Alui Wanolo Enaʼö Aboto ba Dödöu Zura Niʼamoniʼö

Khalaigö atö hewisa na awena möiʼö ba zi sambua soi. Falukha ndraʼugö ba niha si lö irai öʼila, si toʼölö lafalua, ö niʼara, hegöi kefe niʼogunaʼöra. Tatu manö, abu sibai dödöu.

Na awena öbaso Zura Niʼamoniʼö, hulö no so ndraʼugö me götö föna. Fefu manö oi awena öʼila. Falukhaʼö ba daʼö niha ndrawa Wilisiti, si toʼölö lafalua simane ’fanika nukha’, mazui öfahaʼö ndraʼugö ba gö nifotöi mana ba kefe nifotöi hua suku. (II Moze 16:31; Yosua 13:2; II Zamueli 3:31; Luka 15:9) Tola manö abu dödöu ba woʼangeraigö fefu daʼö. Na möiʼö ba zi sambua soi, tatu manö öʼandrö saohagölö ba niha sangombakha khöu na so zi lö öʼila.

FANOLO MEFÖNA

Iʼotarai me tesura Zura Niʼamoniʼö me döfi 1.600 fakhe SM, no tehenaigö wanolo ba niha enaʼö aboto ba dödöra nösi mbuku andrö. Duma-dumania, Moze, zi oföna mondröniaʼö ndraono Gizaraʼeli, ”ibörögö ibotokhi” hadia zi tesura. —V Moze 1:5.

Saribu fakhe aefa daʼö, so nasa ndra samahaʼö sagatua-tua ba Zura Niʼamoniʼö. Ato niha Yehuda hegöi iraono owulo ira ba golayama sebolo me döfi 455 SM ba mbanua Yeruzalema. ”Lahaogö wombaso” Sura Niʼamoniʼö ira samahaʼö andrö. Hizaʼi, tenga ha asala labaso, ”labotokhi geluaha ba tobali aboto ba dödöra”.—Nehemia 8:1-8.

Lima ngaotu fakhe aefa daʼö, fao Yesu Keriso ba wamahaʼö simane daʼö. Sindruhunia, aboto ba dödö niha wa yaʼia andrö samahaʼö. (Yohane 13:13) Ifahaʼö zi samösa niha hegöi niha sato. Samuza maʼökhö, fahuhuo ia ba niha sato, ifaʼema Huhuo ba Hili, ba ”tobali dödö zato ba wamahaʼönia”. (Mataiʼo 5:1, 2; 7:28) Me döfi 33 M, möi Yesu hegöi zi darua nifahaʼönia ba mbanua sahatö ba Yeruzalema, fahuhuo Yesu khöra, ”ibotokhi khöra zi so ba zura”.—Luka 24:13-15, 27, 32.

Ira nifahaʼö Yesu göi oi samahaʼö ba Daromali. Samuza inötö, samösa ndrawa Gaitiofia ibaso Daromali. Iʼondrasi ia Wilifo, imane, ”Hadia aboto ba dödöu nibasomö?” Imane niha Gaitiofia, ”Hewisa sa na lö samobawa lala khögu?” Aefa daʼö, itutunö khönia Wilifo hadia geluaha nibasonia.—Halöwö Zinenge 8:27-35.

FANOLO BA GINÖTÖ IADAʼA

Simane ndra samahaʼö meföna, ira Samaduhuʼö Yehowa lafahaʼö niha sanandrösa ba Zura Niʼamoniʼö ba zi 239 soi. (Mataiʼo 28:19, 20) Ero migu, töra siŵa zuta niha nifahaʼöra ba Zura Niʼamoniʼö. Ato moroi ba nifahaʼöra andrö si tenga niha Keriso. Famahaʼö nifaluara andre lö muʼandrö gefe ba tola mufalua ia ba nomo mazui ba nahia si tefaudu moloʼö somasi nifahaʼö. So zomasi nifahaʼö ba telefo, hegöi ba video, laʼogunaʼö komputer mazui tanö böʼönia.

Na omasi ndraʼugö öʼila nösi Zura Niʼamoniʼö, tola öfalukhaisi fazamösa ba gotalua ndra Samaduhuʼö Yehowa. Tola aboto ba dödöu wa Sura Niʼamoniʼö andre ”moguna ia ba wamahaʼö, ba ba wangotuʼö, ba ba wangaʼazökhi, ba ba wamahaʼö ba waʼatulö dödö” enaʼö so khöu ’woʼahonoa, si no toʼölö ba ngawalö mbua-bua si sökhi andrö fefu’.—II Timoteo 3:16, 17.