Yahowa, Lowalangi Somasi Fahuhuo
”Fondro-ndrongo, alakha yaʼodo zihede.”—YOB. 42:4.
1-3. (a) Hadia zangoromaʼö wa alawa wangera-ngera Lowalangi hegöi li niʼogunaʼönia moroi ba niha gulidanö? (b) Hadia nifatunöda ba duho daʼa?
OMASI Yehowa wameʼe faʼauri ba faʼohahau dödö ba gomböila dangania, andrö wa ifazökhi ndra malaʼika hegöi niha gulidanö. (Zin. 36:10; I Tim. 1:11) Si oföna nifazökhi Yehowa simane niwaʼö Yohane, yaʼia daʼö ”Taromali”. (Yoh. 1:1; Fam. 3:14) Fahuhuo Yehowa khö Yesu, ba ifatunö hadia zi so ba dödönia. (Yoh. 1:14, 17; Kol. 1:15) Ifatunö Waulo wa so li niʼogunaʼö ndra malaʼika, si faböʼö moroi ba li niʼogunaʼö niha gulidanö.—I Kor. 13:1.
2 Aboto ba dödö Yehowa fefu gomböila dangania, simane miliaran malaʼika hegöi niha gulidanö. Hewaʼae fendronga lafaʼema wangandröra niha gulidanö si töra sazuta ba faböʼö li niʼogunaʼöra, hasambalö ifondro-ndrongo Yehowa. Ba ginötö ifondro-ndrongo wangandröda, tola göi fahuhuo ia khö ndra malaʼika ba wameʼe fanuturu lala. Hewisa wa tola ifalua daʼö? Börö me fangera-ngera Yehowa hegöi li niʼogunaʼönia alawa moroi ba niha gulidanö. (Baso Yesaya 55:8, 9.) Tobali, ba ginötö fahuhuo ia ba niha, iʼogunaʼö wehede salio muʼila eluaha.
3 Ba duho daʼa, tafahaʼö ita hewisa lala wahuhuosa Yehowa ba niha gulidanö. Tola göi taʼila hewisa Yehowa wofaudugö wahuhuosania ba niha.
FAHUHUO LOWALANGI BA NIHA GULIDANÖ
4. (a) Hadia li niʼogunaʼö Yehowa me fahuhuo ia khö Moze, Zamueli, hegöi khö Dawido? (b) Hadia zi no musura ba Zura Niʼamoniʼö?
4 Me fahuhuo Yehowa khö Gadamo ba kabu Edena, tola manö li Heberaiʼo meföna niʼogunaʼönia. Aefa daʼö, fahuhuo Yehowa khö Moze, khö Zamueli, khö Dawido, ba lasura fefu niwaʼö Yehowa ba li Heberaiʼo. Hewaʼae faböʼö-böʼö lagu ba wanura yaʼia, hizaʼi fehede daʼö moroi khö Yehowa. Lasura hewisa wahuwusania ba nono mbanuania. Duma-dumania, hewisa wamati ba faʼomasira khö Lowalangi, awö zala nifaluara hegöi me faröi ira khö Yehowa. Fefu zi no musura andre moguna ia ba wamahaʼö yaʼita. —Rom. 15:4.
5. Hadia ha li Heberaiʼo niʼogunaʼö Lowalangi na fahuhuo ia ba niha? Tutunö.
5 Tenga li Heberaiʼo manö niʼogunaʼö Yehowa na fahuhuo ia ba niha. Me teʼefaʼö ndraono Gizaraʼeli moroi ba Mbabilona, so ba gotaluara zangogunaʼö li Garamo. Te daʼö mbörö wa lasura ösa nösi Zura Niʼamoniʼö ba li Garamo ira Danieli, Yeremia, ba Gesera.—Gese. 4:8; 7:12; Yer. 10:11; ba Dan. 2:4 tesura moroi ba li Garamo.
6. Hadia mbörö wa lafoʼeluaha Gamabuʼula Li si Föföna ba li ndrawa Heleni?
6 Oya ikalaisi soi Alexander Agung. Yaʼia andre moroi ba ndrawa Heleni. Börö daʼö, oya soi zangogunaʼö li ndrawa Heleni nifotöi Koine. Ato niha Yehuda sangogunaʼö li ndrawa Heleni. Andrö, lafoʼeluaha Gamabuʼula Li si Föföna ba li ndrawa Heleni, lafotöi ia Septuaginta. Daʼö Zura Niʼamoniʼö si oföna sibai lafoʼeluaha ba laʼogunaʼö. Faduhu dödö niha sagatua-tua wa so 72 niha samoʼeluaha Septuaginta andrö.a So ösa zangosisiʼö ngawua wehede moroi ba Gamabuʼula Li si Föföna ba wamoʼeluaha yaʼia, so göi zi löʼö. Faduhu dödö niha Yehuda hegöi niha Keriso sangogunaʼö li ndrawa Heleni wa Septuaginta andrö no fehede Lowalangi.
