Oʼö Ndra Malaʼika si Lö Faröi

1-2. (a) Hadia gamaehutada moroi khö ndra malaʼika? (b) Hadia zi fagölö ita moroi khö ndra malaʼika?

ME IDÖNI ndraʼugö Yehowa ba zindruhu, no ikaoni ndraʼugö ba nösi nomonia sato sibai safönu faʼomasi, farahu ba daʼö ndra malaʼika si lö faröi si hauga zuta faʼato. (Dan. 7:​9, 10) Na taʼangeragö sanandrösa khö ndra malaʼika, aboto ba dödöda wa aröu sibai faehu ita moroi khöra. Duma-dumania, oföna tewöwöi ndra malaʼika moroi khöda. (Yob. 38:​4, 7) Abölö ira moroi khöda. Baero daʼö, atulö ba teʼamoniʼö sibai ira, tenga simane yaʼita niha si lö moʼahonoa.—Luk. 9:26.

² Hewaʼae oya sibai gamaehutada, hizaʼi oya göi zi fagölö ita khö ndra malaʼika. Duma-dumania, simane yaʼira tola göi taʼokhögö ba taʼoʼö gamuata Yehowa. No göi tebeʼe khöda ginötö ba wangai angetula. Simane yaʼira, so göi döida zamösana ba no faböʼö-böʼö gamuatada hegöi halöwö nibeʼe khöda. Ba fagölö sibai simane ira malaʼika, omasi göi ita tafosumange Zomböi yaʼita.—1 Fe. 1:12.

3. Hadia wamahaʼö nihalöda moroi khö ndra malaʼika si lö faröi?

³ Börö me oya zi fagölö ita khö ndra malaʼika, tatu oya zi sökhi si tola tahalö khöda famahaʼö moroi khöra. Möi famarou dödöda duma-dumara. Ba artikel daʼa dania, tatutunö hewisa woloʼöda duma-duma fangide-ngideʼö niforomaʼö ndra malaʼika si lö faröi, faʼomasira ba niha, faʼanau gölöra hegöi famorege nifaluara enaʼö lö taʼunö mbanua niha Keriso.

FANGIDE-NGIDEʼÖ NIFOROMAʼÖ NDRA MALAʼIKA

4. (a) Hewisa ndra malaʼika wangoromaʼö fangide-ngideʼö? (b) Hadia mbörö wa laforomaʼö wangide-ngideʼö ira malaʼika? (Sinunö 89:7)

⁴ Laforomaʼö wangide-ngideʼö ira malaʼika si lö faröi. Hewaʼae no toʼölö ira wamalua halöwöra, so khöra waʼabölö ba faʼatua-tua, hizaʼi lö tebulö laʼoʼö niwaʼö Lowalangi Yehowa. (Si. 103:20) Lö asiliyawa ira na lafalua halöwöra mazui lahöni-höni waʼabölöra. Lafalua gohitö dödö Lowalangi hewaʼae na lö tetötöi döira.a (1 Mo. 32:​24, 29; 2 Ra. 19:35) Lö omasi ira latema zumange börö me ha Yehowa zinangea manema daʼö. Hadia mbörö wa laʼokhögö wangide-ngideʼö? Börö me laʼomasiʼö sibai Yehowa ba lafosumange ia.—Baso Zinunö 89:7.

5. Hewisa zi samösa malaʼika wangoromaʼönia fangide-ngideʼö me ibeʼe mene-mene khö zinenge sotöi Yohane? (Faigi göi gambara.)

⁵ Nehegö hewisa zi samösa malaʼika wangoromaʼö fangide-ngideʼö. Me döfi 96 M, so samösa malaʼika si lö mutötöi töi samaʼema angilata sahöli-höli dödö khö zinenge sotöi Yohane. (Fam. 1:1) Hadia nifalua Yohane me itema gangilata andrö? Ituhi danö föna malaʼika. Hizaʼi, iʼanemaiʼö itaha ia malaʼika si lö faröi andrö ba imane, ”Böi! Böi angalulu khögu! Khö Lowalangi angalulu! Sawuyu göi ndraʼo simane yaʼugö ba simane ira talifusöu fefu!” (Fam. 19:10) Sindruhu-ndruhu so wangide-ngideʼö khö malaʼika andrö! Lö omasi ia lafolakhömi mazui lahöni-höni. Ifasugi ba dödö Yohane enaʼö ha Yehowa nifosumangenia. Baero daʼö, lö iʼaohasi ba dödö Yohane. Hewaʼae no ara ifosumange Yehowa malaʼika andrö ba abölö ia moroi khö Yohane, hizaʼi si fao fangide-ngideʼö ifatunö wa fagölö-gölö ira sawuyu. Me ibeʼe mene-mene khö Yohane, lö mofönu ia wangumaʼö. Ihaogö wahuhuosa, ba aboto ba dödönia wa ifalua daʼö Yohane te börö waʼahöli-höli dödönia.

