Haniha Zinangea Tatahigö?

Na tenga börö Lowalangi wa alua wamakao, hana wa oya lofo, faʼanumana, fasuwöta, fökhö hegöi bencana alam? Moloʼö Taromali Lowalangi, Sura Niʼamoniʼö, so tölu mbörö wa tola alua sibai wamakao ba niha:

1. Fakhögusa, Gamaʼuʼu ba Fatiusa. ”Ibaliʼö ia samatörö awönia niha, ba wangalani yaʼia.” (Zangombakha 8:9) Börö walömoʼahonoa, andrö wa so gamuata fakhögusa ba faʼalösökhi irege asese tefakao niha.

2. Inötö hegöi Salua si Lö Mudöna-döna. Asese tefakao niha börö me ”no ha sambua ginötö ba no ha sara zi göna ira fefu”. (Zangombakha 9:11) Eluahania, tola göna ita famakao börö me so ita ba nahia hegöi inötö si lö tefaudu. Tola manö mosikho ita börö nifalua niha böʼö si lö laʼodödögö.

3. Samatörö Ulidanö si Lö Sökhi. Itutunö khöda Sura Niʼamoniʼö hadia zi oföna sibai mbörö wa tefakao niha. Imane, ”Satana zamatörö ulidanö andre.” (1 Yohane 5:19) ”Satana” andrö no boto eheha, ba lafotöi ia Afökha Satana. Ba wamobörö, yaʼia andrö malaʼika sabölö, hizaʼi ”lö niʼagönia zi duhu”. (Yohane 8:44) Ba gafuriata, fao khönia malaʼika tanö böʼö ba wamalua nikhoi dödöra ba mamadaö ira khö Lowalangi. Lafotöi ira malaʼika si lö sökhi. (1 Moze 6:1-5) Iʼotarai daʼö, Satana hegöi malaʼika si lö sökhi si fao khönia zamatörö ngawalö zalua ba gulidanö si fao faʼalösökhi. Sindruhu-ndruhu tarasoi daʼö iadaʼa. Mofönu sibai Gafökha ba ’ifaelungu niha ba gulidanö maʼasagörö’ irege ’faʼalai gulidanö’. (Famaʼeleʼö 12:9, 12) Ifalua zomasi-masi dödönia Satana. Ahono sibai dödönia na iʼila tefakao niha. Ba daʼa taʼila wa börö Zatana wa tefakao niha, tenga Lowalangi.

ANGERAGÖ: No fondrege waʼabodo na so niha si lö sökhi somuso tödö me iʼila tefakao niha si lö fasala. Hizaʼi, imane Sura Niʼamoniʼö, ”Lowalangi andrö no faʼomasi.” (1 Yohane 4:8) Börö daʼö, ”Böi manö tawaʼö, ilau zi lö sökhi Lowalangi ba ifatörö zi lö atulö si lö ambö faʼabölö!”​—Yobi 34:10.

Hizaʼi, te manofu ndraʼugö, ’Ofeta hawaʼara itehegö Lowalangi Fondrege Zabölö khö Zatana ba wamawukaisi ulidanö?’ Simane si no tatutunö, fatuwu khö Lowalangi zi lö sökhi ba abu sibai dödönia wamaigi famakao nitaögöda. Imane Sura Niʼamoniʼö, ”Mitouʼö ba dangania na so zabu dödömi gofu hadia ia, so so sa dödönia ami.” (1 Fetero 5:7) Iʼomasiʼö ita Lowalangi ba so khönia kuaso ba wangohori famakao hegöi falöʼatulö. Mututunö daʼö ba duho aefa daʼa.a