7. Hadia li niʼogunaʼö Yesu me ifahaʼö ndra nifahaʼönia?
7 Tola manö li Heberaiʼo niʼogunaʼö Yesu me so ia ba gulidanö. (Yoh. 19:20; 20:16; Hal. 26:14) Tola göi iʼogunaʼö li Garamo sasese laʼogunaʼö niha me luo daʼö. Iʼila Yesu li Heberaiʼo niʼogunaʼö Moze hegöi ndra samaʼeleʼö tanö böʼö, ba ero migu ibaso zura nisurara ba gosali. (Luk. 4:17-19; 24:44, 45; Hal. 15:21) Hewaʼae li ndrawa Heleni hegöi li Latin niʼogunaʼö me luo daʼö, lö ifatunö Sura Niʼamoniʼö wa iʼogunaʼö Yesu li tanö böʼö.
8, 9. Hadia mbörö wa ato niha Keriso zangogunaʼö li ndrawa Heleni, ba hadia wamahaʼö khöda sanandrösa khö Yehowa?
8 Li Heberaiʼo niʼogunaʼö ndra nifahaʼö Yesu meföna. Hizaʼi, me no aefa mate ia, laʼogunaʼö li tanö böʼö. (Baso Halöwö Zinenge 6:1.) Me teturiaigö duria somuso dödö, ato niha Keriso zangogunaʼö li ndrawa Heleni moroi na laʼogunaʼö li Heberaiʼo. Börö me li ndrawa Heleni zasese muʼogunaʼö me luo daʼö, andrö wa musura mbuku Mataiʼo, Mareko, Luka, ba Yohane ba li ndrawa Heleni.b Simanö göi nisura Waulo hegöi buku tanö böʼö lasura ba li ndrawa Heleni.
9 Asese laʼogunaʼö Septuaginta sanura Gamabuʼula Li si Bohou me lahalö ngawua wehede Gamabuʼula Li si Föföna. Ngawua wehede nihalöra andrö faböʼö maʼifu moroi ba li Heberaiʼo. Irugi iadaʼa, no taʼogunaʼö Zura Niʼamoniʼö nifoʼeluahara hewaʼae lö moʼahonoa ira. Daʼa zamomaha yaʼita wa lö faböʼö-böʼö wamaigi Yehowa li mazui si toʼölö mufalua ba zi sambu-sambua banua.—Baso Halöwö Zinenge 10:34.
10. Hadia zaboto ba dödöda sanandrösa ba wahuhuosa Yehowa ba niha?
10 No tafahaʼö ita hewisa wofaudugö Yehowa wahuhuosania ba niha. Lö nitatugöinia hadia li zinangea taʼogunaʼö enaʼö aboto ba dödöda gohitö dödönia. (Baso Zakharia 8:23; Famaʼeleʼö 7:9, 10.) Aboto göi ba dödöda wa no ibeʼe gehehania Yehowa ba niha wanura Sura Niʼamoniʼö, hizaʼi itehegö khöra wanura moloʼö lagu wehedera samösa.
IROROGÖ DAROMALINIA LOWALANGI
11. Hana wa lö fasala khö Yehowa na oya li niʼogunaʼö niha gulidanö?
11 Hewaʼae oya li niʼogunaʼö niha gulidanö, lö fasala khö Yehowa. Hana wa taʼila? Ba Zura Niʼamoniʼö, lö oya li Heberaiʼo niʼogunaʼö Yesu me so ia ba gulidanö. (Mat. 27:46; Mrk. 5:41; 7:34; 14:36) Hizaʼi, omasi Yehowa na musura ba mufoʼeluaha ngawua wehede Yesu ba li ndrawa Heleni mazui ba li tanö böʼö. No terorogö Daromali Lowalangi börö me no hauga kali lasura ia ira niha Yehuda hegöi niha Keriso ba lafoʼeluaha ba li tanö böʼö. Mato 400 M, imane John Chrysostom wa no mufoʼeluaha wamahaʼö Yesu ba li Garamo, Miserai, Hindru, Weresia, Gaitiofia, ba oya li tanö böʼö nasa.
