Mangalui Buala Fondrege zi Sökhi

Mangalui buala si tefaudu ba zi samösa niha tenga halöwö saoha. Hewaʼae simanö, sanema zotatugöi hawaʼebua mböli mbuala andrö ba dödönia. Ba hewaʼae no sökhi sibai moloʼö zanema lö tatu na simane daʼö wamaigi niha böʼö.

Duma-dumania, samösa zi bohou ebua zoraso tödönia wa fakake elektronik si bohou no buala soʼahonoa. Ba niha si no ebua-bua, te abölö laʼameʼegö tödö mbuala si fagöna ba dödö, simane harato zatua. Ba zi hauga banua, buala sabölö laʼomasiʼö satua hegöi iraono yaʼia daʼö kefe, enaʼö tola iʼogunaʼö daʼö sanema ba zomasi-masi dödönia.

He na so daha-taha, ato niha sangogunaʼö faʼatua-tua ba wangalui buala sabölö tefaudu ba niha si tohude. Hewaʼae tenga saoha wangalui buala simane daʼö börö zoya ngawalö, hizaʼi na muʼodödögö tola manö musöndra. Datatutunö zi öfa ngawalö zi tola monönö faʼomuso dödö khö zanema.

Somasi zanema. Samösa ndra matua moroi ba Belfast, Irlandia Utara, zamotöi kureta balap nitemania me 10 mazui 11 fakhe ndröfinia, no buala fondrege zi sökhi si no irai so. Hadia mbörö? Imane wangumaʼö, ”Börö me edönado sibai wangokhögö yaʼia.” Fehede daʼö zangoromaʼö wa faʼomasi zi samösa niha ba mbuala andrö moʼamakhaita ba woʼameʼegönia tödö mbuala andrö mazui löʼö. Tobali, angeraigö sanandrösa ba niha sinangea öbeʼe buala. Tandraigö alui hadia niʼameʼegönia tödö, börö me foʼamegö tödö zi samösa niha asese moʼamakhaita ba zomasi ia. Duma-dumania, asese sibai ebua ba dödö dua hegöi gawe ginötöra ba wefao ba nösi nomora. Te omasi ira asese laʼila ndraono hegöi maʼuwura. Liburan si sambua omo si fao tua ba awe te abölö laʼameʼegö tödö moroi ba mbuala tanö böʼö nibeʼe khöra.

Sambua lala enaʼö tola taʼila hadia zomasi zi samösa niha, moguna tobali ita samondro-ndrongo si sökhi. Ibeʼe wamarou dödö Sura Niʼamoniʼö, ”Ndramuʼalioʼö wamondrongo, böi ndramufahulö wehede.” (Yakobo 1:19) Ba ginötö fao ndraʼugö wahuhuosa ba nawö mazui khö dalifusöu ero maʼökhö, haogö wamondro-ndrongo hadia manö zomasi hegöi si lö omasi ira. Tobali, tola öfaudugö ba wameʼe khöra buala.

Soguna khö zanema. Tola manö iʼameʼegö tödö sibai mbuala andrö sanema hewaʼae na no fondrege zide-ide na tefaudu ba zoguna khönia. Tobali, hewisa enaʼö öʼila hadia zoguna ba zi samösa niha?

Te lala sabölö aoha enaʼö tola muʼila yaʼia daʼö na ösofu hadia zoguna khönia mazui hadia zomasi ia. Hizaʼi, tola alö waʼomuso dödö zamuala na simane daʼö, börö me abölö omasi ira na lö idöna-döna sanema mbuala andrö. Aefa daʼö, so ösa niha aoha khöra ba wanutunö sanandrösa ba zomasi mazui si lö omasi ira, sasesenia lö latutunö hadia zoguna khöra.

Börö daʼö, nehegö hegöi sura zalua ba zi samösa niha. Hadia yaʼia samösa ono matua mazui ono alawe sawuyu-wuyu, atua, lö sangowalu, no mangowalu, no fabali auri, ira alawe lakha mbanua, sohalöwö, mazui no pensiun? Angeraigö hadia mbuala si tola mamönökhi soguna ba zi samösa niha.

