1921—Otu Fakhe Silalö

NO IRAI ibeʼe wanofu daʼa majalah Watch Tower 1 Mbaŵa si Sara 1921 khö Ndraono Sekola Zura Niʼamoniʼö sowölö-ölö: ”Hadia halöwö nifaluada ba ndröfi daʼa?” Ibeʼe wanema li moroi ba Yesaya 61:1, 2, samasugi ba dödöra halöwöra ba wanuriaigö. Imane ayati daʼö, ”Yehowa zamataro yaʼo ba wanuriaigö turia somuso dödö ba niha sangide-ngideʼö . . . , ba wangombakha döfi waʼasökhi dödö Yehowa hegöi baŵa wolau balö khö Lowalangida.”

IRA SANURIAIGÖ SI LÖ FAʼATAʼU

Enaʼö tola lafalua halöwöra, moguna barani Ndraono Sekola Zura Niʼamoniʼö. Hadia mbörö? Börö me moguna laturiaigö ’duria somuso dödö’ ba niha sangide-ngideʼö, ba laʼombakhaʼö ’mbaŵa wolau balö’ moroi khö Yehowa ba niha si lö sökhi.

Talifusöda J. H. Hoskin si toröi ba Kanada, lö khönia faʼataʼu weʼamöi manuriaigö hewaʼae na göna ia folohi. Me musim semi 1921, falukha ia khö zi samösa pendeta Metodis. Imane talifusöda Hoskin ba wamörögö fahuhuosa, ”Tola fahuhuo ita sanandrösa ba Zura Niʼamoniʼö. Hewaʼae na oya zi faböʼö mbua gera-erada, tatu tola tahaogö tafatunöisi.” Hizaʼi, tenga daʼö zalua. Imane talifusöda Hoskin, ”Awena hauga menit naʼi fahuhuoga, ba no mofönu sibai saʼae [wandrita andrö]. Abölö-bölö wolobigönia bawandruhö, irege uwalinga aboto saʼae zörömi si so ba mbawandruhö.”

Muʼao wandrita andrö, ”Abölö sökhi na möiʼö ba niha baero!” Lö hede-hede dalifusöda Hoskin. Hizaʼi, me mofanö ia moroi ba nomo daʼö, imane tödönia, ’Amuatania manö amuata niha baero!’

Mahemolunia, ifaʼema huhuo sebua fandrita andrö ba gerejania, ba iʼobousi dalifusöda Hoskin. Imane talifusöda Hoskin, ”Iʼombakhaʼö fandrita andrö khö ndra anggotania ba gereja wa yaʼodo andre niha si falimo fondrege zi lö sökhi ba mbanua daʼö, ba lö tola löʼö lafana ndraʼo irege mate.” Hewaʼae simanö, lö awuwu dalifusöda Hoskin. Lö iböhöli wanuriaigö ba ato niha nifalukhaisinia. Imane, ”Omuso sibai dödögu weʼamöi manuriaigö ba mbanua daʼö. So ösa niha sangumaʼö khögu, ’Uʼila wa yaʼugö andrö enoni Lowalangi!’ ba lasofu göi khögu hadia tola labeʼe ösa zoguna khögu.”

FAMAHAʼÖ SAMÖSA HEGÖI SI SAMBUA OMO

Latolo niha sadöni tödö ba zindruhu Iraono Sekola Zura Niʼamoniʼö enaʼö tola tedou ira ba wamati. Lafaʼanö waö-waö wamahaʼö Zura Niʼamoniʼö ba majalah The Golden Age.a Ba zi sambua waö-waö wamahaʼö andrö, so wanofu-nofu si teʼodane-dane ba Zura Niʼamoniʼö si tola latutunö ira satua khö ndraonora. Ira satua dania ”zameʼe fanofu khö ndraonora ba latolo ira wangalui fanema li moroi ba Zura Niʼamoniʼö”. So ösa wanofu-nofu saoha sanandrösa ba Zura Niʼamoniʼö. Duma-dumania, ”Hauga ngawua mbuku si so ba Zura Niʼamoniʼö?” So göi wanofu sabölö abakha. Duma-dumania, ”Hadia hasambalö göna famakao fefu niha Keriso?” Fanofu simane daʼö zanolo iraono si bohou ebua enaʼö barani ira wanuriaigö turia somuso dödö.

So göi waö-waö wamahaʼö ba niha si no mangokhögö faʼaboto ba dödö sanandrösa ba Zura Niʼamoniʼö. Labeʼe khöra wanofu-nofu ba tola laʼalui wanema linia ba Studies in the Scriptures faosatö si oföna. So mato hauga ribu niha sanema bua si sökhi moroi ba waö-waö wamahaʼö Zura Niʼamoniʼö andrö. Hizaʼi, iʼombakhaʼö majalah The Golden Age edisi 21 Mbaŵa si Felendrua 1921 wa muböhöli wangehaogö waö-waö wamahaʼö si dombua andrö. Hadia mbörö?

