö ebua yaʼia daʼö ba wanuriaigö turia somuso dödö si fao faʼowölö-ölö. Börö daʼö, hewisa enaʼö lö tebulö so ginötöda wombaso Sura Niʼamoniʼö ero maʼökhö, taʼangerönusi ba tafalua ia ba waʼaurida?

6. Hewisa enaʼö tola öʼofönaiʼö wombaso Sura Niʼamoniʼö? (Faigi göi gambara.)

⁶ Fombaso Sura Niʼamoniʼö, daʼö ”zabölö moguna” ba sinangea taʼofönaiʼö yaʼita niha Keriso. (Fil. 1:10) Ifatunö khöda sura zinunö siföföna wa niha sohahau tödö yaʼia daʼö ”sangomasiʼö oroisa Yehowa, sombaso oroisania ba samatou-tou tödönia bongi maʼökhö”. (Si. 1:​1, 2) Ba daʼa aboto ba dödöda wa moguna tabeʼe ginötöda ba wombaso Sura Niʼamoniʼö. Hadia ginötö sabölö sökhi ba wamalua yaʼia? Te no faböʼö-böʼö wanema li nibeʼeda ero zamösana. Hizaʼi rahu-rahunia, moguna tafili ginötö si tefaudu khöda zamösana enaʼö tola tafalua ia ero maʼökhö. Imane talifusöda ira matua sotöi Victor, ”Omasido wombaso Sura Niʼamoniʼö ero sihulö wongi. Hewaʼae abua khögu wemaoso, hizaʼi daʼa ginötö sabölö sökhi börö me lö oya zamangoloi fangera-ngeragu irege tola uʼosambuaʼö dödögu.” Hadia simane daʼö göi ndraʼugö? Sofu khöu samösa, ’Hadia ginötö si sökhi nifiligu ba wombaso Sura Niʼamoniʼö?’

ANGERÖNUSI HADIA NIBASOMÖ

7-8. Hadia zi tobali taha-taha khöda irege lö tatema mbua ba wombaso Sura Niʼamoniʼö? Beʼe duma-duma.

⁷ Hewaʼae oya zi no tabaso ba asese tafalua ia, hizaʼi itaria lö taʼangeragö daʼö. Hadia no irai öbaso zi sambua ngawalö, ba lö ara aefa daʼö olifu ndraʼugö? Fefu ita no irai tarasoi daʼö. Tola göi alua zimane daʼö ba ginötö tabaso Zura Niʼamoniʼö. Te no tahalö gangetula ba wombaso hauga faza ero maʼökhö. Sökhi daʼö. Sindruhu wa moguna tatatugöi gohitö dödöda ba taforege wamalua daʼö. (1 Ko. 9:26) Hizaʼi, lö ibönö na ha asala tabaso Zura Niʼamoniʼö. So nasa zinangea tafalua enaʼö sindruhu-ndruhu tatema mbua moroi ba wamalua daʼö.

⁸ Nehegö duma-duma daʼa: Enaʼö lö mate zinanö, moguna ihawui ia teu. Hizaʼi, na isamuzaigö waʼalua deu sabölö-bölö ba zi lö arara, tatu tebai isisiö tanö fefu nidanö andrö. Lua-luania, faunö nidanö ba lö gunania daʼö ba zinanö. Sindruhunia, na lö abölö-bölö sibai deu, awena tola isisiö nidanö andrö tanö ba möi fangatabö zinanö. Simane daʼö göi, na tabaso Zura Niʼamoniʼö moguna tadaʼi-daʼi enaʼö tola taʼangeragö, tatörö tödöda ba tafalua hadia zi no tabaso andrö.—Yak. 1:24.

