”Daʼa Mbuala Fondrege zi Sökhi si No Irai Utema”

Daʼö nirasoi samösa nono alawe si 13 fakhe me laʼamualagö khönia sara nono nasu. Samösa ndra alawe, pengusaha si no sukses sangumaʼö wa komputer nibeʼe namania me SMA ia no buala sombulöʼö faʼaurinia. Ba samösa foʼomo ira matua si bohou mangowalu sangumaʼö, wa no buala fondrege zi sökhi nitemania kartu ulang tahun siföföna wangowalura nifazökhi woʼomonia ira alawe.

Ero röfi, ato niha sangohorigö inötö hegöi samorege ba wangalui buala ”fondrege zi sökhi” nibeʼe khö nawöra mazui khö zi faʼila khöra ba ginötö si tohude. Ba ato zomuso tödö na so zangumaʼö fehede simane megeno moroi yawa. Hewisa göi ndraʼugö? Hadia omasi öbeʼe mazui ötema mbuala niʼameʼegö tödö sibai?

Mamuala no sambua faʼomuso dödö, tenga ha börö me so lua-luania khö zanema, hizaʼi börö me tola göi molua-lua ba zamuala. Hewaʼae simanö, imane Sura Niʼamoniʼö, ”Ohahau dödö ba wameʼe, moroi ba wanema.” (Halöwö Zinenge 20:35) Tatu manö, tola monönö waʼomuso dödö zamuala na iʼameʼegö tödö sibai mbuala andrö sanema.

Tobali, hewisa enaʼö tola öbeʼe mbuala si tola möi börö waʼomuso dödö khöu hegöi khö zanema? Na tebai öbeʼe mbuala ”fondrege zi sökhi”, hadia nifaluau enaʼö tola muʼameʼegö tödö mbuala andrö?