Enaʼö aboto ba dödöu mbuala soguna khö zanema, moguna fahuhuo ndraʼugö ba niha si no irai manörö salua andrö. Te tola lafatunö khöu hadia manö zoguna si tohude si lö oya laʼila niha böʼö. Na ötema mbua wangera-ngera simanö, tola öfaudugö wameʼe buala ba niha, tefaudu ba zoguna khönia.

Inötönia. Imane Sura Niʼamoniʼö, ”Fehede si tefaudu, ba ha lö asökhi!” (Gamaedola 15:23, Terjemahan Dunia Baru) Ayati daʼa zangoromaʼö wa tola ebua sibai lua-luania na tafili ginötö wahuhuosada. Simanö göi nifaluada. Simane fehede nifaʼema ba ginötö si tefaudu tola möi fangokafu dödö zamondrongo, simanö göi mbuala nibeʼe ba ginötö si tefaudu, tola iʼasogö waʼomuso dödö sebua khö zanema.

Samösa nawöu sangowalu. Samösa zi lö aratö awai sekola. Sambua ngambatö sodöna-döna enaʼö tumbu khöra nono sawuyu. Ha si maʼifu daʼa moroi ba waʼoya ginötö si tola muʼogunaʼö ba wameʼe buala. So ösa niha sangiröʼö daftar acara si tohude simane daʼö si tola mufalua ba ndröfia. Daʼa zanolo yaʼira ba woʼangeraigö buala sinangea labeʼe na ero inötö si tefaudu.a

Tatu manö, tenga dali inötö si tohude sibai awena öbeʼe mbuala. Faʼomuso dödö börö wamuala tola manö taʼokhögö ero inötö. Hizaʼi, moguna mangelama. Duma-dumania, na so ndra matua samuala ba zi samösa ira alawe ba lö tatu hadia mbörö wa ibeʼe daʼö. Te tola manö ihalö gangetula ira alawe wa buala andrö no tobali tandra wa so waʼedöna ndra matua andrö enaʼö itugu ahatö khönia. Daʼa zangoromaʼö wa moguna muʼangeraigö gohitö dödö zamuala.

Ohitö dödö zamuala. Simane duma-duma megeno, sökhi na muʼangeraigö hadia lö faböʼö dania geluaha ba dödö zanema na so nibeʼe zamuala. Baero daʼö, moguna göi ifareso samösa hadia gohitö dödönia samuala. Ato niha sangumaʼö wa ohitö dödöra ba wamuala andrö no fondrege zi sökhi, so göi zamuala ba ginötö si no mutatugöi ba zi döfi börö me no sinangea ira wamalua yaʼia. So göi danö böʼö zodöna-döna wa lafalua khöra zi sökhi mazui latema zulö moroi ba zi no lafalua.

Hadia zi tola öfalua ba wotatugöi hadia no atulö gohitö dödöu na mamualaʼö? Imane Sura Niʼamoniʼö, ”Fefu hadia ia khömi, ba moroi ba waʼomasi milau.” (1 Korindro 16:14) Na ohitö dödöu ba wamuala andrö börö waʼomasi hegöi foʼameʼegö tödö khö zanema, tola owua-wua dödö zanema mbualamö andrö, ba tola göi so khöu waʼowua-wua dödö sabölö ebua börö waʼoböwö soroi ba dödö. Na mamuala ndraʼugö soroi ba dödö, no öʼomusoiʼö dödö Namada si so ba zorugo. Isuno niha Keriso ba Korindro meföna Faulo börö me so khöra waʼoböwö hegöi me omasi ira wotuhini halöwö wameʼe fanolo khö ndra talifusö si so ba Yudea. Imane Faulo, ”Si no aoha gölö fameʼe, daʼö sa zomasi Lowalangi.”​—2 Korindro 9:7.

Na tabeʼe dödöda ba ngawalö ba zi no mufatunö andrö mege, tola omuso dödö niha ba mbuala nibeʼeda. Börö daʼa hegöi tanö böʼönia zi tobali dani khö Lowalangi wa ibeʼe mbuala fondrege zebua ba niha. Omasiga ba woʼandrö khöu enaʼö önehegö hadia mbuala fondrege zebua na öbaso artikel aefa daʼa.