9. Hadia zinangea tafalua na taʼila wa talafo alio-lio wombasoda Sura Niʼamoniʼö?

⁹ Hadia itaria örasoi wa talafo alio-lio na öbaso Zura Niʼamoniʼö irege lö fakhamö öʼangeragö? Hadia zinangea öfalua? Tandraigö daʼi-daʼi wombaso, ba angeragö hadia nibasomö andrö. Sindruhunia, lö abua wamalua daʼa. Tandraigö atö falua daʼa: Tola önönö ginötö niʼogunaʼömö ba angerönusi hadia zi no öbaso. Mazui, alösi ayati nibasomö, ba ogunaʼö ginötö si toröi ba woʼangerönusi daʼö. Imane Victor nitötöi moroi yawa, ”Uʼadogo-dogoiʼö wombaso Sura Niʼamoniʼö, tola manö ha sambua faza. Börö me sihulö wongi ubaso ia, tola uʼangerönusi ia ba zi maʼö-maʼökhö daʼö.” Gofu hadia lala nifaluamö, sabölö tohude daʼi-daʼi wombaso enaʼö tola öʼangerönusi hadia zi no öbaso.—Si. 119:97; faigi kotak ”Fanofu Sinangea Muʼangeragö”.

10. Beʼe duma-duma hewisa wamaluamö zi no öfahaʼö yaʼugö. (1 Tesalonika 5:​17, 18)

¹⁰ Gofu hawaʼara mazui hawaʼoya öbaso Zura Niʼamoniʼö, sabölö moguna angeragö hewisa wamaluamö ayati daʼö. Na no aefa öbaso, sofu khöu samösa, ’Hewisa wamaluagu zi no ubaso andre iadaʼa hegöi ba zi so miföna?’ Duma-dumania, iadaʼa öbaso 1 Tesalonika 5:​17, 18. (Baso.) Me no öbaso ia, batogö sabata ba angeragö daʼa: ’Hawaʼasese mangandrödo? Hadia soroi ba dödögu wangandrö?’ Angerönusi göi hadia manö zinangea öʼandrö saohagölö khö Yehowa. Tola öʼalui tölu ngawalö zinangea öʼandrö saohagölö ba zi maʼökhö daʼö. Moroi ba daʼa taʼila wa tola tobali ndraʼugö samondrongo ba samalua taromali na öbeʼe ginötöu hewaʼae ha mato hauga menit ba woʼangerönusi nibasomö. Na ero maʼökhö öfalua ia, hasambalö tobali ndraʼugö ono mbanua Yehowa sabölö sökhi. Hizaʼi, hewisa na oya nasa zinangea öforege?

OKHÖGÖ GOHITÖ DÖDÖ SI TEFAUDU

11. Hadia mbörö wa itaria örasoi wa ambö gölömö wamalua niwaʼö Zura Niʼamoniʼö? Beʼe duma-duma.

¹¹ Ba ginötö öbaso Zura Niʼamoniʼö ba öforege wamalua yaʼia, tola manö örasoi wa ambö gölömö wamalua daʼö fefu. Angeragö duma-duma daʼa: Maʼökhö andre, ba wombasomö Sura Niʼamoniʼö, so mene-mene enaʼö lö ebua dödö zambuana. (Yak. 2:​1-8) Te aboto ba dödöu wa moguna öforege wamalua daʼa, ba öhalö gangetula ba wamalua fombulöʼö. Sökhi sibai daʼö! Mahemolunia, öbaso ayati sanutunö wa moguna sibai taʼangenanöi wehededa. (Yak. 3:​1-12) Aboto ba dödöu wa itaria öfaʼema wehede si lö möi famarou dödö niha böʼö. Tobali öhalö gangetula enaʼö itugu sökhi wehedemö. Ba ngaluo si tölu, öbaso wamangelama enaʼö lö tobali ndraʼugö si fahuwu ba gulidanö. (Yak. 4:​4-12) Ifuli zui tefasugi ba dödöu wa moguna abölö mangelama ndraʼugö ba wamili hiburan. Ba ngaluo si öfa, te öwaʼö tödöu wa ambö saʼae gölömö börö me oya sibai zinangea öforege.

12. Hadia mbörö wa lö moguna ide-ide dödöda na taʼila wa oya zinangea taforege nasa ba wamalua? (Faigi göi nisura ba gahe zura.)