BUKU SI BOHOU!

Buku *The Harp of God*

Kartu sanutunö hezo faosatö sinangea mubaso

Kartu si so fanofu

Aboto ba dödö ndra talifusöda sondröniaʼö ba organisasi Yehowa wa moguna toföfö wamahaʼö niha ba Zura Niʼamoniʼö ba lö tebulö wamalua yaʼia. Börö daʼö, lahaogö mbuku The Harp of God me baŵa si Felezara 1921. Tola laʼogunaʼö mbuku daʼö ira niha sadöni tödö ba wamahaʼö yaʼira samösa ba Zura Niʼamoniʼö. Waö-waö wamahaʼö andrö zanolo yaʼira enaʼö ”aboto ba dödöra gohitö dödö Lowalangi ba wameʼe faʼauri si lö aetu ba niha gulidanö”. Hewisa wamalua famahaʼö andrö?

Ba ginötö itema mbuku daʼö si samösa niha, itema göi sambua kartu side-ide sanutunö khönia hezo faosatö sinangea ibaso. Samigu aefa daʼö, itema kartu tanö böʼö, ba no mufaʼanö ba daʼö wanofu-nofu sanandrösa ba wamahaʼö si no ibaso. Kartu daʼö göi zangoromaʼö khönia hezo faosatö sinangea ibaso, nitutunö dania samigu aefa daʼö.

Sagötö ifahaʼö ia si samösa niha ba Zura Niʼamoniʼö mato 12 migu waʼara, itema dania ero migu sambua kartu nifaʼoheʼö moroi ba mbanua niha Keriso si so ba mbanuania. Si toʼölönia, lafaʼoheʼö fefu kartu daʼö ira talifusöda si tebai manuriaigö ba nomo-omo misa börö me no alawa ndröfira mazui no göna ira fökhö. Imane Anna K. Gardner moroi ba Millvale, Pennsylvania, AS, ”Me muhaogö mbuku The Harp of God, tola fao gaʼagu alawe sotöi Thayle ba wamaʼoheʼö fefu kartu daʼö ero migu hewaʼae na cacat ia.” Na no iʼasiwai waö-waö wamahaʼö Zura Niʼamoniʼö andrö si samösa niha, so samösa dania moroi ba mbanua niha Keriso zamalukhaisi yaʼia. Daʼa zanolo yaʼia enaʼö itugu oya waʼaboto ba dödö niʼokhögönia sanandrösa ba Zura Niʼamoniʼö.

HALÖWÖ SI NO TOBARA-BARA FÖNADA

Ba gangohorita ndröfi daʼö, ifaʼoheʼö sambua zura talifusöda J. F. Rutherford ba mbanua niha Keriso fefu. Imane, ”Ba ndröfi daʼa, no ebolo wamazaewe turia somuso dödö sanandrösa ba Wamatörö Lowalangi, ba itugu ato niha nifahaʼö ba Zura Niʼamoniʼö moroi ba zi hauga fakhe silalö.” Aefa daʼö, imane khöra, ”Oya nasa halöwö sinangea tafalua. Mifarou dödö niha böʼö enaʼö fao ira ba halöwö sahöli-höli dödö andre.” Laforomaʼö Iraono Sekola Zura Niʼamoniʼö wa laʼoʼö wanuturu lala andrö. Me döfi 1922, owölö-ölö sibai ira weʼamöi manuriaigö ba lö khöra faʼataʼu.

Si Fahuwu si Lö Faʼataʼu

No laforomaʼö waʼomasi Iraono Sekola Zura Niʼamoniʼö me faoma latolo nawöra zamösana. Yaʼira andrö si fahuwu si lö faʼataʼu si ”tobali talifusö . . . ba ginötö waʼatosasa”. (Amd. 17:17) Datanehegö zalua andrö.

Me luo Salasa, 31 mbaŵa si Lima 1921, so waʼafawuka ba mbanua Tulsa, Oklahoma, AS. No mubeʼe ba gurunga samösa ndra matua saitö uli börö me no lafobahulu ia wamakao ira alawe safusi uli. Me alua waʼafawuka andrö, töra 1.000 ndra matua safusi uli sanuwö ngawawa ndra matua saitö uli si lö atoto. Alio sibai irugi mbanua Greenwood faʼafawuka andrö börö me ato niha saitö uli ba daʼö. Töra 1.400 nomo hegöi toko nirabu ba nitunu. Moloʼö angombakhata, so 36 niha si no mate. Hizaʼi, na muhaogö muʼerai, tola manö töra 300 zi mate. Ba gafuriata, mufotöi waʼafawuka andrö Fangohori Mado Tulsa.

