Waö-Waö Safönu Fanandraigö

Zura Niʼamoniʼö no buku si faehu moroi ba mbuku agama tanö böʼö. Lö buku tanö böʼö sabölö ara nifaduhusi tödö niha sato. Aefa daʼö lö buku tanö böʼö baero Zura Niʼamoniʼö sabölö oya nifareso hegöi niʼalui zala.

Duma-dumania, so ösa sagalawa sekola ambö faduhu dödöra wa nösi Zura Niʼamoniʼö ba ginötö iadaʼa simane nisura me föna. Imane samösa profesor ba agama, ”Lö aboto ba dödöda hadia no atulö wamoʼeluahada nösinia simane si föföna. Famoʼeluaha niʼokhögöda oya zi fasala. Soyania tefazökhi me no hauga ngautu fakhe me no aefa tesura si föföna ba oya sibai gamaehutania.”

Tanö böʼönia ambö faduhu dödöra hadia simane si föföna nösi Zura Niʼamoniʼö börö waʼafaehu agama. Simane samösa ndra matua sotöi Faizal. No lafahaʼö ia ira satuania si tenga niha Keriso wa Sura Niʼamoniʼö andrö buku Niʼamoniʼö, hizaʼi no tebulö. Imane wangumaʼö, ”Manahö dödögu na so niha somasi fahuhuo khögu ba Zura Niʼamoniʼö börö me lö khöra Sura Niʼamoniʼö si föföna. No tebulö daʼö!

Hadia tobali taha-taha ma löʼö na tebulö Zura Niʼamoniʼö? Angeraigö anofula daʼa: Hadia tola öfaduhusi tödö nifabuʼu Zura Niʼamoniʼö sameʼe fondrara dödö ba zi so föna na lö öʼila wa nifabuʼu andrö so ba naskah si föföna? (Roma 15:4) Hadia omasi öʼoʼö mene-mene Zura Niʼamoniʼö ba ginötö öhalö gangetula sanandrösa ba halöwö, ösi nomou, mazui famosumange na tebulö nösi Zura Niʼamoniʼö iadaʼa?

Hewaʼae buku-buku Zura Niʼamoniʼö si föföna no taya, tola tafuli tafareso Sura Niʼamoniʼö zi no irai lasali me föna, simane ngahönö naskah-naskah Sura Niʼamoniʼö. Hana wa tola anau gölö naskah andrö hewaʼae so zomasi wamakiko yaʼia, ato zi fatuwu, hegöi so zomasi zombulöʼö ösinia? Börö me Sura Niʼamoniö so irugi iadaʼa, hadia faduhu dödömö wa ösinia simane si föföna? Angeraigö wanema li zinofu andrö, ba faigi waö-waönia safönu fanandraigö.