Fangandrö—Hadia Gunania Khöda

Fatua lö öbörögö wohalöwö, tola manö manofu ndraʼugö, ’Hadia gunania khögu?’ Hadia fasala göi na manofu ita simane daʼö sanandrösa ba wangandrö? Lö sala na taʼila hadia gunania khöda wangandrö. Niha si lö faröi khö Lowalangi sotöi Yobi imane, ”Ba hewaʼae itema ligu, na uʼangaröfi li ia.”​—Yobi 9:16.

Fatua lö tafatunö duho daʼa, no tatutunö wa fangandrö tenga ha si toʼölö lafalua ba agama mazui amaedola dalu-dalu. Si ndruhu-ndruhu wa ifondro-ndrongo wangandröda Lowalangi na tefaudu ba zomasi ia. Iʼandrö khöda Lowalangi enaʼö ahatö ita khönia. (Yakobo 4:8) Hadia gunania na lö faröi ita ba wangandrö? Datafaigi hadia gunania.

Faʼohahau dödö.

Ba ginötö so gabula dödö tatu manö so khöda waʼaombö-aombö dödö. Ifarou ita Sura Niʼamoniʼö enaʼö ”böi aetu-aetu wangandrömi” ba ”na so zabu dödömi, ba mibokai khö Lowalangi.” (I Tesalonika 5:17; Filifi 4:6) Sura Niʼamoniʼö zameʼe khöda faʼafaduhu dödö, na mangandrö ita khö Lowalangi, ”Ba irorogö dödömi, awö gera-erami faʼohahau dödö andrö, khö Lowalangi, sabölö moroi ba gera-era niha fefu.” (Filifi 4:7) So khöda waʼohahau dödö na mangandrö ita khö Lowalangi. Imane ba zura Zinunö 55: 23, ”beʼe noro Yehowa norou andrö, ba iʼorifiʼö.”

Ato niha ba gulidanö andre zanöndra faʼohahau dödö. Imane Hee Ran moroi ba Korea: ”Ba ginötö so gabula dödögu, ulau mangandrö khö Lowalangi. Aefa daʼö urasoi samösa hulö zi lö abula dödö ndraʼo, ba so khögu waʼabölö ba wanaögö abula dödö andrö.” Imane göi Cecilia moroi ba Filipina: ”Börö me satua ndraʼo, so khögu waʼaombö-aombö dödö khö nonogu alawe hegöi khö ninagu si no atua, irege lö khögu faʼabölö ba wanaögö salua andre. Hizaʼi, tola utaögö fefu zalua andre börö me ulau mangandrö. Faduhu dödögu wa hasambalö itolo ndraʼo Yehowa ba wondrorogö yaʼira.”

Fondrara dödö ba faʼabölö ba wanaögö abula dödö.

Hadia no irai göna khöu gabula dödö sabölö-bölö mazui alua khöu wangala si möi famunu? Na mangandrö khö ”Lowalangi wondrara dödö” daʼö zi tola mameʼe khöda faʼabölö. Imane Sura Niʼamoniʼö wa Lowalangi ”Sondrara tödöma, ba waʼafökhö andrö fefu.” (II Korindro 1:3, 4) Duma-dumania, ba ginötö abu sibai dödö Yesu, ”ibalöduhini tou danö, wangandrö.” Hadia lua-luania? ”Ba toʼele khönia malaʼika, moroi ba zorugo, sangabölöʼö yaʼia.” (Luka 22:41, 43) Duma-duma tanö böʼö yaʼia daʼö Nehemia, ato niha si lö sökhi zamaʼala yaʼia enaʼö iböhöli wangai halöwö khö Lowalangi. Mangandrö ia imane, ”Andrö abeʼeʼö dangagu!” Ibeʼe Lowalangi wanolo khö Nehemia, irege lö khönia faʼataʼu ba aʼozu ifalua halöwö nibeʼe khönia. (Nehemia 6:9-16) Reginald ba mbanua Ghana, itutunö hadia zalua me no aefa mangandrö ia imane, ”Ba wa oya gabula dödö salua khögu, ulau mangandrö. Ba worasoigu hulö so zanolo yaʼo, ibeʼe khögu waʼaro dödö enaʼö tola utaögö gabula dödö salua andre.” Si ndruhu-ndruhu ibeʼe khöda wondrara dödö Lowalangi ba ginötö mangandrö ita khönia.

Faʼatua-tua moroi khö Lowalangi.

So lua-lua gangetula nihalöda hegöi ba niha niʼomasiʼöda. Hewisa enaʼö tahalö gangetula si sökhi? Imane Sura Niʼamoniʼö, ”Ba na so ba khömi zambö faʼatua-tua, ba yamuʼandrö khö Lowalangi, sameʼe manö, fefu gofu ha niha zangandrö, lö ihede-hedeʼö; ba tebeʼe khönia.” (Yakobo 1:5) Na taʼandrö waʼatua-tua moroi khö Lowalangi, ibeʼe geheha ba wanuturu lala enaʼö tola tahalö gangetula si sökhi. Si ndruhunia, tola taʼandrö geheha Lowalangi, börö me no ibeʼe waʼafaduhu dödö khöda Yesu wa ”Ibeʼe Ama moroi ba zorugo geheha niʼamoniʼö ba zangandrö khönia.”​—Luka 11:13.

Yesu samösa mangandrö ia khö Yehowa ba wangai angetula si sökhi. Sura Niʼamoniʼö zangombakha khöda me ifili ndra nifahaʼönia si felendrua, ”Sara wongi lö ibato wangandrö khö Lowalangi.”​—Luka 6:12.

Simane Yesu, ato niha ba ginötö andre so khöra waʼafaduhu dödö wa itolo ira Lowalangi ba ginötö lahalö sambua gangetula si sökhi. Regina moroi ba Filipina itutunö hadia zalua khönia me no mate woʼomonia, abu sibai dödönia ba wondrorogö ononia alawe ba inania, lö hadöi halöwönia, ba abua khönia wombönökhi soguna hegöi ba wangebuaʼö ononia. Hadia zanolo Regina ba wangai angetula si sökhi? Imane, ”Utouʼö fefu ba danga Yehowa gabula dödögu andre enaʼö ibeʼe khögu wanolo.” Kwabena moroi ba Ghana, itutunö hadia mbörö wa iʼandrö wanolo khö Lowalangi. Imane, ”Ebua gazigu ba watukasa, hizaʼi, no laheta ndraʼo ba halöwögu andrö.” Ba ginötö ihalö gangetula, imane wangumaʼö, ”Mangandrö ndraʼo khö Yehowa enaʼö uhalö gangetula si sökhi. Si ndruhu-ndruhu urasoi wanolo Yehowa ba ginötö ufili halöwö si tefaudu ba si lö möi daha-tahagu ba wamati.” Tola tatema wanuturu lala moroi khö Yehowa na taʼohe ba wangandrö fefu hadia ia gangetula si lö mamakiko fahuwusada khönia.

No tatutunö hadia gunania na mangandrö ita. (Duma-duma tanö böʼö, faigi Kotak ”Gunania na Mangandrö.”) Enaʼö ösöndra mbuania, moguna so khöu waʼaboto ba dödö sanandrösa khö Lowalangi hegöi ba gohitö dödönia. Na omasi öʼila danö böʼö nasa, maʼandrö enaʼö öfalukhaisi ndra Samaduhuʼö Yehowa ba wanolo yaʼugö ba Zura Niʼamoniʼö.a Sambua lala daʼa ba wanolo yaʼugö enaʼö ahatö khö ”Zamondro-ndrongo fangandrö.”​—Zinunö 65:3.