12. Hadia nifalua niha enaʼö lö tetehegö tefazaewe Zura Niʼamoniʼö?
12 Moloʼö waö-waö si no alua, so niha si lö omasi na lafoʼeluaha Zura Niʼamoniʼö hegöi na labeʼe ba niha misa. So mato 300 fakhe me no aefa tumbu Yesu, ibeʼe goroisa Samatörö Roma sotöi Diokletianus ba wamakiko Sura Niʼamoniʼö si no mufoʼeluaha. 1.200 fakhe aefa daʼö, ibörötaigö ifoʼeluaha Zura Niʼamoniʼö William Tyndale ba li Inggris. Imane wangumaʼö na itehegö anau nosonia Lowalangi, Sura Niʼamoniʼö nifoʼeluahania abölö aboto ba dödö ndraono sohalöwö ba kabu moroi ba niha sohalöwö ba agama. Börö me so wolohi, moloi Tyndale moroi ba Inggris numalö ba Eropa ba wamoʼeluaha hegöi ba wamazökhi Sura Niʼamoniʼö. Ira sondröniaʼö ba agama laʼodödögö wangalui hegöi ba wotunu Sura Niʼamoniʼö. Hewaʼae simanö, Sura Niʼamoniʼö nifoʼeluaha Tyndale no tefazaewe ba niha. Ba gafuriatania, latögi mbagi Tyndale ba latunu ia ba döla geu. Hizaʼi, Sura Niʼamoniʼö nifoʼeluahania no terorogö, ba muʼogunaʼö ba wamazökhi Sura Niʼamoniʼö King James Version.—Baso II Timoteo 2:9.
13. Hadia mbuania me no lafahaʼö ira ba manuskrip Zura Niʼamoniʼö si föföna?
13 Tatu manö so maʼifu zi lö tefaudu ba faʼafaböʼö ba Zura Niʼamoniʼö si föföna. Börö daʼö, niha sagatua-tua ba Zura Niʼamoniʼö lahaogö ba wamahaʼö yaʼira moroi ba manuskrip, gadudula manuskrip, hegöi ba Zura Niʼamoniʼö si föföna. Me no aefa lafareso, laʼila wa ha maʼifu ayati si faböʼö. Hizaʼi, lö si tebulö nösi Zura Niʼamoniʼö. Börö daʼö, faduhu dödö ndraono zekola Zura Niʼamoniʼö wa Taromali andre si ndruhu-ndruhu moroi khö Yehowa.—Yes. 40:8.c
14. Hawaʼoya Zura Niʼamoniʼö si no mufoʼeluaha ba ginötö andre?
14 Hewaʼae so zomasi mamakiko Sura Niʼamoniʼö, hizaʼi no mufoʼeluaha ia ba zi töra 2.800 ngawalö li. Abölö oya ia moroi ba mbuku tanö böʼö. No göi tefazaewe ba niha hewaʼae lö ato niha si faduhu tödö khö Lowalangi. Hewaʼae ambö tefaudu wamoʼeluaha nösi Zura Niʼamoniʼö ba lö alio aboto ba dödö niha, ibeʼe khöda wanötöna sanandrösa ba waʼauri si lö aetu.
MOGUNA MUFAZÖKHI ZURA NIʼAMONIʼÖ SI BOHOU
15. (a) Hewisa waʼatebulö mbukuda si teʼodane-dane ba Zura Niʼamoniʼö iʼotarai me döfi 1919? (b) Hana wa oföna ba li Inggris lasura mbukuda?
15 Me döfi 1919, no tebayoini ndraono zekola Zura Niʼamoniʼö tobali ”sawuyu si lö faröi satua-tua”. Me luo daʼö, fahuhuo ndra sawuyu si lö faröi khö nono mbanua Lowalangi ba li Inggris. (Mat. 24:45) Ba ginötö andre no tehenaigö ngawalö mbuku si teʼodane-dane ba Zura Niʼamoniʼö ba zi töra 700 ngawalö li. Hulö simane li ndrawa Heleni meföna, simanö göi li Inggris, muʼogunaʼö ia ba nahia wogale hegöi ba zekola. Si oföna, musura ia ba li Inggris, awena mufoʼeluaha ia ba li tanö böʼö.
16, 17. (a) Hadia zinangea laʼokhögö ono mbanua Lowalangi? (b) Hewisa enaʼö tola laʼokhögö Zura Niʼamoniʼö andrö? (c) Hadia nidöna-döna Dalifusöda Knorr?