6. Hewisa woloʼöda fangide-ngideʼö ndra malaʼika?

⁶ Hewisa woloʼöda fangide-ngideʼö ndra malaʼika? Omasi ita tafalua halöwöda si fao fangide-ngideʼö, lö taʼalui lala enaʼö lazuno-zuno ita mazui taforomaʼö wa yaʼita zabölö onekhe. (1 Ko. 4:7) Baero daʼö, lö tawaʼö wa abölö tohude ita börö me no ara tafosumange Yehowa mazui börö me so halöwö si tohude nitemada. Sindruhunia, na itugu oya noro dödö nibeʼe khöda, sinangea na abölö taforomaʼö wangide-ngideʼö. (Luk. 9:48) Simane ira malaʼika, omasi ita tafosumange niha böʼö ba lö omasi ita taforomaʼö waʼapadeda.

7. Hewisa wangoromaʼöda fangide-ngideʼö na tabeʼe mene-mene ba zi samösa niha?

⁷ Tola göi taforomaʼö wangide-ngideʼö na tabeʼe mene-mene khö ndra talifusöda si sara lala wamati mazui ba ndraonoda. Itaria moguna tabeʼe mene-mene sabeʼe. Hizaʼi simane nifalua malaʼika no mege khö Yohane, tahaogö wamaʼema daʼö faböi afatö dödönia. Na lö tawaʼö tödöda wa abölö tohude ita moroi ba niha böʼö, tola tafaʼema mene-mene si teʼodane-dane ba Zura Niʼamoniʼö si fao famosumange ba faʼahakhö dödö.—Kol. 4:6.

LAʼOMASIʼÖ NIHA IRA MALAʼIKA

8. (a) Moloʼö Luka 15:​10, hewisa ndra malaʼika ba wangoromaʼö faʼomasira ba niha? (b) Hadia nifalua ndra malaʼika sanolo yaʼita ba wamalua halöwö fanuriaigö? (Faigi göi gambara ba guli majalah.)

⁸ Lö laʼaohasi ba dödö niha ira malaʼika. Omasi sibai ira niha gulidanö. Omuso dödöra na so samösa zamalua horö samalalini era-erania, duma-dumania na so mbiri-biri Yehowa si no taya ba ifuli ia, mazui na so niha sanemaʼö sindruhu ba ifaböʼöni lala waʼaurinia. (Baso Luka 15:10.) Lö göi laböhöli ira malaʼika ba wanuriaigö turia somuso dödö sanandrösa ba Wamatörö Lowalangi. (Fam. 14:6) Hewaʼae na lö faʼila bawa ira ba niha, hizaʼi labeʼe wanuturu lala khö ndra sanuriaigö irege falukha ira ba niha somasi mamahaʼö yaʼira sanandrösa khö Yehowa. Tatu manö tebai tawaʼö wa no fao ndra malaʼika ero na so niha sadöni tödö ba zindruhu. Tola iʼogunaʼö gehehania Yehowa ba wanolo niha mazui ba wameʼe fanuturu lala ba nono mbanuania. (Hal. 16:​6, 7) Hewaʼae simanö, iʼogunaʼö göi ndra malaʼika ba wanolo yaʼita wamalua fanuriaigö. Tobali, na möi ita manuriaigö turia somuso dödö, faduhu dödöda wa so ndra malaʼika sotuhini yaʼita.—Faigi göi kotak ”Tebeʼe Wanema Li ba Wangandröra”.b

9. Hewisa woloʼöda duma-duma ndra malaʼika ba wangoromaʼö faʼomasi ba niha?

⁹ Hewisa woloʼöda duma-duma ndra malaʼika ba wangoromaʼö faʼomasi ba niha? Na tarongo gangombakhata wa no ifuli latemaʼö zi samösa niha ba mbanua niha Keriso, omuso sibai dödöda simane ira malaʼika. Tatemaʼö ba taforomaʼö wa taʼomasiʼö sibai ira. (Luk. 15:​4-7; 2 Ko. 2:​6-8) Tola göi taʼoʼö nifalua ndra malaʼika na taforege wamalua halöwö fanuriaigö. (Sango. 11:6) Simane ira malaʼika, taʼalui lala ba wanolo ira talifusöda enaʼö göi lasöndra waʼomuso dödö ba wamalua halöwö fanuriaigö. Duma-dumania, hadia omasi ita falulu fohalöwö khö ndra talifusöda sawena fao ba wanuriaigö? Hadia tola falulu fohalöwö ita khö ndra talifusöda si no agalawa döfi mazui si tebai boto enaʼö lasöndra göi waʼomuso dödö ba halöwö fanuriaigö nifaluara?

