TUHO SI OFÖNA | MALAʼIKA—HADIA NIWAʼÖ ZURA NIʼAMONIʼÖ SANANDRÖSA KHÖRA?

Hadia Niwaʼö Zura Niʼamoniʼö Sanandrösa ba Malaʼika?

Hadia omasi öʼila hadia niwaʼö Zura Niʼamoniʼö sanandrösa ba malaʼika, haniha ira, hadia mbörö wa tola so ira, ba hadia nifaluara? Lö hadöi fanema li tanö böʼö si tola muʼodaligö baero Daromali Lowalangi, Sura Niʼamoniʼö. (II Timoteo 3:16) Hadia nifatunö Zura Niʼamoniʼö khöda?

Hulö simane Lowalangi soboto Eheha, simanö göi malaʼika, lö muʼila hörö ”ba lö nagole, ba lö töla”. Ba zorugo toröi malaʼika si lö faröi ba tola falukha bawa ira khö Lowalangi ba zorugo.—Luka 24:39; Mataiʼo 18:10; Yohane 4:24.
Itaria göi laʼogunaʼö mboto tanö ira malaʼika ba wamalua halöwö nibeʼe Lowalangi khöra ba gulidanö ba na no aefa lafalua halöwö andrö ba lafuli ira ba ngaʼeura si toʼölö.—Zanguhuku 6:11-23; 13:15-20.
Hewaʼae iʼamaedolagö Sura Niʼamoniʼö malaʼika andrö simane ndra matua, hizaʼi lö hadöi ba gotaluara nifotöi ira alawe mazui ira matua. Lö mangowalu ira ba lö tumbu khöra ndraono simane yaʼira. Hizaʼi, tenga simane niha gulidanö ndra malaʼika, tobali iraono sawuyu, iraono side-ide, mazui niha sebua-bua. Niwöwöi Yehowa ira, andrö wa ifotöi ira Sura Niʼamoniʼö ’ono Lowalangi’.—Yobi 1:6; Zinunö 148:2, 5.
Itutunö Sura Niʼamoniʼö sanandrösa ba ”fehede niha ba fehede malaʼika”, zangoromaʼö wa laʼogunaʼö göi li ba tola mohede. Hewaʼae na iʼogunaʼö malaʼika Lowalangi wahuhuosa ba niha, hizaʼi, lö itehegö khöda na mangalulu ita khö malaʼika mazui na mangandrö ita khöra.—I Korindro 13:1; Famaʼeleʼö 22:8, 9.
Faʼato ndra malaʼika wulu ngahönö wa fulu ngahönö, te miliaran waʼatora.—Danieli 7:10; Famaʼeleʼö 5:11.
”Sabölö” sa malaʼika, ba töra waʼabölöra moroi ba niha ba alawa waʼatua-tuara. Tola lafalua wofanö salio sibai, ba tebai takhalaigö waʼaliora.—Zinunö 103:20; Danieli 9:20-23.
Hewaʼae no so khöra waʼabölö, hizaʼi so ndrege waʼabölöra göi ba so ösa zi lö laʼila.—Mataiʼo 24:36; I Fetero 1:12.
Ira malaʼika andrö so khöra gamuata, mbua-bua Lowalangi, hegöi fangaʼi angetula samösa. Tobali, simane niha gulidanö tola göi latatugöi hadia lafalua zatulö mazui löʼö. Hizaʼi, so ösa malaʼika samadaö khö Lowalangi.—Yuda 6.

Hewisa Wamöföʼö Lowalangi Ndra Malaʼika?

Salawa malaʼika, yaʼia daʼö Mikhaʼeli, malaʼika si so waʼabölö hegöi famatörö fondrege zalawa. Sura Niʼamoniʼö zanutunö wa Mikhaʼeli andrö no töi böʼö moroi khö Yesu Keriso.—I Tesalonika 4:16; Yuda 9.

Serafi, yaʼia daʼö malaʼika si so fetaro fondrege zalawa ba gotalua ndra malaʼika ba no tebeʼe khöra halöwö si tohude, ba yaʼira zohalowö ba zi fasui dadaoma Lowalangi.—Yesaya 6:1-3.

Kerubi so göi khöra wetaro salawa, ba so halöwöra si tohude. Falukha bawa ira wohalöwö khö Lowalangi, ba asese muʼamaedolagö so ira fönania.—I Moze 3:24; Hezekieli 9:3; 11:22.

Malaʼika-malaʼika tanö böʼö si tebai muʼerai waʼatora samaʼema turia, tebeʼe göi khöra halöwö si tobali tenge-tenge hegöi salahi Fondrege Zalawa ba wamalua ohitö dödö Lowalangi.a—Heberaiʼo 1:7, 14.

a Enaʼö öʼila danö böʼönia nasa sanandrösa khö malaʼika, faigi faza 10 mbuku Apa yang Sebenarnya Alkitab Ajarkan? hegöi apendiks tuhonia, ”Siapakah Mikhael, sang Penghulu Malaikat?” nifazökhi ndra Samaduhuʼö Yehowa. No tehenaigö ba www.pr2711.com/id..