Fanofu Zombaso
Me ifalua Yesu Mbongi Watomesa Zoʼaya, hezo numalö ndra nifahaʼö si 70 si no irai ifatenge weʼamöi manuriaigö? Hadia no laröi ia?
Sindruhu sa, lö hadöi ira nifahaʼö Yesu si 70 me ifalua Mbongi Watomesa Zoʼaya. Hizaʼi, tenga daʼö geluahania wa no itimbagö ira Yesu mazui no laröi Yesu. Me luo daʼö, ha khö ndra sinengenia omasi fao Yesu.
Ato niha soloʼö khö Yesu. Ba wamobörö, ifili 12 ndra matua ba gotaluara enaʼö tobali sinengenia. (Luk. 6:12-16) Ba Galilaia, ”ikaoni zinengenia si 12” ba ”ifatenge ira ba wanuriaigö Famatörö Lowalangi hegöi ba wamadöhö fökhö”. (Luk. 9:1-6) Aefa daʼö, me so ia ba Yudea ”so 70 niha tanö böʼö nifili Yesu [ba] ifatenge ira daru-darua”. (Luk. 9:51; 10:1) Börö daʼö, ira sinenge si 12 hegöi si 70 niha tanö böʼö, no tobali ira nifahaʼö Yesu. Börö me laturiaigö sanandrösa khönia, daʼö mbörö wa itugu ato niha nifahaʼönia ba mbanua böʼö.
Me luo daʼö, ira niha Yahudi si no tobali nifahaʼö Yesu lafalua nasa Gowasa Fasa ero röfi ba tola manö fao khöra nösi nomora zamösana. (2 Mo. 12:6-11, 17-20) Lö ara fatua lö mate Yesu, mofanö ia hegöi ira sinengenia ba Yeruzalema. Hizaʼi, lö iʼowuloi fefu ndra nifahaʼönia moroi ba Yudea, Galilaia, hegöi Perea ba wamalua Owasa Fasa. Ba daʼa taʼila, ha khö ndra sinengenia omasi fao Yesu me luo daʼö. Imane khöra, ”No udöna-döna wemanga Wasa andre fao khömi fatua lö tefakao ndraʼo.”—Luk. 22:15.
Hana wa ha khö ndra sinengenia omasi fao Yesu? Ba zi lö ara tö, itehegö waʼaurinia Yesu tobali ’Ono Mbiri-biri andrö khö Lowalangi, sangeheta horö gulidanö’. (Yoh. 1:29) Alua dania daʼö ba Yeruzalema. Ba daʼö mutunu zumange khö Lowalangi iʼotarai me föna. Faʼauri Yesu nibeʼenia tobali sumange, daʼö dania zangefaʼö niha gulidanö, ba abölö ebua mbölinia moroi ba nono mbiri-biri nibeʼe sumange ba Gowasa Fasa, niʼa ndraono Gizaraʼeli ba mbongi fatua lö teʼefaʼö ira moroi ba Miserai. (1 Ko. 5:7, 8) Daʼa göi mbörö wa tola tobali kara wondrasi ndra sinengenia si 12 ba mbanua niha Keriso. (Ef. 2:20-22) Sadöni dödöda, ba Yeruzalema banua niʼamoniʼö, so ”12 gara wondrasi ba göli mbanua andrö ba no tesura döi zi 12 sinenge Nono Mbiri-biri yawa ba detenia”. (Fam. 21:10-14) Eluahania, ira sinengenia si lö faröi, ebua sibai noro dödöra ba wamalua ohitö dödö Lowalangi. Tobali, no sinangea na omasi Yesu fao khöra ba wamalua Owasa Fasa safuria ba aefa daʼö Bongi Watomesa Zoʼaya.
Hewaʼae lö si fao khö Yesu ndra nifahaʼönia si 70 hegöi nifahaʼö tanö böʼö me luo daʼö, hizaʼi fefu nifahaʼö Yesu si lö faröi latema mbua moroi ba Mbongi Watomesa Zoʼaya. Fefu niha Keriso nibayoini, hasambalö fao ira ba mbuʼusa li Wamatörö, nifatunö Yesu khö ndra sinengenia ba mbongi daʼö.—Luk. 22:29, 30.