Enaʼö Onekhe Ita ba Wanuriaigö—Tafahaʼö Zawena Möi Manuriaigö

Hana Wamoguna: Talifusöda sawena möi manuriaigö moguna lafalua ”fefu hadia ia” niwaʼö Yesu ba lafahaʼö niha ba zi duhu. (Mataiʼo 28:19, 20) Ato niha sawena mangai angetula ba fao ira ba Sekola Famomaha ba Wanuriaigö. Tatu manö no ladunö-dunö Daromali Lowalangi khö zoroi yomora hegöi khö nawöra. Na lö aetu-aetu lafahaʼö ira ba Zura Niʼamoniʼö, itugu monönö waʼatua-tuara sanandrösa khö Yehowa. Aboto ba dödöra waʼomasi Yehowa enaʼö teʼorifi fefu niha, andrö wa lahalö gangetula weʼamöi manuriaigö. (Roma 10:13, 14) Me no latehegö ira tobali sanuriaigö si lö mubayagö idanö, famahaʼö si lö aetu-aetu daʼö zanolo yaʼira enaʼö lö ataʼu ira ba wanuriaigö.—Luka 6:40.

Lala Wamalua:

Tolo ndra talifusöda sawena möi manuriaigö hadia manö mbuku sinangea laʼohe. Oromaʼö khönia hadia manö mbuku niʼohemö ba hadia gunania.
Fatua lö möi manuriaigö, fili duma-duma wamadumaisi si so ba zura Halöwöda khö Lowalangi ba beʼe wamadumaisi. Farou dödö dalifusöda andre enaʼö iʼogunaʼö wehedenia samösa ba ginötö möi manuriaigö. Faigi wanuturu lala ba mbuku Sekolah Pelayanan Teokratis ba ngaʼörö 82. Abakhaiʼö wangumaʼö enaʼö moguna wonukha si sökhi ba soadu.—II Korindro 6:3, 4.
Böi adage-dage wameʼe famahaʼö khönia. Ombakhaʼö khönia hezo mbanua si no latatugöi weʼamöi manuriaigö, fahaʼö ia wanura töi ba tuho si no irai tafatunö ba niha. Fatunö khönia hewisa wanura si sökhi enaʼö tola iʼosisiʼö hadia nisurania. Fahaʼö ia wangogunaʼö buku Kabar Baik bagi Orang-orang dari Segala Bangsa hegöi ba wangogunaʼö jw.org na möi manuriaigö. Tolo ia enaʼö tefarou dödönia.—I Korindro 3:6.
Moguna waʼebolo dödö ba suno ia enaʼö terou dödönia. (Gamaedola 25:11) Beʼe duma-duma si sökhi. Na owölö-ölö ndraʼugö ba wanuriaigö ba öbeʼe duma-duma si sökhi, tola tefarou dödönia ba zi so föna.

Tandraigö Öfalua Daʼa Barö Mbaŵa Andre:

Faogö ndraʼugö ba niha nifahaʼöu sawena möi manuriaigö, ohe ia ba niha nifahaʼöu tanö böʼö hegöi ba niha si no irai falukha khöu. Na lö hadöi niha nifahaʼöu si tobali sanuriaigö, tola fao ndraʼugö khö ndra talifusöda böʼö sawena manuriaigö mazui khö ndra talifusöda si no ambö-ambö ba wanuriaigö.