Hadia Ohahau Dödöda ba zi So Miföna Na Alawa Sekolada ba Ebua Gefeda?

Moloʼö niha sato, na alawa sekola zi samösa niha tola tobali ia samösa sohalöwö, ösi nomo, ba ono mbanua sabölö sökhi. Daʼö göi zanolo yaʼia ba wanöndra halöwö sebua gazi irege kayo ia ba gafuriata. Lamane tödöra wa daʼö fefu zameʼe faʼohahau dödö ba zi samösa niha ba sökhi waʼaurinia ba zi so miföna.

NIFILI NIHA SATO

Nehegö hadia niwaʼö Zhang Chen, moroi ba Cina. Imane, ”Numana nösi nomogu. Ba zilalö, umane tödögu wa awena omuso dödögu ba sökhi waʼaurigu na ebua gefegu. Uwaʼö göi tödögu enaʼö uʼokhögö gefe sebua, moguna usöndra gelar moroi ba universitas.”

Enaʼö laʼokhögö waʼauri si sökhi ba zi so miföna, ato niha si möi kuliah ba universitas si tehöngö ba soi böʼö. Fatua lö alua pandemi COVID-19, itugu ato niha si möi kuliah ba soi böʼö. Me döfi 2012, itutunö Organisasi Kerja Sama dan Pembangunan Ekonomi wa so ”52 persen ndraono sekola si so ba soi böʼö si otarai Asia”.

Ato zatua, labunu-bunu ira wangalui kefe enaʼö tola kuliah ndraonora ba soi böʼö. Imane Qixiang, moroi ba Taiwan, ”Tenga niha si kayo nösi nomogu. Hizaʼi, omasi ndra satuagu enaʼö kuliah fefu ndraonora si daʼöfa ba Amerika Serikat.” Lua-luania, fafali foʼömö zatua Qixiang ba wolohi sekola ndraonora. Alua göi zimane daʼö khö ndra satua tanö böʼö.

HADIA MOFOZU NIFALUARA ANDRÖ?

Samösa ndra alawe serege tödö ba alangu dödönia föna komputer ba zi bongi. — Ato niha si fawuka fangera-ngera börö wolohi sekola salawa hegöi faʼakayo

Sindruhu sa, so gunania sekola. Hizaʼi, tenga daʼö zotatugöi wa ohahau dödö zi samösa niha ba waʼaurinia. Duma-dumania, me no hauga fakhe labunu-bunu ira wangalui kefe ba fafali foʼömö ira börö kuliah, ato niha si lö manöndra halöwö simane nitötönara. Imane koran Business Times, moroi ba Singapura, ”Itugu ato niha si tama moroi ba universitas si lö manöndra halöwö.” Imane Jianjie, sangokhögö gelar doktor si toröi ba Taiwan, ”Ato niha sanöndra halöwö si lö moʼamakhaita ba jurusan me kuliah ira mböröta.”

Hewisa niha sanöndra halöwö soʼamakhaita ba jurusan me kuliah ira mböröta? Lö lasöndra waʼauri si sökhi simane nitötönara. Nehegö zi no irai alua khö Niran, moroi ba Thailand. Me no tama ia moroi ba universitas si so ba Eropa, isöndra halöwö soʼamakhaita ba jurusan me kuliah ia mböröta. Imane, ”Sindruhu sa, me no usöndra gelar tola latema ndraʼo ba halöwö sebua gazi. Hizaʼi, ahori ginötö hegöi faʼabölögu ba wamalua halöwö daʼö. Ba gafuriata, ato niha niheta moroi ba halöwö andrö, ba farahu ndraʼo ba daʼö. Awena aboto ba dödögu wa lö hadöi halöwö si tola mangaʼasogö faʼohahau dödö ba waʼaurida ba zi so miföna.”