10. Hadia wamahaʼönia khöda moroi ba zalua khö dalifusöda Sara?

¹⁰ Hadia nifaluada na tebai saʼae tafalua halöwö fanuriaigö börö zalua khöda? Tola taʼalui lala tanö böʼö enaʼö lö tebulö falulu fohalöwö ita khö ndra malaʼika ba wamalua fanuriaigö. Nehegö duma-duma salua khö dalifusöda ira alawe sotöi Sarac moroi ba India. Me no merintis ia sagötö zi 20 fakhe, mofökhö Sara irege tebai ifazawa ia ba naha wemörö. Tatu manö fawuka gera-erania. Hizaʼi börö wanolo si fao faʼomasi moroi khö ndra talifusönia si sara lala wamati ba lö iböhöli göi wombaso Sura Niʼamoniʼö, daʼö mbörö wa iʼokhögö lala wangera-ngera si sökhi. Börö zalua andrö, tebulö lala wamaluania halöwö fanuriaigö. Börö me tebai modadao ia ba wanura sura, iʼogunaʼö telefo na manuriaigö ia. Itelefo niha si no irai ifalukhaisi, ba lafatunö khönia wa so nasa zomasi tefahaʼö ba Zura Niʼamoniʼö. Hadia mbuania? Ha mato hauga waŵa, so 70 niha nifahaʼö Sara ba Zura Niʼamoniʼö irege tebai idöniaʼö wamahaʼö khöra fefu. Börö daʼö, ibeʼe ösa khö ndra talifusöda ba gangowuloa. Ato ba gotalua niha nifahaʼönia andrö zangondrasi angowuloa. Hawaʼomuso dödö ndra malaʼika börö me tola falulu fohalöwö ira khö ndra talifusöda simane Sara, samorege wamalua halöwö fanuriaigö ndrohu-ndrohu zi tola lafalua!

FAʼANAU GÖLÖ NIFOROMAʼÖ NDRA MALAʼIKA

11. Hewisa ndra malaʼika si lö faröi ba wangoromaʼö faʼanau gölö?

¹¹ No tobali duma-duma si sökhi khöda ndra malaʼika si lö faröi ba wangoromaʼö faʼanau gölö. No ngafulu ribu fakhe anehe ira ngawalö walöʼatulö hegöi faʼalösökhi ba gulidanö. Laʼila samösa hewisa Zatana hegöi ira malaʼika tanö böʼö si no irai fao khöra me mböröta, iadaʼa lalawa Yehowa. (1 Mo. 3:1; 6:​1, 2; Yud. 6) Itutunö göi khöda Sura Niʼamoniʼö sanandrösa khö zi samösa malaʼika si lö faröi si faʼudu ba wolawa malaʼika si lö sökhi ba sabölö. (Dan. 10:13) Sagötö sejarah, laʼila ira malaʼika wa lö ato niha somasi mamalua famosumange satulö. Hewaʼae simanö, lö laböhöli wamosumange Yehowa si fao faʼowölö-ölö ba faʼomuso dödö. Aboto ba dödöra wa so dania ginötö si no ihonogöi Yehowa ba wangohori falöʼatulö.

12. Hadia zanolo yaʼita enaʼö anau gölöda?

¹² Hewisa woloʼöda duma-duma waʼalöfaröi ndra malaʼika? Simane ira malaʼika, itaria taʼila ngawalö walöʼatulö mazui alua khöda wolohi. Hizaʼi, faduhu dödöda wa hasambalö ihori fefu ngawalö waʼalösökhi Yehowa ba ginötö si tefaudu. Börö daʼö, simane ira malaʼika si lö faröi ”böi atage ita wamalua si sökhi”. (Gal. 6:9) No ifabuʼu Lowalangi wa hasambalö itolo ita enaʼö anau gölöda. (1 Ko. 10:13) Tola taʼandrö geheha niʼamoniʼö khö Yehowa, sangaʼasogö khöda faʼebolo dödö hegöi faʼomuso dödö. (Gal. 5:22; Kol. 1:11) Hewisa na alua khöda wolohi? Faduhusi tödö Yehowa ba böi ataʼufi. Lö tebulö itolo ndraʼugö Yehowa ba ibeʼe khöu waʼabölö.—Heb. 13:6.

