Taʼogunaʼö Mbuku Turia Somuso Dödö ba Wamahaʼö
1. Hadia mbörö wa lafazökhi buku Turia Somuso Dödö?
1 Ba Halöwöda Khö Lowalangi me baŵa si fitu si lalö, no tatutunö fakake si tola taʼogunaʼö ba wamahaʼö niha, yaʼia daʼö buku Turia Somuso Dödö Moroi Khö Lowalangi! Lö lasura nösi ayati Zura Niʼamoniʼö ba mbuku andre enaʼö labaso samösa ba Zura Niʼamoniʼö. Oya mbuku tanö böʼö si no lahenaigö si tola labaso samösa. Hizaʼi, buku daʼa lafaʼanö ia enaʼö laʼogunaʼö ba wamahaʼö niha ba Zura Niʼamoniʼö. Börö daʼö, na öbeʼe mbuku daʼa ba niha, tandraigö öfalua hewisa lala ba wangogunaʼö yaʼia enaʼö adöni dödöra ba Zura Niʼamoniʼö.—Mataiʼo 13:44.
2. Hewisa lala wangogunaʼö buku Turia Somuso Dödö na awena falukha ita ba niha?
2 Na Awena Falukha: Tola ömane wangumaʼö: ”Wa möiga ba daʼa börö me oya gabula dödö salua ba gulidanö andre. Moloʼö yaʼugö, hadia tola sökhi gulidanö andre ba zi so miföna? [Fondro-ndrongo wanema linia.] Tola tasöndra wanema li moroi ba Zura Niʼamoniʼö. Ba mbuku andre so wanofu-nofu si tola taʼila wanema linia ba Zura Niʼamoniʼö.” Beʼe mbuku ba zokhö omo, aefa daʼö oromaʼö khönia wanofu-nofu ba ngaʼörö mbuku tanö furi enaʼö ifili. Ogunaʼö duho si no ifili ba tutunö khönia ngenoli siʼoföna moroi ba zi no ifili andrö. Lala tanö böʼö si tola taʼogunaʼö yaʼia daʼö tabeʼe khönia wanofu sadöni dödö si no tehenaigö ba mbuku andrö ba tabeʼe wanema li moroi ba Zura Niʼamoniʼö. Na so ba jw.org video soʼamakhaita ba duho nifatunöda, tola öforomaʼö khöra video andrö.
3. Tutunö lala wamalua famahaʼö ba wangogunaʼö buku Turia Somuso Dödö.
3 Lala Wamalua Famahaʼö: (1) Baso wanofu si no muhenaigö ba wanolo niha nifahaʼöda enaʼö lö mangoloi dödönia ba duho nifatunö. (2) Aefa daʼö baso ngenoli si no tesura. (3) Baso ayati si no mufanaere fanura ba beʼe wanofu si no tehenaigö, enaʼö tola iʼila wanemali moroi ba Zura Niʼamoniʼö. (4) Na so ngenoli ganetenia nasa, tola öfuli öfalua simane ba numero 2 ba 3. Na so video soʼamakhaita ba wanofu andrö, tola öforomaʼö khönia. (5) Andrö mbua wangera-ngera zokhö omo hadia wanema linia moroi ba zinofu si no muhenaigö andrö, enaʼö taʼila hadia aboto ba dödönia wamahaʼö andrö.
4. Hadia zi tola manolo yaʼita enaʼö atua-tua ba wangogunaʼö buku andre?
4 Moguna öʼila nösi mbuku andrö. Ogunaʼö mbuku daʼa ero so ginötö si tefaudu. Fatua lö öbörögö khönia wamahaʼö, angeraigö ua sakali niha nifahaʼöu ba hadia lala si tola öfalua. Enaʼö aboto ba dödönia zi no öfahaʼö andrö, ogunaʼö Zura Niʼamoniʼö ero na öfahaʼö ia. (Gamaedola 15:28; Halöwö Zinenge 17:2, 3) Na asese öʼogunaʼö mbuku daʼa, itugu atua-tua ndraʼugö ba ösöndra waʼomuso dödö ba wangogunaʼö buku daʼa ba wamahaʼö niha!