Hewaʼae kayo ira ba gafuriata ba hulö ohahau dödöra ba wamaigida, hizaʼi alua gabula dödö ba nösi nomora, göna ira fökhö, ba lö manö taya waʼaombö dödöra ba gefe. Imane Katsutoshi, moroi ba Jepang, ”No ebua gefegu. Hizaʼi, lö taya waʼabu dödögu börö me ato niha safökhö tödö khögu ba lafalua khögu zi lö sökhi. Imane si samösa ira alawe sotöi Lam moroi ba Vietnam, ”Ato niha samorege ba wanöndra halöwö si sökhi börö me so ba wangera-ngerara wa daʼö zangaʼasogö faʼohahau dödö ba waʼaurira. Hizaʼi sindruhunia, itugu aombö dödöra, oya manö wökhöra, ba fawuka wangera-ngera.”

HANA WA LÖ OHAHAU DÖDÖDA HEWAʼAE NO ALAWA SEKOLADA BA EBUA GEFEDA?

Sindruhu sa, moguna khöda sekola hegöi kefe ba wangaʼasogö soguna khöda samösa hegöi ösi nomoda. Hizaʼi, tenga daʼö zameʼe faʼohahau dödö ba waʼaurida ba zi so miföna. Hadia mbörö? Nehegö hadia niwaʼö Mbuku Niʼamoniʼö.

TENGA SEKOLA SALAWA ZAMEʼE KHÖDA FAʼOHAHAU DÖDÖ.

”Tenga ha ba niha sabölö fagohi waʼamöna, . . . satua-tua ba itaria lö isöndra gönia, sonekhe ba lö kayo manö, ba sangokhögö faʼaboto ba dödö itaria lö mofozu, börö me göna ira inötö hegöi salua si lö mudöna-döna.”—SANGOMBAKHA 9:11.

Niha si tola mofozu ba wamaigida, sasesenia lö isöndra gönia. Hadia mbörö? Börö me so ngawalö zalua si tebai itimbagö, simane faʼabasaki ba wangalui soguna, faʼafawuka politik, ba fanahö-nahö dödö ba ngawalö soi. Börö daʼö, gofu hadia gelar nisöndra zi samösa niha tenga daʼö zangaʼasogö faʼohahau dödö ba waʼaurinia.

FAʼAKAYO TOLA TAYA BA ZI SABATA.

”Böi eregesi dödöu ba wolohi faʼakayo. Böhöli ba falua si fao faʼaboto ba dödö. Awena sibai öʼila ia ba no taya, faʼakayomö andrö ibologö gafinia hulö moyo ba muhombo ia ba dalu mbanua.”—AMAEDOLA 23:4, 5.

Tenga si ogötöʼö waʼahono dödö niʼasogö gefe. Na alua krisis ekonomi, fefu gefe niʼiröʼöda izumaigö lö bölinia. Baero daʼö, na alua bencana simane duru danö, faʼakhozi, hegöi angi sabölö-bölö tola manö numana niha si kayo ba lö saʼae omonia.

ASESE TOBALI FANGABU DÖDÖDA GEFE.

”Lö iʼila mörö niha si kayo börö waʼoya haratonia.”—SANGOMBAKHA 5:12.

Franklin, si toröi ba Hong Kong, irasoi samösa wa atulö ngawua wehede si sökhi andrö. No itörö sekola salawa ba no so ia ba halöwö sebua gazi. No göi irai lafataro ia tobali manajer. Imane, ”Börö me fawuka wangera-ngeragu, ibörögö mofökhö-fökhö ndraʼo. Lö uʼila mörö börö waʼaombö dödögu.” Ba gafuriata, tebai saʼae itaha. Imane, ”Ibörögö manofu-nofu ndraʼo, hadia manö guna wa ufalua daʼa fefu. Itugu uʼera-era göi hadia sindruhunia lua-lua waʼaurigu.”

”Böi eregesi dödöu ba wolohi faʼakayo.”—AMAEDOLA 23:4

Simane Franklin, ato niha saboto ba dödö ba gafuriata wa so zabölö sökhi moroi ba wolohi sekola salawa hegöi faʼakayo. Lua-luania, so zi faduhu tödö wa itugu ohahau dödöra na lafalua zi sökhi ba niha böʼö. Hizaʼi, hadia sindruhu daʼö zameʼe khöra faʼohahau dödö ba zi so miföna? Fanema linia so ba artikel aefa daʼa.