Na Göna Ndraʼugö Fökhö Sabölö-bölö

”Me uʼila wa no gönado fökhö kanker ba paru-paru hegöi ba mbetuʼa, faduhu dödögu wa lö ara tö mate ndraʼo. Hizaʼi, me no awai fahuhuodo khö doto ba mangawulido ba nomo, imane tödögu, ’Tenga daʼa nitötönagu. Hizaʼi, lö salania. Moguna uʼalui lala ba wanaögö salua andre.’”—Linda, 71 fakhe.

”No göna ndraʼo fökhö sabölö-bölö ba molua-lua ia ba saraf si so tanö ba mboʼögu kabera. Samuza inötö, tefakao sibai gera-eragu börö me moʼötö-ötö waʼafökhö. Asese urasoi wa lö hadöi niha soʼameʼegö tödö yaʼo, ba edöna ubunudo.”—Elise, 49 fakhe.

Samösa ndra matua sofökhö lafasui ia niha niʼomasiʼönia

NA ALUA khöu wökhö sabölö-bölö si möi börö waʼamate moloʼö famareso ndra doto, mazui alua ia ba niha niʼomasiʼöu, tatu abu sibai dödöu. Baero daʼö, alio abao dödöu ba niha, mobekhu ndraʼugö khöra, ba aombö dödöu. Larasoi göi zimane daʼö ösi nomou mazui niha sondrorogö yaʼugö. Monönö nasa waʼataʼumö hegöi faʼaombö-aombö dödöu na abua khöu wangalui dalu-dalu, na lö ohahau dödöu ba dalu-dalu si no labeʼe mazui ba wamuʼa mböli dalu-dalu. Tola manö kafutö ndraʼugö ba wombaloi inötö si no ifabuʼu doto ba wamareso yaʼugö. Hewaʼae simanö, tola ölawa fefu nirasoimö andrö.

Hezo tola tasöndra wanolo? Ato zangumaʼö wa tola lasöndra wondrara dödö sebua me laʼondrasi Lowalangi ba wangandrö ba labaso Zura Niʼamoniʼö. Fanolo tanö böʼö lasöndra moroi ba waʼomasi hegöi famarou dödö nibeʼe nösi nomora awö zi fahuwu khöra.

FANUTURU LALA SI TOLA ÖʼOʼÖ

Imane Robert si 58 fakhe, ”Na mamati ndraʼugö khö Lowalangi, ibeʼe khöu wanolo ba wanaögö fökhö si göna khöu. Angandrö khö Yehowa. Tutunö khönia hadia nirasoimö. Andrö geheha niʼamoniʼö ba wanolo yaʼugö enaʼö öʼokhögö wangera-ngera satulö, enaʼö sagu ba nösi nomou ba wanaögö salua andre, ba lö abu sibai dödöu.

”No sambua fanolo sebua na lö mamalö labeʼe ginötörö khöu ira ösi nomou. So mato samösa mazui darua zotelefo yaʼo ero maʼökhö ba lasofu duriagu. Usöndra göi wamarou dödö moroi khö ndra awö-awögu ba nahia si faböʼö-böʼö. Ahono dödögu labeʼe ba latolo ndraʼo faböi awuwu.”

Na möiʼö wamaigi awöu sofökhö, töngöni hadia niwaʼö Linda andre, ”Sasesenia, omasi niha sofökhö wodunö-dunö lala waʼauri sero maʼökhö, ba tola manö lö omasi ia wanutunö fökhönia. Börö daʼö, dönisi ia fahuhuo sanandrösa ba zi toʼölö mitutunö.”

Börö waʼabölö moroi khö Lowalangi, fondrara dödö moroi ba Mbuku Niʼamoniʼö, fanolo safönu faʼomasi moroi ba nösi nomoda hegöi si fahuwu khöda, tola faduhu dödöda wa ebua sibai mböli waʼauri andre hewaʼae göna ita fökhö sabölö-bölö.

Ayati Zura Niʼamoniʼö Sanolo Yaʼugö

Odaligö Lowalangi.

”Hameʼuga uʼalui Yehowa, ba ifondrondrongo khögu, ba no iʼefaʼö ndraʼo ba waʼatosasagu fefu. No muʼao zi numana andre, ba no irongo Yehowa.”—Zinunö 34:5, 7.

Imane Linda si no mututunö ba wamobörö, ”Lö irai umane ba wangandrö, ’Fadöhö ndraʼodo.’ Hizaʼi umane, ’Tolo ndraʼo enaʼö abölödo ba wanaögö fökhögu andre.’”

Baso Daromali Lowalangi enaʼö ösöndra waʼabölö.

”Samösa lö ba mbanua sangumaʼö: No gönado safökhö khögu.”—Yesaya 33:24.

Angerönusi mbuʼusa li Lowalangi ba zi so miföna enaʼö ösöndra dötönafö sangabölöʼö yaʼugö ba wanaögö hadia ia.

Andrö wanolo moroi ba nösi nomou hegöi ba zi fahuwu khöu.

”Sindruhu si fahuwu, ba no fadoro iʼomasiʼö nawönia; ba ba wamakao, ba tumbu ia si fatalifusö.”—Gamaedola 17:17.

Imane Elise si no mututunö ba wamobörö, ”Böi oniagö ndraʼugö. Tola manö dania örasoi wa lö soʼameʼegö tödö yaʼugö irege tumbu ba dödöu wa lö ifondrondrongo gangandröwau Lowalangi. Börö daʼö, böi oniagö ndraʼugö, temaʼö wanolo moroi khö ndra awöu.”