1 | Fangandrö—”Mitouʼö ba Dangania Na So Zabu Dödömi Gofu Hadia Ia”

NIWAʼÖ ZURA NIʼAMONIʼÖ: ”Mitouʼö ba danga [Lowalangi] na so zabu dödömi gofu hadia ia, so so sa dödönia ami.”—1 FETERO 5:7.

Hadia Geluahania

Iʼandrö khöda Yehowa enaʼö tatutunö khönia gofu hadia manö gabula dödöda. (Sinunö 55:22) Lö hadöi abula dödö sebua mazui side-ide si tebai taʼohe ba wangandrö khö Yehowa. Na moguna khöda, hasambalö moguna göi khö Yehowa. Börö daʼö, moguna talau mangandrö enaʼö tasöndra waʼahono dödö.—Filifi 4:6, 7.

Bua Nitemada

Ba ginötö taforege ba wolawa faʼafawuka wangera-ngera, tola manö tarasoi hulö zi lö awö-awö ita. Ba itaria, lö aboto sibai ba dödö niha böʼö hadia zalua khöda. (Amaedola 14:10) Hizaʼi, na soroi ba dödöda tatutunö khö Lowalangi hadia ia nirasoida, hasambalö ihaogö ifondrondrongo ba iʼameʼegö tödö ita. Iʼila ita Yehowa, ba aboto ba dödönia waʼafökhö nirasoida hegöi abula dödö salua khöda. Omasi ia na tatutunö khönia hadia manö waʼaombö dödö nirasoida.—2 Ngaʼötö 6:29, 30.

Na fahuhuo ita khö Yehowa ba wangandrö, itugu faduhu dödöda wa iʼameʼegö tödö ita. Tola tarasoi simane nirasoi zanura sinunö me ilau mangandrö, imane, ”Öʼila wamakao si göna yaʼo; öʼila hawaʼatosasa dödögu.” (Sinunö 31:7) Na aboto ba dödöda wa iʼila zalua khöda Yehowa, tola möi fanoloda daʼö ba wanaögö faʼabasaki. Hizaʼi, tenga ha asala iʼila zalua khöda Yehowa. Abölö aboto ba dödönia hadia zalua khöda töra moroi ba niha tanö böʼö, ba itolo ita ba wanöndra famarou dödö hegöi fondrara dödö ba Zura Niʼamoniʼö.

Hewisa Zura Niʼamoniʼö Wanolo Julian

Molua-lua ba Waʼaurigu Waʼaombö Dödö

”Uforege ba wolawa faʼaombö dödö hegöi gangguan obsesif kompulsif (OCD). Tola manö urasoi waʼaombö dödö ba ginötö si lö mudöna-döna. Samuza inötö, sökhi manö zalua khögu. Lö ara aefa daʼö, urasoi waʼaombö dödö lö börö-börö. Abölö urasoi waʼaombö dödö na so ndraʼo ba gotalua niha böʼö. Aombö sibai dödögu hadia zi so ba wangera-ngerara sanandrösa khögu.

”Latolo ndraʼo ira awö-awögu me laʼila so khögu waʼaombö dödö. Sindruhu sa, itaria niwaʼöra khögu tenga somasido urongo. Hizaʼi, uʼandrö sibai saohagölö ba wamorege nifaluara börö me si sökhi khögu daʼö.

”Itaria, lö uʼila mangandrö na ifuli urasoi waʼaombö dödö mazui na tesao wökhö OCD. Moguna uforege ba wangosambuaʼö fangera-ngeragu ba fahuhuodo khö Yehowa ba wangandrö. Alio sibai tebulö-bulö niʼera-eragu irege tebai saʼae uʼosisiʼö. Na no fawuka wangera-ngeragu, lö uʼila ututunö khö Yehowa hadia niʼera-eragu mazui nirasoigu.”

Hewisa Zura Niʼamoniʼö Wanolonia Yaʼo

”No ufahaʼö ndraʼo ba Zura Niʼamoniʼö wa tenga balazi onekhe fahuhuo ita mazui anau wangandröda awena itema Lowalangi. Itaria na tebai ututunö khö Yehowa hadia zalua khögu, ha daʼö niwaʼögu, ’He Yehowa, tolo ndraʼo.’ Hewaʼae simanö, urasoi wa aboto ba dödö Yehowa hadia niʼandrögu ba ibeʼe hadia zoguna khögu. Baero na ulau mangandrö, ufaterapiʼö göi ndraʼo. Börö zi dombua ngawalö andre, itugu sökhi waʼaurigu. Tenga zaya-zaya gölö wamorege nifaluagu ba wangondrasi Amada si so ba zorugo, ba utema wanolo moroi khönia safönu faʼomasi.”