¹² Na öʼila wa oya nasa zinangea öforege ba wamalua, böi ide-ide dödöu. Sindruhunia, daʼö dandra wa so khöu wangide-ngideʼö ba öʼokhögö gohitö dödö satulö. Ba ginötö ibaso Zura Niʼamoniʼö, niha sangokhögö fangide-ngideʼö hasambalö iʼalui hadia nasa zinangea iforege wamalua.a Törö göi tödöu wa moguna ’tabohouni gamuatada’ ero inötö. (Kol. 3:10) Iadaʼa, hadia zanolo yaʼita enaʼö lö tebulö tobali ita samalua taromali Lowalangi?

13. Hadia lala si tefaudu ba wamalua zi no öfahaʼö yaʼugö? (Faigi göi gambara.)

¹³ Moroi na öʼosamuzaigö wamalua fefu zi no öbaso andrö, abölö sökhi na özara-zara wamalua yaʼia. (Amd. 11:2) Tandraigö falua daʼa: Sura hadia manö zinangea öforege nasa wamalua, aefa daʼö fili sambua mazui dombua ba gotalua daʼö zabölö öʼofönaiʼö. Si toröinia falua daʼö ba ginötö tanö böʼö. Hizaʼi, hezo moroi öbörögö ia?

14. Hezo tola öbörögö wamalua?

¹⁴ Tola öbörögö ia moroi ba zaoha khömö famalua mazui ba zabölö moguna ödouʼö nasa. Na no ötatugöi daʼö, falua riset. Tola öʼogunaʼö Indeks Publikasi Menara Pengawal mazui Fanuturu Lala ba Wamalua Riset khö Ndra Samaduhuʼö Yehowa. Angandrö khö Yehowa enaʼö ibeʼe khöu ”waʼedöna ba faʼabölö” enaʼö tola öfalua gohitö dödömö andrö. (Fil. 2:13) Aefa daʼö, falua hadia zi no öfahaʼö yaʼugö. Na no mofozu ndraʼugö ba wamalua zi sambua fombulöʼö mazui ba wondrouʼö sambua bua-bua niha Keriso, tola manö itugu aoha khömö ba itugu terou dödömö ba wamalua tanö böʼönia.

YAʼIDÖNISI DÖDÖMI TAROMALI LOWALANGI

15. Ba wombaso Sura Niʼamoniʼö, hadia gamaehuta nono mbanua Yehowa moroi ba niha sato? (1 Tesalonika 2:13)

¹⁵ Ato zangumaʼö wa no asese labaso Zura Niʼamoniʼö. Hizaʼi, hadia sindruhu-ndruhu faduhu dödöra ba wamahaʼö si so ba Zura Niʼamoniʼö? Hadia no lafalua mene-menenia ba labulöʼö waʼaurira? Löʼö. Ato niha zi lö mamalua daʼö. Faböʼö sibai nono mbanua Yehowa! Simane niha Keriso me abad siföföna, tatemaʼö Zura Niʼamoniʼö ’simane fehede Lowalangi’. Baero daʼö, taforege ba wamalua mene-menenia ba waʼaurida sero maʼökhö.—Baso 1 Tesalonika 2:13.

16. Hadia zanolo yaʼita enaʼö tobali samalua Taromali?

¹⁶ Itaria abua khöda ba wombaso hegöi ba wamalua Taromali Lowalangi. Tola manö abua khöda wangalui inötö ba wombaso yaʼia. Mazui, no toʼölö alio-lio sibai ero na tabaso ia ba lö taʼangeragö geluahania. Baero daʼö, itaria ambö gölöda börö me oya sibai zinangea tadouʼö nasa wamalua. Hizaʼi, gofu hadia daha-tahania, hasambalö tola ölawa daʼö börö wanolo moroi khö Yehowa. Tobali, datatemaʼö wanolo moroi khö Yehowa ba taʼosambuaʼö dödöda enaʼö tobali ita samalua taromali, tenga ha samondrongo aefa daʼö taʼolifugö. Faduhu dödöda, na lö taböhöli wombaso Sura Niʼamoniʼö ba tafalua mene-menenia, hasambalö falukha ita waʼohahau dödö sebua.—Yak. 1:25.