LALA BA WOLAWA FATIUSA

4 | Andrö Wanolo khö Lowalangi

Famahaʼö Zura Niʼamoniʼö:

”Bua-bua geheha yaʼia daʼö faʼomasi, faʼomuso dödö, faʼohahau dödö, faʼebolo dödö, faʼasökhi dödö, faʼasökhi, famati, falöʼalio mofönu, ba fanaha tödö.”—GALATIA 5:22, 23.

Eluahania:

Tola itolo ndraʼugö Lowalangi ba wolawa fatiusa. Tola iʼogunaʼö gehehania niʼamoniʼö ba wanolo yaʼita ba wangokhögö ngawalö mbua-bua si tebai taʼokhögö na dali waʼabölöda samösa. Börö daʼö, moroi na taʼodaligö waʼabölöda samösa ba wolawa fatiusa, abölö sökhi na taʼodaligö wanolo moroi khö Lowalangi. Na tafalua daʼö, tola tarasoi samösa zalua khö zinenge sotöi Faulo me imane, ”Tola utaögö fefu hadia ia börö waʼabölö nitemagu moroi khö Lowalangi.” (Filifi 4:13) Aefa daʼö, tola tamane wangumaʼö, ”Moroi khö Yehowa iʼotarai fangorifigu.”—Sinunö 121:2.

Si Tola Öfalua:

”No ibulöʼö ndraʼo Yehowa. Niha si lö sökhi ndraʼo mböröta, hizaʼi no tobali ndraʼo iadaʼa niha sangomasiʼö faʼatulö.”—WALDO

Angandrö khö Yehowa soroi ba dödö enaʼö ibeʼe khöu geheha niʼamoniʼö. (Luka 11:13) Andrö khönia wanolo ba wangoromaʼö bua-bua si sökhi ba waʼaurimö. Fahaʼö ndraʼugö ba niwaʼö Zura Niʼamoniʼö sanandrösa ba mbua-bua sanolo yaʼugö ba wolawa fatiusa, simane faʼomasi, faʼohahau dödö, faʼebolo dödö, ba fanaha tödö. Forege wangokhögö amuata daʼö ba waʼaurimö sero maʼökhö. Baero daʼö, lau fariawö ba niha samorege ba wamalua amuata simane daʼö ba waʼaurira. Tola latolo ndraʼugö ’ba wamarou tödöu ba waʼomasi hegöi ba mbua-bua si sökhi’.—Heberaiʼo 10:24.

Si No Irai Alua—WALDO

Mofozu Ia Wamöhöli Fatiusa

Börö me iʼotarai ba waʼide-ide alua waʼalösökhi khö Waldo, tobali ia niha safönu fatiusa. Imane, ”Asese faʼudu ndraʼo ba niha samawa narkoba . . . Samuza inötö, so niha nigazi geng si faʼudu khögu ba wamunu yaʼo. Hizaʼi, tola ulau moloi hewaʼae na fakhamö ifahö ndraʼo sakali.”

Lö omasi Waldo me iʼila woʼomonia ira alawe ifahaʼö ia ba Zura Niʼamoniʼö khö ndra Samaduhuʼö Yehowa. Imane, ”Fatuwu sibai ndraʼo khö ndra Samaduhuʼö Yehowa, ba asese ulau khöra wehede si lö sökhi. Hewaʼae simanö, no lahaogö-haogö manö khögu wehede.”

Ba gafuriata, ibörögö ifahaʼö ia Waldo ba Zura Niʼamoniʼö. Imane, ”Abua sibai khögu wamalua si no ufahaʼö yaʼo. Urasoi wa tebai utaha dödögu wamalua si lö sökhi na mofönu ndraʼo.” Hizaʼi, so sambua wamahaʼö ba Zura Niʼamoniʼö sombulöʼö lala wangera-ngerania.

Itutunö Waldo, ”Samuza inötö, iʼandrö khögu samahaʼö yaʼo ba Zura Niʼamoniʼö, yaʼia daʼö Alejandro, ba wombaso Galatia 5:22, 23. . . . Ifatunö khögu Alejandro wa tola uʼokhögö mbua-bua andrö tenga börö waʼabölögu samösa, hizaʼi börö waʼabölö geheha niʼamoniʼö moroi khö Lowalangi. Faʼaboto ba dödö andrö zombulöʼö lala wangera-ngeragu!”

Börö me iʼodaligö wanolo moroi khö Lowalangi, tola mofozu Waldo ba wamöhöli fatiusa ba waʼaurinia. Imane, ”Ahöli-höli sibai dödö ndra awö-awögu ba zilalö hegöi ösi nomogu me no tebulö lala waʼaurigu.” Imane nasa, ”No ibulöʼö ndraʼo Yehowa. Niha si lö sökhi ndraʼo mböröta, hizaʼi no tobali ndraʼo iadaʼa niha sangomasiʼö faʼatulö.”