Itutunö hadia zalua talifusöda Richard J. Hill, samösa Ono Zekola Zura Niʼamoniʼö saitö uli si toröi ba Greenwood, ”No mabörögö gangowuloa me alua waʼafawuka andrö bongi daʼö. Me no awai gangowuloa, marongo li wana ba kota. Alua daʼö irugi talu mbongi.” Me luo Rabu sihulö wongi, 1 mbaŵa si Önö, itugu abölö-bölö waʼafawuka. Imane talifusöda Hill, ”So ösa zangumaʼö khöma wa abölö sökhi möiga ba Nahia Gangowuloa Sebua enaʼö telumöʼö waʼaurima.” Börö daʼö, möi ba Nahia Gangowuloa Sebua dalifusöda Hill, foʼomonia, ba iraononia si dalima. So mato 3.000 ndra matua hegöi ira alawe saitö uli ba daʼö, ba so ndra saradadu nifatenge ba wozago yaʼira enaʼö tebato waʼafawuka andrö.

Me luo daʼö, lö ataʼu dalifusöda safusi uli sotöi Arthur Claus. Imane, ”Me urongo wa no larabu ba latunu fefu nomo ba Greenwood, uhalö gangetula ba wangalui si fahuwu khögu yaʼia daʼö talifusögu Hill.”

So 14 ndraono nifahaʼö Arthur Claus ba Zura Niʼamoniʼö, iʼogunaʼö mbuku The Harp of God

Me ofeta ia ba nomo dalifusöda Hill, falukha ia khö zi samösa ira matua safusi uli solohe fana. Yaʼia andrö si faola omo ba si fahuwu khö dalifusöda Hill. Iwalinga niha si fao ba waʼafawuka Arthur andrö. Börö daʼö, ilau muʼao, ”Hana wa möiʼö ba daʼa?”

Itutunö Arthur, ”Na fasala wameʼegu fanema li, hasambalö ifana ndraʼo. Andrö, ufaduhuʼö ba dödönia wa si fahuwu khö dalifusöda Hill göi ndraʼo ba no asese möido ba nomonia.” Buania, mofozu nifalua Arthur hegöi ira matua daʼö ba wolumöʼö omo dalifusöda Hill moroi ba danga zorabu.

Ba gafuriata, irongo Arthur wa ba Nahia Gangowuloa Sebua so dalifusöda Hill awö nösi nomonia. So zangumaʼö khö Arthur wa tebai laröi nahia daʼö ira niha saitö uli na lö iteka zura izin Jenderal Barrett, kumandru ndra saradadu ba daʼö. Itutunö Arthur, ”Abua sibai wamalukhaisi jenderal daʼö. Me ufatunö khönia wa omasido ufaondragö zi sambua ösi nomo moroi ba Nahia Gangowuloa Sebua, isofu khögu, ’Hadia omasiʼö özago nösi nomo andrö ba öbönökhi zoguna khöra?’ Tatu manö omasido, börö me no uʼera-era wamalua daʼö.”

Me no ihalö zura izin andrö Arthur, iʼanemaiʼö möi ia ba Nahia Gangowuloa Sebua. Iforomaʼö zura daʼö khö zi samösa saradadu sangumaʼö, ”Awena sakali daʼa uʼila zura izin niteka Jenderal Barrett! Maʼökhö daʼa, ha yaʼugö zofozu ba wamaondragö niha moroi ba nahia daʼa.” Me no aʼozu falukha Arthur khö dalifusöda Hill awö nösi nomonia, ifasao ira mangawuli ba nomo.

Itatugöi Arthur enaʼö telumöʼö dalifusöda Hill awö nösi nomonia. Ahöli-höli dödö niha me laʼila waʼabarani hegöi faʼomasi niforomaʼö Arthur. Itutunö, ”Lö saʼae manahö-nahö dödö zi faola omo si fao khögu ba wozago omo dalifusöda Hill. Baero daʼö, so ösa zadöni tödö ba wamahaʼö yaʼira ba zindruhu, börö me laʼila wa lö hadöi ba gotalua nono mbanua Lowalangi sangumaʼö wa abölö tohude ira moroi khö nawöra. Anehe göi ira wa lö hadöi aboto wahasara dödöda hewaʼae na faböʼö-böʼö madoda.”

a Ba gafuriata, labulöʼö döi The Golden Age tobali Consolation me döfi 1937, ba tobali Awake! (Faoso!) me döfi 1946.