Tafahaʼö Ita Moroi khö Ndra Talifusöda si no Toʼölö ba Wanuriaigö

Omasi sibai ita khö ndra talifusöda si no toʼölö ba wanuriaigö. Ato ndra talifusöda si no ara mamosumange Yehowa. So ösa ndra talifusöda satua-tua ba wanuriaigö börö melaʼameʼegö tödö wanuturu lala si no tehenaigö ba mbukuda barö-barö daʼa. No ibeʼe Yesu wanuturu lala ba ginötö safuria andre enaʼö tola teturiaigö ba niha fefu duria somuso dödö ba tola lafahaʼö ira. (Mataiʼo 28:19, 20) Ba ginötö möi ira manuriaigö, no latema wa ”fahöna waʼabölö” megöna ira fanandraigö. (II Korindro 4:7) Oya zi tola tahalö famahaʼö khöda moroi khö ndra talifusöda si no toʼölö ba wanuriaigö. Na so ginötö, omasi ira lafahaö ndra talifusöda tanö böö. (Zinunö 71:18) Tola tahalö khöda ginötö ba wamahaʼö yaʼita moroi khö ndra talifusöda andre. Hewisa enaʼö tola tafalua?

Ba Wanuriaigö. Enaʼö onekhe wehede ba wanuriaigö, ira talifusöda sawena möi manuriaigö mazui sambö-ambö moguna lafahaʼö ira. Oya zi tola lafalua ba wanuriaigö enaʼö atua-tua ira, yaʼia daʼö enaö lahaogö la töngöni hewisa ndra talifusöda si no toölö ba wamalua fanuriaigö. (Faigi ba Menara Pengawal 15 mbaŵa si dua, 2015, ”Teruslah Bersemangat dalam Dinas,” ba ngenoli tölu tuhonia ”Bantulah penyiar Baru.”) Hadia gunania khöu me no fao ndraʼugö manuriaigö khö ndra talifusöda si no toʼölö ba wanuriaigö?

Hadia tola fao ndraʼugö khö dalifusöda sowölö-ölö ba wanuriaigö? Na taʼila talifusöda andre si no toʼölö ba wanuriaigö no tebai mazui mofökhö, tola öʼohe niha nifahaʼömö ba nomonia enaʼö fao ami wameʼe famomaha. Na no aefa, andrö mbua wangera-ngera dalifusöda andre hadia zinangea öfalua enaʼö tedou ndraʼugö.

Oyaʼö Ginötöu Fariawö: Taʼoyaʼö ginötöda we fao khö ndra talifusöda si no toʼölö ba wanuriaigö enaʼö abölö aboto ba dödöda hewisa ira. Tola tawaʼö khöra enaʼö fao ira khöda ba mbongi wamahaʼö ba nomo ba tola manofu-nofu ita khöra. Na no atua ndra talifusöda andre mazui mofökhö, hadia tola öfalua mbongi wamahaʼö ba nomonia? Sofu khönia hewisa mböröta wa tola iʼila zi ndruhu. Hadia howu-howu nitemania? Hadia waʼatedou niʼilania ba mbanua niha keriso? Hadia waʼomuso dödö si no itema ba wamosumange Yehowa?

Moguna aboto ba dödöda wa ira talifusöda si no toʼölö ba wanuriaigö andre so zoʼamböta. Simane yaʼita hegöi ira talifusöda si no toʼölö andrö oi faböʼö-böʼö wa atua-tua. (Roma 12:6-8) So ndra talifusöda si no alawa döfi mazui sofökhö, tola manö lö oya ginötö niʼogunaʼöra ba wanuriaigö hegöi ba wariawösa khö ndra talifusöda tanö böʼö. Hewaʼae simane daʼö tola tahalö wamahaʼö khöda börö me lö si faröi ira ba wamosumange Yehowa.