Bua si Tola Ötema Na Mangandrö Ndraʼugö
Abölö-bölö wökhö nitaögö Pamela irege iʼandrö wanolo khö ndra doto sogonekhe. Hewaʼae simanö, ilau mangandrö göi khö Lowalangi ba wangandrö faʼabölö enaʼö anau gölönia ba wanaögö zalua andrö. Hadia itolo ia fangandrö?
Imane Pamela, ”Sagötö gönado wökhö kanker, asese so khögu waʼataʼu. Hizaʼi, ba ginötö ulau mangandrö khö Lowalangi Yehowa, so khögu waʼahono dödö ba ohau-hau wangera-ngeragu. Lö tebulö urasoi waʼafökhö, hizaʼi tobali fanolo khögu wangandrö irege lö tebulö uʼokhögö lala wangera-ngera si sökhi. Ba ginötö manofu khögu niha hadia nirasoigu, umane, ’Urasoi waʼafökhö, hizaʼi omuso dödögu!’”
Tatu manö, lö tabaloi dali göna khöda wökhö sabölö-bölö mazui abula dödö sebua awena mangandrö ita. Fefu ita tataögö gabula dödö sebua ba side-ide, ba tarasoi wa moguna khöda wanolo ba wanaögö yaʼia. Hadia möi fanolo wangandrö?
Imane Sura Niʼamoniʼö, ”Touʼö khö Yehowa noro dödöu, ba yaʼia zanolo yaʼugö. Lö irai itehegö aekhu tou niha satulö tödö.” (Sinunö 55:22) Sindruhu-ndruhu tobali fondrara dödö daʼa! Hewisa wa möi fanolo khöu wangandrö? Ba ginötö mangandrö ndraʼugö khö Lowalangi ba lala si tefaudu, ibeʼe hadia zoguna khöu enaʼö tola ötaögö gabula dödöu.—Faigi kotak ”Gunania Na Mangandrö Ndraʼugö”.