TUHO SI OFÖNA | HADIA ZALUA BA DALU MBANUA
Fanofu Sanandrösa Khöra si So ba Dalu Mbanua
Hadia no irai manofu-nofu ndraʼugö hewisa dalu mbanua andrö ba haniha manö zi toröi ba daʼö? Na noa, tenga ha yaʼugö zanofu daʼö. Ngahönö fakhe faʼara, no latahö-tahö niha sanandrösa ba daʼö. So ösa zi faduhu tödö wa ira satuada meföna zangiagö talu mbanua andrö, ba moguna lafosumange ira. Ato göi zokhalaigö wa daʼö nahia waʼomuso dödö sahono nifotöi sorugo, ba malaʼika hegöi niha si sökhi si no mate sangiagö nahia andrö. So göi zangumaʼö wa talu mbanua andrö no nahia ndra dewa si ngaotu zuta faʼato.
Ato zangumaʼö wa lö tola taʼila hadia ia zalua ba zorugo, börö me lö irai so zi möi ba nahia andrö ba mangawuli ira wanutunö khöda. Hizaʼi, lö atulö daʼö. No irai so Yesu ba zorugo, ba dalu mbanua, fatua lö möi ia ba gulidanö. Ifatunö daʼö khö ndra sondröniaʼö ba agama me döfi si föföna, ”Tenga ba wolau somasi ndraʼo möido tou ba moroi ba zorugo, ba wolau somasi samatenge yaʼo möido tou.” Andrö wa tola ifatunö Yesu khö ndra sinengenia me iwaʼö, ”Oya nahia ba nomo Namagu.”—Yohane 6:38; 14:2.
Ama Yesu, tatu manö Lowalangi, töinia Yehowa, ba ”omo” Yehowa yaʼia daʼö sorugo. (Zinunö 83:19) Andrö wa lö hadöi zabölö sökhi si tola mokhalaigö talu mbanua si lö oroma andre baero Yehowa hegöi Yesu. Oya latutunö hewisa zindruhunia dalu mbanua yaʼia daʼö laʼodela gangilata sahöli-höli dödö nifaʼema ba niha samati.
Ba artikel daʼa, itutunö khöda faosatö Zura Niʼamoniʼö sanandrösa ba gangilata-gangilata si no lafaʼelöʼö ba ndra matua si lö atoto. Ba ginötö ötandraigö enaʼö aboto ba dödöu gangilata andrö, törö tödöu wa talu mbanua andrö lö moboto ba tebai tababaya mazui taʼila höröda ia. Daʼö mbörö wa iʼogunaʼö Lowalangi ngawua wehede salio muʼila eluaha ba wanutunö gangilata andrö. Angilata daʼa, zanolo yaʼugö enaʼö so khöu wa aboto ba dödö sanandrösa khö ndra sangiagö ’nahia soya’ ba dalu mbanua.