16 Fefu mbukuda teʼodane-dane ba Zura Niʼamoniʼö. Si oföna, King James Version si no awai mufazökhi me döfi 1611 laʼogunaʼö ono mbanua Lowalangi. Hizaʼi, fehede niʼogunaʼö no fehede meföna, ba abua khöra wangila eluaha. Lö oya laʼogunaʼö döi Lowalangi ba mbuku King James Version. Tobali ba manuskrip satua, ngahönö döi Lowalangi si no tesura. Famoʼeluaha ba mbuku King James Version oya zi fasala ba oya ayati si no lanönö si lö hadöi ba manuskrip satua. Simanö göi wamoʼeluaha Sura Niʼamoniʼö ba li Inggris tanö böʼö, oya zi lö tefaudu.
17 Börö daʼö, moguna laʼokhögö Zura Niʼamoniʼö si tefaudu ba salio laʼila eluaha ono mbanua Lowalangi. Latuyu ndra talifusöda sohalöwö ba Panitia Penerjemahan Alkitab Dunia Baru, ba lafazökhi iʼotarai me döfi 1950 irugi 1960. Lazara-zara wamazökhi Zura Niʼamoniʼö irugi 6 faosatö. Faosatö si oföna, lafazökhi me 2 mbaŵa si Walu 1950 ba laʼombakhaʼö ba gangowuloa sebua. Aefa daʼö, faosatö si 2 irugi 6 lafazökhi ofeta döfi 1960. Ba gangowuloa andrö, imane Talifusöda Knorr wa moguna laʼokhögö ono mbanua Lowalangi Zura Niʼamoniʼö si bohou si no lafoʼeluaha, si tefaudu ba nisura ndra nifahaʼö Yesu meföna. Daʼö zanolo yaʼira enaʼö aboto ba dödöra zindruhu. Itötöna Dalifusöda Knorr wa Terjemahan Dunia Baru tola möi fanolo niha tola möi fanolo niha si hauga zuta faʼato enaʼö aboto ba dödöra Yehowa.
18. Hana wa tola mufoʼeluaha Zura Niʼamoniʼö?
18 Alua gohitö dödö Dalifusöda Knorr me döfi 1963. No lafazökhi Kitab-Kitab Yunani Kristen ba li Belanda, Prancis, Jerman, Italia, Portugis, ba Spanyol. Me döfi 1989, lafazökhi departemen si bohou ira Badan Pimpinan Samaduhuʼö Yehowa ba gödo sebua ba wanolo ndra talifusöda samoʼeluaha Sura Niʼamoniʼö. Aefa daʼö, me döfi 2005, latehegö wamoʼeluaha Sura Niʼamoniʼö ba li si no teʼasogö Manuriaigö. Mbuania, no teʼasogö Terjemahan Dunia Baru ba zi töra 130 ngawalö li, he si no awai hegöi si löʼö.
19. Hadia zalua me döfi 2013, ba hadia nifatunöda ba migu fönada?
19 Oya li Inggris zi no faböʼö iʼotarai me awena tefazökhi Terjemahan Dunia Baru si oföna. Börö daʼö, moguna mubohouni ngawua wehedenia. Me 5 ba 6 mbaŵa si Fulu 2013, so 1.413.676 moroi ba zi 31 soi zangondrasi angowuloa nifalua ero röfi si no mufalua 129 kali mufalua ba Watch Tower Bible and Tract Society of Pennsylvania. Samösa moroi ba gotalua Badan Pimpinan iʼombakhaʼö wa no tefazökhi Terjemahan Dunia Baru ba li Inggris sawena mubohouni. Omuso dödö zangondrasi fao feʼe börö me tola laʼokhögö Zura Niʼamoniʼö sawena mufoʼeluaha. Me ibaso ayati Zura Niʼamoniʼö sawena mufoʼeluaha si fahuhuo, aboto ba dödö niha sangondrasi wa ngawua wehede si no lafoʼeluaha andrö aoha sibai wangila eluahania. Ba wamahaʼö migu fönada, tafahaʼö ita sanandrösa ba Zura Niʼamoniʼö sawena mufazökhi, ba hewisa wamoʼeluaha yaʼia ba li tanö böʼö.
a Septuaginta eluahania ”Fitu ngafulu”. Tebörögö wamoʼeluaha yaʼia me 300 fakhe SM ba awena awai 150 fakhe aefa daʼö. Nifoʼeluahara andrö moguna ofeta mane maʼökhö börö me daʼö zanolo niha sagatua-tua ba Daromali ba wamoʼeluaha fehede li Heberaiʼo mazui ayati si lö muʼila eluaha.
b So zangumaʼö wa isura mbukunia Mataiʼo ba li Heberaiʼo ba ifoʼeluaha samösa ba li ndrawa Heleni.
c Faigi ba mbuku Buku bagi Semua Orang, ngaʼörö 7-9, ”Bagaimana Buku Ini Dapat Tetap Bertahan?”