Enaʼö Onekhe Ita ba Wanuriaigö—Ba Wameʼe Buku Alkitab Ajarkan

Hana wa Moguna: Si oföna taʼogunaʼö ba wamahaʼö niha yaʼia daʼö buku Alkitab Ajarkan. Hizaʼi, fatua lö taʼogunaʼö mbuku andrö ba wamahaʼö niha, moguna taʼofönaiʼö wameʼe buku daʼa khöra. Börö daʼö, moguna onekhe ita ba wameʼe buku andre ba niha na möi manuriaigö. (Gamd. 22:29) Oya lala nifaluada ba wameʼe buku daʼa enaʼö adöni dödöra.

Lala Wamalua:

Beʼe wanofu si tefaudu sondrönisi tödöra ba nösi mbuku andrö. Tola göi öʼogunaʼö wanofu si so ba wamobörö faza. Na no öʼila nösi dödönia, baso ayati si tefaudu ba foromaʼö ngenoli moroi ba wanofu nibeʼeda, ba na so ginötö adogoiʼö wamatunö khönia.
Lala tanö böʼö yaʼia daʼö, ogunaʼö gambara si so ba ngaʼörö tanö föna ba wondrönisi tödönia, ba ombakhaʼö khönia hezo gamaudu ba mbuku andrö zi tola manema li fanofu-nofunia. Duma-dumania, tutunö khönia hadia duria sawena alua barö daʼa, ba ombakhaʼö khönia wa ato niha somasi manöndra fanema li moroi ba wanofu-nofu si so ba ngaʼörö si 3. Mazui tola öwaʼö, omasi ndraʼo falukha khömi ba wangandrö bua wangera-ngerami sanandrösa ba waʼauri andre ba zi so föna. Oromaʼö gambara si so ba ngaʼörö si 4-5 ba beʼe khönia wanofu, ”Moroi ba gambara andre, hezo nidöna-dönau enaʼö alua ba zi so föna?” Tola göi öwaʼö, omasiga maʼandrö ginötömi sabata ba wangalui fanema li moroi ba wanofu-nofu sanandrösa ba waʼauri andre. Aefa daʼö, ombakhaʼö khönia wanofu si so ba ngaʼörö si 6, ba sofu khönia hadia wanofu sadöni dödönia.
Tola öbörögö wamahaʼö na awena falukha ami. Tola ömane wangumaʼö, ”Omasiga maforomaʼö sambua buku sanolo yaʼita ba wamamaha ba Zura Niʼamoniʼö. Hadia no irai öʼila mbuku daʼa? [Fondro-ndrongo wanema linia.] Na so ginötöu sabata, omasido uʼombakhaʼö hewisa lala wangogunaʼö buku daʼa si teʼodane-dane ba mbuku Niʼamoniʼö si so khöu.”

Tandraigö Öfalua Daʼa ba zi Sara Waŵa Andre:

Tola öfahaʼö ndraʼugö ba mbongi wamahaʼö ba nomo.
Na möiʼö manuriaigö, tutunö khö nawöu sanuriaigö hadia zinangea öfaʼema ba niha. (Gamd. 27:17) Na lö adöni dödö niha ba duho nifaʼemau, alui duho tanö böʼö.