3 | Möi Fanolomö Duma-Duma si So ba Zura Niʼamoniʼö

ITUTUNÖ SURA NIʼAMONIʼÖ WA . . . Ira matua hegöi ira alawe si lö faröi ba zilalö ”niha simane yaʼita”.—YAKOBO 5:17.

Hadia Geluahania

Ba Zura Niʼamoniʼö, oya waö-waö sanandrösa ba ndra matua hegöi ira alawe sanaögö abula dödö si faböʼö-böʼö. Na tabaso waö-waö waʼaurira, tola manö tasöndra zi fagölö simane nirasoida.

Bua Nitemada

Omasi ita na laʼameʼegö tödö ita niha, mendrua manö na tataögö waʼafawuka wangera-ngera. Na tabaso waö-waö waʼauri niha ba Zura Niʼamoniʼö, tola manö tasöndra zorasoi simane nirasoida. Buania, aboto ba dödöda wa tenga ha yaʼita zorasoi faʼafawuka wangera-ngera hegöi faʼaombö dödö.

Oya wehede nisura ba Zura Niʼamoniʼö nifaʼema niha sambö faʼabölö hegöi saetu fanötöna. Hadia no irai ömane, ’Lö sagu khögu saʼae’? Daʼö zi no irai iwaʼö Moze, Elia hegöi Dawido.—4 Moze 11:14; 1 Razo 19:4; Sinunö 55:4.
Ifatunö khöda Sura Niʼamoniʼö hadia zalua khö ndra alawe sotöi Khana me irasoi ’waʼabu dödö’ börö me lö hadöi ononia ba iʼoʼaya ia kaeruania.—1 Samueli 1:6, 10.
Itutunö Sura Niʼamoniʼö sanandrösa khö ndra matua sotöi Yobi, ba tola manö fagölö nitaögönia ba zalua khöda. Hewaʼae na niha samati ia, hizaʼi no göi irai irasoi waʼafawuka wangera-ngera sabölö-bölö ba imane, ”Fatuwu khögu waʼaurigu. Omasido mate.”—Yobi 7:16.

Na tafahaʼö ita ba Zura Niʼamoniʼö sanandrösa ba waö-waö waʼauri niha si no mofozu ba wolawa fangera-ngera sambö tefaudu, tola göi tasöndra waʼabölö soguna khöda ba wanaögö abula dödö salua khöda.

Hewisa Zura Niʼamoniʼö Wanolo Kevin

Molua-lua ba Waʼaurigu Wökhö Bipolar

”Me arakhagö 50 fakhe ndröfigu, lafatunö khögu wa no göna ndraʼo fökhö bipolar. Itaria urasoi wa tola utaögö gabula dödö salua khögu andrö. Hizaʼi ba ginötö tanö böʼö, urasoi wa si lö eluaha waʼaurigu.”

Hewisa Zura Niʼamoniʼö Wanolonia Yaʼo

”Adöni dödögu ba zi no irai alua khö Wetero nitutunö ba Zura Niʼamoniʼö. No irai ifalua zala, irege irasoi wa lö hadöi gunania. Hizaʼi, lö itohugö lala wangera-ngerania andrö, iʼalui nawönia soʼameʼegö tödö yaʼia. Me itugu abölö-bölö wökhö bipolar si göna yaʼo, falömoʼahonoagu samösa zamakao yaʼo irege urasoi wa si lö eluaha waʼaurigu. Börö daʼö, simane Fetero, moguna ufahaʼö ndraʼo enaʼö lö tebulö ahatö khö ndra awö-awögu somasi manolo yaʼo, irege anau gölögu.

”Duma-duma tanö böʼö sondrara tödögu yaʼia daʼö Razo Dawido. Asese fawuka gera-erania börö waʼabasaki nitaögönia hegöi olalöwa si no irai ifalua ba zilalö. Salua khönia andrö fagölö simane salua khögu, börö me itaria ufalua mazui ufaʼema wehede sambö tefaudu ba gafuriata maniasa ndraʼo. Möi fondrara dödögu wehede Dawido nisura ba Zinunö 51. Ba ayati 3, imane Dawido, ’Aboto ba dödögu golalöwagu, ba itörö-törö tödögu horögu.’ Simane daʼö nirasoigu na depresi ndraʼo, abua khögu wangokhögö lala wangera-ngera si sökhi sanandrösa khögu samösa. Hizaʼi, omasido göi niwaʼö Dawido ba ayati 10, ’He Lowalangi, asogö khögu dödö sohau-hau, ba beʼe ba dödögu geheha si bohou ba saro.’ Ufaʼema göi ngawua wehede simanö daʼö ba wangandrö khö Lowalangi. Safuria, ayati 17 imane, ’Tödö si no afufu ba safatö, lö ötimbagö daʼö, yaʼugö Lowalangi.’ Ayati daʼa zamaduhuʼö ba dödögu wa iʼomasiʼö ndraʼo Lowalangi.

”Börö me uʼosambuaʼö wangera-ngeragu ba duma-duma si so ba Zura Niʼamoniʼö hegöi fanolo moroi khö Lowalangi, tola itugu faduhu dödögu ba mbuʼusa li Zura Niʼamoniʼö sanandrösa ba zi so miföna. Sindruhu-ndruhu möi fanologu daʼö enaʼö anau gölögu.”