LAROROGÖ ENAʼÖ LÖ RAʼIÖ MBANUA NIHA KERISO

13. Hadia halöwö si tohude nifalua ndra malaʼika sagötö ngaluo safuria? (Mataiʼo 13:​47-49)

¹³ Sagötö ngaluo safuria, so halöwö si tohude nibeʼe Yehowa khö ndra malaʼika. (Baso Mataiʼo 13:​47-49.) Ba zi sagörö ulidanö, zuta niha sadöni tödö ba duria somuso dödö. So ösa ba gotaluara zamaudugö faʼaurira ba goi-goi Yehowa hegöi ba wamosumange yaʼia ba lala satulö. Hizaʼi, so ösa zi lö omasi mamalua daʼö. Tobali, tebeʼe halöwö khö ndra malaʼika ba ”wamöföʼö niha si lö sökhi moroi ba gotalua niha satulö”. Eluahania, moguna larorogö enaʼö lö raʼiö mbanua niha Keriso. Hewaʼae simanö, tenga daʼö geluahania wa tebai saʼae mangawuli ba gangowuloa dozi niha si no mamöhöli halöwö ba wamati. Tenga göi daʼö geluahania wa lö irai alua gabula dödö ba mbanua niha Keriso. Faduhu dödöda wa no laforege ira malaʼika ba wondrorogö enaʼö lö raʼiö mbanua niha Keriso.

14-15. Hewisa woloʼöda nifalua ndra malaʼika ba taforomaʼö wa omasi ita enaʼö lö raiʼö mbanua niha Keriso? (Faigi göi gambara.)

¹⁴ Hewisa woloʼöda nifalua ndra malaʼika ba wondrorogö enaʼö lö raʼiö mbanua niha Keriso? Moguna taforege ba wondrorogö fahuwusada khö Yehowa. Tola tafalua daʼö na tafili zi fahuwu sangomasiʼö yaʼia ba lö tafalua fefu zi tola mamakiko fahuwusada khönia. Na tafalua daʼö, no tarorogö enaʼö lö raʼiö mbanua niha Keriso. (Si. 101:3) Tola göi tatolo ndra talifusöda ba wondrorogö faʼalöfaröira khö Yehowa. Duma-dumania, hadia zinangea tafalua na taʼila so dalifusöda samalua horö sebua? Börö me taʼomasiʼö ia, tatu tafarou ia enaʼö ifatunö daʼö khö ndra satua sokubaloi. Hizaʼi, na lö ifalua daʼö, moguna yaʼita samösa zamatunö salua andrö khö ndra satua sokubaloi. Ohitö dödöda enaʼö itema wanolo talifusöda andrö ba waʼalio!—Yak. 5:​14, 15.

¹⁵ Hizaʼi, so ösa zamalua horö sebua niheta ba mbanua niha Keriso. Na daʼö zalua, ’lö saʼae fariawö’ ita khöra.d (1 Ko. 5:​9-13) Amakhoita andre zondrorogö enaʼö lö raʼiö mbanua niha Keriso. Baero daʼö, na taʼoʼö niwaʼö Yehowa ba lö fariawö ita khöra, sindruhunia no taforomaʼö khöra waʼasökhi dödö. Daʼö zanolo yaʼira enaʼö laʼila wa moguna mangawuli ira khö Yehowa. Na lafalua daʼö, tatu omuso sibai dödöda, simanö göi Yehowa hegöi ira malaʼikania.—Luk. 15:7.

16. Hadia manö mbua-bua sinangea taʼoʼö moroi khö ndra malaʼika?

¹⁶ Sindruhu-ndruhu no töi sebua me tola taʼila sanandrösa khö ndra malaʼika ba falulu fohalöwö ita khöra! Dataʼoʼö mbua-bua si sökhi niʼokhögöra simane fangide-ngideʼö, faʼomasira ba niha, faʼanau gölöra hegöi famorege nifaluara ba wondrorogö enaʼö lö raʼiö mbanua niha Keriso. Na taʼoʼö duma-duma ndra malaʼika si lö faröi, tola tobali ita ösi nomo Yehowa samosumange yaʼia sagötö faʼara.